Pathau mikva saong taong abih gauk! Luac dalam dom thun mesruh metak rambah rambup taong pateok kol khamang, đế quốc, di tỉnh Kon Tum, urang kamei dom bangsa takik, yau Giẻ- Triêng, Sê đăng, B’râu, Rơ mâm… daok rah tui jalan negar jaik hong taneh ia Lào saong CPC hu dom rik daong biak praong ka cách mạng. Dalam rai diuk sron mbon urak ini, patagok ilamu “Kiên cường, bất khuất, trung hậu, đảm đang”, urang kamei dom bangsa labik ini daok ba tangin tame rik daong gam hong urang jakar, urang lin biên phòng khik caga chủ quyền an ninh taphia negar. Urang vak Khoa Điềm, daok di Tây Nguyên hu kadha vak “urang kamei Kon Tum ba tangin tame khik caga chủ quyền an ninh taphia negar” . Daa mikva saong taong abih gauk tui pang: 

Tỉnh Kon Tum hu labaih 280km jalan taphia negar hong dua taneh Lào saong CPC. Luac dalam dom thun tapa, bilan hajan jeng yau bilan pandiak, rup binguk urang kamei Giẻ- Triêng, Sê đăng, B’râu, Rơ mâm… hu mbaok tame gam hong urang jakar, urang lin Biên phòng tuần tra khik caga jalan taphia negar hu jeng krein randap.

Ndih tapui tabiak, praong tagok di labik taphia negar, dom saai randap hong yaok baoh ceik, yaok baoh craoh saong mboh thau chip dom salih barau meyah lac sit abih dalam yaok tấc taneh palei negar. Pambuak saong bruk jak ba bhap bini ralo thun. Thượng úy Vũ Mạnh Hiển, Bộ đội biên phòng tỉnh Kon Tum  taong yaom bruk ngak di adei saai kamei di puk palei dalam bruk hu mbaok khik caga chủ quyền taneh ia, an ninh taphia negar:

 “Adei saai kamei biak siam dalam bruk pathau khan, pato pakai ka dam dara urang ranaih umo lac anek kamuan dalam baoh sang di drei khik caga chủ quyền an ninh taphia negar. Dua tra lac bhum atah bayah, bhum urang bangsa takik, bộ đội biên phòng kol dahlak kayua hu dom adei saai kamei di dom puk palei saong abih di nyu nan lac urang hội kamei di xã ngak siam bruk di drei”.

Patagok jang gac bruk di urang kamei dalam khik caga chủ quyền an ninh taphia negar, bilan 9 meng bloh, di xã Đắc Dục, huyện Ngọc Hồi, Hội Liên hiệp urang kamei tỉnh Kon Tum saong Bộ chỉ huy Bộ đội Biên phòng tỉnh hu tabiak mbaok bruk ngak iek “Urang kamei ba tangin tame gam hong bộ đội biên phòng khik caga chủ quyền an ninh taphia negar pambuak saong bruk khik caga tài nguyên môi trường”.

Meng 30 menuac tuk camereip di 11 puk - palei, adei saai urang kamei xã Đắc Dục hu mbaok tame gam saong urang jakar chiến sĩ biên phòng dalam dom bruk khik caga angaok 14 km jalan taphia negar ngan saong 5 geng jemeng jaik hong taneh ia Lào. Brei thau hatung hatian di adei saai kamei tuk hu mbaok tame bruk ngak, saai Y Chon, akaok Hội Liên hiệp urang kamei xã Đắc Dục lac:

 “Adei saai biak chreih chrai, uan tabuan kayua bruk ngak ini biak hu makna saong kein lagaih. Meng hu bruk ngak ini, adei saai mai sang pathau khan  ka pasang likei, anek bhik dalam baoh sang thau hu bruk ngak di drei lac anek menuac di bhum taphia negar….tapa nan, mikva oh jah tak glai ngak puh, oh mek kaya glai suan hukum”

Trung tá Phạm Khắc Tấn, Chính trị viên - phaok Đồn Biên phòng Dục Nông brei thau, piah ka bruk ngak ini hu kein lagaih, tui bruk dalam rai diuk, bruk ngak mbang pala drak  di adei saai, mban chủ nhiệm hu padang jalan ngak cambaih laih ka yaok bilan dalam thun:

 “Yaok bilan biên phòng gam saong urang kamei hu padang jalan ngak saong dom danak dak bruk ngak dalam yaok bilan. Gam saong urang akmei pathau khan ka urang kamei di xã piah jak ba baoh sang, jak ba bhap bini hu mbaok tame khik caga chủ quyền an ninh taphia negar”.

Gam saong bruk dak padang baoh sang trei sil, hanem phon, dom thun tapa adei saai kamei di 101 palei dalam 13 xã, di 4 huyện taphia negar tỉnh Kon Tum, nan lac Đắc Glei, Ngọc Hồi, Sa Thầy saong Ia H’Drai patagok hu bruk ngak di drei dalam khik caga jalan taphia negar, rik daong dak padang hệ thống chính trị cơ sở khang kajap, pakhang thế trận lòng dân pabak bruk dalam tukvak barau. Ralo jalan ngak, bruk ngak di adei saai hu gah biên phòng saong karja puk palei taong yaom glaong, daok patagok kein laba saong hu pambak praong dalam tukvak tal. Amuk Nguyễn Thị Phong Lan, Phaok akaokHội Liên hiệp urang kamei tỉnh Kon Tum, brei thau:

 “Hội Liên hiệp urang kamei tỉnh saong Bộ đội Biên phòng tỉnh thau lac bruk peih ngak dom mô hình cambaih laih di dom xã taphia negar piah ka dom urang hội kamei hu mbaok tame saong brei mboh bruk ngak di drei. Jeng biak caong khin dom urang hu mbaok tame bruk ngak tapa bruk hu mbaok tame dom bruk ngak, paglaong akaok saneng di drei saong jeng urang nồng cốt pathau khan jak ba dom rai rah bhap bini kham merat hu mbaok tame khik caga an ninh chính trị, trật tự n toàn bhum taphia negar”.

Meng dom kham merat rik daong dalam bruk khik caga chủ quyền an ninh taphia negar, HLH urang kamei dom pakat di jalan taphia negar jaik dua taneh ia Lào saong CPC di tỉnh Kon Tum hu Bộ tư lệnh Biên phòng saong HLH urang kamei VN palih ruah ngak điểm di bhum Tây Nguyên piah peih ngak danak dak pambuak bruk jak ba urang kamei hu mbaok tame dak padang saong khik caga chủ quyền taneh ia, an ninh taphia negar, tasik pulao tukvak 2017- 2022./.