Cúm mùa lac ruak njaom mbak anek ruak di jalan suak yava kayua virus cúm ba mai, bhian rahtabiak di bilan đông xuân atau tuk salih bilan. Di Việt Nam dom virus ba ruak cúm mùa bhian gaok lac cúm A/H3N2, A/H1N1 saong cúm B.

Ruak cúm mùa bhian oh jhak, min jeng hu tuk trak saong kan kandah jang di dom urang hu ruak hatai baoh saong ruak jalan suak yava, urang oh hu prein pacang ruak, urang taha, uranaih saong urang kumei matain. Ruak meda ngak brei viêm phổi trak, suy đa phủ tạng ba tal metai.

Tui BS. Lê Trương Tuyết Minh, Sang iek ruak TW Quân đội 108: Tuk uranaih taom gaok tapak haong urang ruak cúm mùa atau daok dalam labik hu  ruak cúm, ye bhian tamuh ruak hadei di 1 tal 4 harei hadei di tuk rup pabhap taom gaok haong virus cúm, ngak brei rup pandiak (bhian lac mangaok 38 độ C), pandik akaok, pandik abih rup pabhap, mbang oh bingi, glaih glar saong mboh hu sa dalam dom ruak gah jalan suak yava yau pandik tarakaong, dhun bhan, gar idung, sre ia idung, patuk, kan suak yava.

Ranaih ruak cum hanjul tok ngak patrun pandiak tui panuac pato tacei di bác sĩ, pabak ginup ia saong điện giải meng dung dịch Oresol, mbang ginup dinh duong saong padeih padei. Ruak meda cadu dalam 5 tal 7 harei. Min, patuk saong glaih glar meda dui atah dalam sa atau dua adit.

Njauk tui iek dom janih yau ye pandiak glaong oh mboh trun, kan suak yava, mom takik atau klak mom, taglaoh ta-aok rilo, handaoh rup pabhap atau oh thau hagait… Mayah mboh yau nan njauk ba uranaih nao iek ruak di sang iek ruak chip, piah plaih ba tal dom ruak trak yau ye: Viêm phổi, viêm cơ tim, viêm glo akaok atau suy dom tạng..

Tuk sangka iek glang uranaih njauk ruak cúm mùa di sang, amaik ame njauk caik hatai tal bruk ngak patrun pandiak ka uranaih meng bruk uh pandiak di dhei, pa-ak, calah pha. (Nhiệt độ ia uh hu brei thau meng jalan njuk kuk kieng di urang praong thun tame pa-ko ia, mayah mboh ấm lac jeng). Mayah uranaih pandiak glaong njauk brei ka uranaih manyum jru trun pandiak tui panuac kakei di bác sĩ, meng 4 tal 6 maong sa mbang, brei manyum veik mayah mboh uranaih daok pandiak glaong jang atau samu 38.5 độ C

Langiu di nan, njauk caik hatai tal bruk ngak brei hacih sa-at jalan suak yava, hacih sa-at idung, cambuai ka uranaih meng khan ba-ar lamin uak hacih idung, ia pabah blaoh klaak chip hadei di tuk pandar. Yaok harei, tanjaoh ia sara sinh lý Natriclorid 9‰ tame mata, idung ka uranaih, kalung pabah meng ia sara  sinh lý atau ia sara lai mbrang ka uraniah praong.

Tuk sangka iek glang uranaih, amaik ame saong uranaih njauk ruak bhian rao hacih tangin meng sa mbon haong ia hacih (brei rao hacih tangin urang raong saong uranaih), plaih ba tangin tagok mata, cambuai, idung.

Njauk brei ka uranaih mbang pandap mbang hu rilo dinh dưỡng, pandap lamin, mbuan ra-lai, mbuan luan yau bu, ia tasau, baoh kayau saong manyum rilo ia. Brei mom amaik rilo mayah uranaih daok mom amaik.

Dalam tuk sangka iek glang uranaih, mayah mboh uranaih ruak trak jang, mboh dalam rup karei atau mboh patuk, pandiak, sre ia idung, glaih glar…, ngak ka uranaih hia oh mbang, ye njauk ba uranaih nao labik y te chip piah hu iek ruak saong langyah samu./.