Brei tui iek tuk vak klauk vaccine Astrazeneka 

TS Phạm Quang Thái, Akaok jabat klauk jru peih prong bhum gah Barak ndom lac, labik ngak tabiak hu panuac kakei lac mbang klauk ka dua atah mbang klauk ka sa di vaccine AstraZeneca lac meng 4-12 adit, oh lac 8-12 adit. Min bruk palih ruah tukvak atah gauk di dua mbang klauk meng 8-12 adit kayua ini lac tukvak vaccine siam di abih ka bruk pacang caga glaong di abih, nan lac miễn dịch hu ngak tabiak dalam tukvak meng 8-12 adit meda hu glaong jang tukvak dahlau di 8 adit. Bruk daok ba tabiak nan lac njauk mong iek veik bruk palih ruah samar hu khik caga atau caong khin khik caga di tanut glaong. 

BS Thái khan cambaih, dom roh duah brei mboh, tukvak atah gauk di dua mbang klauk lac 8-12 adit ye vaccine pacang caga njaom mbak ruak glaong jang, daok bruk pacang caga ruak trak saong ba tame sang iek ruak ye dua jalan ngak ini glaong – biar jang gauk oh rilo, jeng lac labaih 90%. Meyah dua mbang klauk atah gauk yau ini, vaccine meda hu siam lagaih glaong dalam pacang caga njaom mbak tal 83%,  dalam tuk klauk dahlau 8 adit ye bruk khik caga njaom mbak tok hu jaik 71%. Yau nan min, bruk caga ruak trak saong tame sang iek ruak glaong- biar jang gauk oh rilo, jeng labaih 90%. 

Jeng tui BS Thái, di bhum hu jit njauk klauk aval jang, daok di dom labik oh hu jit ye kham merat cang tal 8 adit meng klauk.   

Dalam tuk biến thể Delta daok njaom mbak khang saong mbuan hu dom biến thể khang jang, kan kandah jang dalam harei hadei, rilo taneh aia angaok dunya daok kuhria tal bruk dui katut panak tukvak atah gauk di dom mbang klauk piah khik kajap bruk khik caga siam di abih ka bhap bani. Biak di nyu, ini oh njauk lac jalan ngak bahrau. Yau di Anh, negar ini brei dui katut panak tukvak atah gauk di dua mbang klauk vaccine AstraZeneca meng 12 adit trun daok 8 adit ka dom urang umo meng 40 tagok. Dalam tuk nan di Australia, kapul Cố vấn Ilamu negar ka klauk jru hu panuac kakei lac tukvak atah gauk 12 adit di mbang klauk camereip haong mbang klauk ka dua di AstraZeneca njauk trun daok 4–8 adit ngan haong dom urang daok di dom bhum njauk ruak khang di abih.

Tui dom chuyên gia dịch tễ, bruk sangka prong abih tukvak ini, lac biến thể Delta meda ngak brei njaom mbak glaong jang saong meda trak jang, mbuan tame sang iek ruak glaong jang. Kayua yau nan ye, dui katut panak tukvak di mbang klauk camereip saong mbang klauk ka dua meda ba mai siam lagaih bruk pacang caga katut panak. Kadha ini hu mong lac hu kein meyah tamuh khang jit ruak./.

Urang lang: Jasi -23/9