Lac akaok dhar kapul urang kumei ấp 4, xã Xuân Hưng, huyện Xuân Lộc, tỉnh Đồng Nai, sa-ai Ma Ri Giah, ndih tapui thun 1976  tuk halei jeng abih hatai haong bruk ngak di Hội. Sa-ai bhian saneng duah jalan ngak yau habar piah ka hội viên, urang kamei hu patagok ilamu, paglaong rai diuk, meng nan patagok labik dang di urang kamei dalam baoh sang saong langiu xã hội, dak padang baoh sang dak harei dak trei sil, bình đẳng, tiến bộ saong haniem phol. Dom bruk ngak di sa-ai tuk halei jeng taduan hu bruk pachreih tui abih hatai di manuac urang, abih di nyu lac adei sa-ai kumei.

Langiu di bruk xã hội, gam iek glang pato pakai anek bhik saong patagok kinh tế… biak jan van, glaih glar, min sa-ai Marigiah jeng ngak siam taong abih bruk dalam sang saong gah langiu xã hội. Sa-ai bhian nao cơ sở, tal yaok baoh sang piah taom gaok, duah thau hatai caong khin di dom adei sa-ai piah hu jalan tacei pato cambaih laih. Meng dom bruk ngak biak siam, sa-ai jak ba ralo adei sa-ai kumei Cam hu mbaok tame kapul urang kumei. Taphia di nan, peih ngak siam dom bruk pakacah yau “dân vận khéo”, “bac megru saong ngak tui jalan hadah krah siam mekre di Hồ Chí Minh”. Praong di abih nan lac bruk iek glang pren yava ka urang kamei saong uranaih, mong iek daong ba urang kamei cakrok patagok kinh tế, dak padang baoh sang trei sil, bình đẳng, patagok saong haniem phol… Ralo mô hình ba mai kein laba hu ralo adei sa-ai urang kamei abih hatai hu mbaok tame yau: khan brah anit ranam, raong pabui haluk patak pataom hu 30 triệu đồng yaok thun, daong ka 20 hội viên cakrok patagok kinh tế saong 10 anek saih kathaot kham merat yam tapa kan kandah…

Meng naih gheih saong abih hatung hatai, sa-ai Marigiah hu adei sa-ai kumei jia tui, meng di nan adei sa-ai hu mbaok tame kapul urang kamei dak harei dak rilo. Yaok thun, sa-ai Marigiah pambuak haong pasak bac megru bhap bani urang kamei xã peih tal pato bruk ngak ka urang ngak di palei, peih 3 tal bac dalam thun yau jhik, raong glang saong ngak binyu giả. Hadei di khóa pato pathram hu 12 adei sa-ai kamei Cam hu bruk ngak tani tanat, jien mek tame meng 3 triệu 500 ribau đồng tal  5 triệu đồng. Tal harei ini, dhar kapul urang kamei Cam ấp 4 hu 100 hội viên hu mbaok tame sinh hoạt. Yaok adit dalam van page harei car, sa-ai Marigiah jak ba adei sa-ai nao puh ramik haci hacih canah jalan urang kamei khik iek, meng nan bo canah jalan tame palei Cam tuk halei jeng hacih sa-at, siam mekre. Dom bruk ngak di sa-ai Marigiah hu xã hội saong mikva dalam palei pachreih tui. Amuk Trần Thị Tuyết Sương, Akaok kapul urang kamei xã Xuân Hưng, huyện Xuân Lộc, tỉnh Đồng Nai brei thau: Sa-ai Marigiah hu palih ruah lac urang hu angan je dalam bhap bani Cam, dalam bruk pathau khan sa-ai hu mikva Cam jia tui, peih ngak njauk jalan ba di Đảng, sarak di Karja, ba bruk di urang kamei saong rai diuk di adei sa-ai kumei Cam dak harei dak cakrok patagok jang.

Dalam sang sa-ai tuk halei jeng lac urang diuk, urang amaik salut mbut, tuk halei jeng sangka tal baoh sang di drei, pasang di sa-ai nan lac sa-ai  Rohim tuk halei jeng lac urang nao gam haong sa-ai, pachreih ba sa-ai dalam tuk gaok kan kandah piah ka sa-ai sahanang hatai ngak bruk. 

Mboh hu dom rik daong siam mekre di sa-ai brei ka xã hội, dom pakat Kapul urang kamei tỉnh Đồng Nai hu alin ka sa-ai ralo harak meyaom, bằng khen, kỷ niệm chương. Sang sa-ai thun halei jeng mek hu angan “Baoh sang ilamo”. Sa-ai Marigiah njauk haong phẩm chất di urang kamei Việt Nam lac “Joi bruk taneh aia, naih bruk sang danaok”./.