Dom adei saai kham ngak tabiak khẩu trang piah brei saoh ka urang kathaot 

Ieu bui sambai lac xưởng min biak nao yaok công đoạn hu parabha di rilo baoh sang tui jalan ngak lac "cây nhà lá vườn". Di sang saai Đào Thị Kiên (phường An Lộc ban sit Hồng Ngự, Đồng Tháp), 3 sruh mac jhik khan ao mbang pah jeng lac bruk duah jien mbang ngui yaok harei di sang saai, urak ni duh abih 2 jamariak piah jhik khẩu trang. Langiu di saai Kiên daok jhik di jamariak jhik, saai Kiên klao ndom mayai lac: " Tapa mbang jhik khẩu trang ini, nai, haong anek kamuan dalak thau jhik. Dom anek saih gah dieh ye biak ghieh tangin". Dom saai daok di puk jeng lac hội viên kapul urang kumei puk, kham merat tuk padieh jala pandiak ye tapa daong. Tuk dahlau buh tangin tame ngak, dom saai oh var kakei gauk rao tangin meng ia cồn 70 độ.

Muk Đặng Kim Xoàn hu mbaok tame labaih 10 harei brei thau lac: "Khẩu trang mikva oh hu cuk bo urang pablei salih tagok yaom biak glaong. Saai meng ginum baai haong gauk sa urang buh hasit prien piah ka abih gauk thei jeng hu khẩu trang piah cuk, daong khik ka rup drei jeng yau daong khik ka rahra”. Saai Võ Hữu Hạnh haong diuk, hu brei bruk cakak khan baai. Dom janih jamariak yau ye jamariak cakak, jamariak dập, sa-ai oh huac hana piah khik ka bruk cakak khan baai hu biak rilo. Piah hu khan baai jhik khau trang, adei saai kumei jeng nduac trun tagok piah jak ba, blaoh pajeng khan baai mai parabha ka dom labik. Phon tangin di saai Ngô Thị Diễm Thúy, akaok kapul urang kumei ban sit Hồng Ngự, tuk halei jeng taduan hu panuac bui sambai. Tiểu thương brei dom pok khan baai daok bahrau, brei viek dom jamariek bahrau tabiak, khẩu trang oh mek jien hu alin tal tangin ka dom đồn biên phòng piah alin hadaih ka bhap bini nao tapa pabah mbang negar...Saai Thúy brei thau: "Nao dahlau abih lac adei saai di labik puk An Lợi, phường An Lộc. Tuk camereip sa-ai tok sahaneng lac ngak piah brei ka mikva dalam phường. oh saneng hadei nan lac abih 6 xã, phường daok gilac jeng ngak tui. Kapul praong ye hu yaok pluh urang, kapul sit ye hu dom adei saai. Mikva tiểu thương tuk halei jeng brei rilo khan baai. Blaoh dom urang ngak pahla daong jien piah blei khan baai”.Abih di nyu nan lac di harei 16-3, vaktu brei cuh khẩu trang di dom labik hu rilo manuac, bhap bini tuk nao tal jabat hành chính, gilang pariak di ban sit hu alin brei saoh khẩu trang meng khan baai, saong daok hu pato tacei rao tangin meng ia pametai anek ruak. Jeng harei 16-3, kapul jhik khẩu trang camriep di puk An Lợi, phường An Lộc hu UB bhap bini phường alin harak manyaom ndom ka bruk ngak siam lagaih ni. ./. 

Urang lang: Thu Thảo -6/4