Lac Bi thu Chi đoan palei Cam Tan Trung A, xã Tân Hưng, huyện Tân Châu, tỉnh Tây Ninh, sa-ai Chàm Oanh Sệt umo 28 thun tuk halei jeng hu urang anit ranam kayua slut mbut, tapak tapaiy, siam hatung hatian saong tuk halei jeng kham merat yam tapa dom kan kandah, daong ka urang karei gam yam tagok.

Thun 2000, sa-ai Sệt hu dom urang đoàn dalam palei pok ngak Bi thu Chi đoan palei Cam Tan Trung A. Sa-ai tuk halei jeng sahaneng duah jalan piah ka bruk ngak di đoan hu kein laba, pachreih hu rilo dam dara pataom mbaok tame, abih di nyu nan lac dam dara urang bangsa Cam. Sa-ai ba tabiak jalan ngak saong pok panuac tagok pakat Đảng, Mban khik iek palei daong ka dam dara jeng yau bruk ngak di Doan hu mbuan lagaih. Sa-ai kham merat jak ba urang doan, dam dara bangsa Cam dalam palei bac megru, yam tagok jeng menuac ba mai kein laba ka puk palei, ka xa hoi. Piah pachreih dam dara, gam saong Mban chap hanh chi đoan, sa-ai hu peih dom mbang taom gaok saong dom chi doan sahabat piah klah rabha ilamu, jalan ieu pataom dam dara. Tapa dom mbang taom gaok, ndom biai nao mai, daoh tamia, me-in the thao, nyu pachreih hu rilo dam dara urang đaon pataom mbaok tame. Piah ka dom bruk ngak halan hatian hu kein laba, sa-ai tuk halei jeng ba akaok nao dahlau dalam bruk ngak,  yau ye bruk haci hacih alam moi truong, daong mikva pasiam veik sang danaok, pasiam veik jalan mbak dalam palei…Meng hatai kham merat saong abih hatung hatian ka bruk ngak, sa-ai Sệt hu daong ba Chi doan palei Cam Tân Trung A meng yeu tagok jeng sa Chi doan khang kajap di Đoan xã Tân Hưng, huyện Tân Châu dalam bruk padang mbang ngui, daok dang. Sa-ai Sệt khan lac: “ Dahlak bac tuk halei jeng pasram patia bac megru tui panuac Wa Ho pato. Dahlak brei ngak dahlau, khin ngak habar piah daong dom adei sa-ai dam dara Cam dalam palei hu rilo siam mekre, bac megru sumu ayut ndoan sahabat”.

Piah daong baoh sang uarng doan dam dara kan kathaot dalam palei patagok raidiuk, sa-ai Sệt gam saong Chi doan dang angan tabiak piah ka Gilang pariak karja tinh brei ka 50 baoh sang kan kathaot hu mesre jien, abih tih 200 triệu đồng piah kuac bingun ia piah pandar, khik caga hacih sa-at alam moi truong.

Gam saong bruk Doan,  urang palei Tân Trung A daok thau tal sa-ai Sệt nan lac sa dalam dom dam dara bangsa Cam kham merat yam tapa kan kandah, tari tarieng ngak mbang. Raidiuk kan kandah oh pacang hu hatai kham merat, caong khin yam tagok di urang likei bangsa Cam ini. Sa-ai pataom phun jien, ilamu tame bruk pala cao su, tuk lahaiy sa-ai nao ngak mbang kuah katak caosu mbang pah ka mikva dalam palei piah duah jien. Mboh hadah mbaok meta ka urang Bi thu chi doan di drei, sa-ai Varigiah uarng dalam Chi doan palei Cam Tan Trung A khan lac: “ Sa-ai Set tari taring,  tuk halei jeng abih hatai ka bruk ngak, gheih ieu pataom dam dara. Yaom lac sang kan kandah min saai gam ngak bruk đoan gam ngak mbang raong diuk anek, ngak rilo burk daong puk palei. Ai Sệt  hu adei sa-ai dam dara biak nit nam”.

 Hu hatai kham merat yam tagok saong paglaong kein laba bruk ngak di đoan,, sa-ai Chàm Oanh Sệt tuk halei jeng hu dam dara dalam palei anit ranam, jia tame, hu Tỉnh Doan Tây Ninh alin brei rilo harak meyaom./.