Bruk hagait dalam palei saai jeng hu mbaok chip
Umo 55 thun, muk Đinh Thị Thu jeng daok ba akaok nao dahlau dalam yaok bruk pakacah. Muk thau lac, khin hu urang jia, ngak tui ye dahlau di abih drei lac menuac ba akaok nao dahlau, ndom nao gam saong ngak, kinh tế boh sang patagok, anek bhik bac daa naih joi song hu bruk ngak tani tanat, meng pathau khan jak ba hu mik va. Muk khang hatai padang trang trại rong limo, pabui, menuk pambuak song pala keo piah patagok kinh tế boh sang.
Muk Thu bhian sahneng lac ngak habar piah dong ka bhap bini patruh kathaot, patagok kinh tế angaok bhum palei di drei. Mboh hu dom kein lagaih di bhum glai ceik, muk Thu jak ba urang pala keo, pambuak song rong glang piah mek katut rong atah, mek bein glai piah rong glang. Tapa nan, hu biak rilo boh sang yam tagok tabiak truh kathaot meng bruk tacei pato di muk Thu.
Muk Phạm Thị Thanh brei thau: “Dahlau deih duik pasang hulin tok thau pala sa janih keo, tuk lahaiy ye nao ngak mbang pah ka urang duah jien mbang tapa harei. Meng tuk hu muk Thu tacei pato, dong anek pajaih, sang hulin hu rong kubao, menuk ada. Urak ni, sang oh dok nduac duah yaok var mbang huak, kayua harei lei jeng hu jien meng bruk pablei boh menuk, boh ada, pablei menuk rilaow”.
Langiu di nan, muk Thu jeng hu rik dong prong dalam bruk jhul kadun likuk bruk likhah caga tuk oh ka tal umo ti hukum, tok gauk dalam but pajaih song klaak nao dom adat cambat klauk oh daok lagaih dalam bruk pala drak rong glang dalam palei. Gam haong nan, muk kham merat pathau khan, tacei pato bhap bini pandar dom ilamu kỹ thuật bahrau tame bruk ngak mbang pala drak. Dom bhum taneh pala drak takik kein laba hu pasiam veik piah pala ratak lo, lange, dom tapon kubao, limo hu rong kreik tui jalan pandap panda salih ka raong palao... Tapa nan, rik dong tame bruk hadah mbaok meta dalam rai duik bhap bini bangsa pak ni
Saai Phạm Thị Tính brei thau: “Tok mehit sang halei hu kandah gauk, tong paoh gauk , atau mbuan si brei anek klaak bac meteh dhi ... lac muk Thu mai tal labik piah duah thau, jak ba, langyah. Tuk hu dom urang biak kan kandah, muk Thu samar jak ba dom urang ngak pahla atau pok panuac tal dom kapul nyaom di ban piah duah jalan dong brei”.
Saai Nguyễn Thị Mỹ Lệ, Phaok Chủ tịch Ủy ban bhap bini ban sit Ba Tơ brei thau, muk Thu hu ngak rilo bruk di palei Uy Năng yau : akaok tổ dân phố palei, akaok dhar kapul urang kamei, akaok dhar kapul pachreih bac. Ngak bruk hagait, muk Thu jeng ngak siam bruk di drei song tuk halei jeng lac urang ba akaok, nao dahlau dalam yaok bruk ngak. Tuk hu sarak, jalan ngak bahrau, muk Thu bhian duah thau song pathau khan brei ka bhap bini thau song ngak tui. Muk lac talei pambuak bruk di karja palei song bhap bini./.
Urang lang: Hanipha- 16/11
Viết bình luận