Tuk umo 6 thun, hadei di sa mbang ruak, saai  Dương Phương Hạnh oh dok pang hu dom sap yava vil val drei. Yam tapa pandik harao, oh taduan lah thar vak, saai kham merat bac megru, prong tagok tapen dom urang pang mehit hu song kham merat tui  samu urang. Hu bruk dong di amaik ame adaei sa-ai dalam sang, saai eng drei bac tín hiệu môi, bac ký hiệu ndom biai, taom gaok dom urang jiak tapen. Bloh saai mek hu bằng kỹ sư ngành Hóa di sang bac Đại học Bách Khoa ban raya Hồ Chí Minh. Saai ngak iek rilo bruk karei di gauk, meng urang ngak dalam phòng máy di công ty hóa dầu, tal ngak dịch thuật, bloh ngak urang halan hatain ka sa kapul lingiu rajaei dong ka urang tangaoh. Tapa nan, saai thau hu dom kan kandah, kurang lihik di dom urang tangaoh. Saai cong khin hu dong, hu pabak ilamu taom gaok ndom biai nao mai piah ka dom urang hu thar vak yau drei hu ba drei tame bhap bini, duik song ngak bruk. Mboh di rilo labik dalam negar dok kurang rilo pasak, labik dong ka urang tangaoh, saai khang hatai padang sa kapul tổng hợp piah dong. Saai  Dương Phương Hạnh khan lac:

Dahlak oh khin dom urang tangaoh gaok dom kan kandah yau dahlak,  tapa nan patrun hu kan kandah ka dom rai rah harei hadei lac bruk bo dahlak biak cong khin. Dom uranaih tangaoh hu rai duik karei di gauk, boh sang karei di gauk, nan ye dahlak sahneng duah dom jalan ngak ka nyu lagaih.

Dalam dom urang tangaoh, saai biak caik hatai sangka tal uranaih. Oh khin ka dom adei tabiak truh dom urang pang mehit hu meng di tuk dok sit, saai padang tabiak pasak roh duah pato pakai ka urang tangaoh song duah tdom jalan dong pato pakai ka dom adei sit. Saai hu panuac ieu dom urang ngak pahla, duah dom jamriak trợ thính klak di dunya. Urak ni pasak hu dong 600 máy trợ thính ka dom adei tangaoh hu rai duik kan kandah. Ni jeng lac sa labik camereip di VN kayua urang tangaoh padang ngak song pabak ka urang tangaoh. Yaok bilan hu jiak 30 urang tut angan tame bac di labik ni, dalam hu urang tangaoh song urang oh tangaoh. Pasak kayua saai padang ngak jeng sa labik caik hatai jia tame di dom amaik ame hu anek, gauk gar njauk tangaoh tanye. 

Saai Đinh Thị Tuyết Huyền, palei daok di Bình Định, kham merat mai pah phòng trọ di ban raya HCM kayua anek kamei sit ruak tangaoh di drei. 6 bilan tapa, yaok harei saai ba anek kamei umo 3 thun njauk tangaoh nao bac di pakak CED. Saai Huyền drut droi khan lac:

Meng tuk bo hulin mehit  anek ieu ame, ieu amaik, salam ame anek nao bac mai ye hulin uan tabuan lo, oh thau ndom habar hu,  mboh bui sambai gam drut drui. Urang halei hu anek tangaoh jeng thau. Njauk lac gaok saai Hạnh ye biak patuah ka sang dahlak, ka anek di dahlak. Dahlau deih drei sahneng lac oh daok hagait piah pasiam hu. Min meng tuk gaok saai Hạnh ye jalan sahaneng nan oh daok tra. 

Langiu bruk alin brei jamriak trợ thính, pato bruk ngak song dong duah bruk ngak ka urang tangaoh, saai dok peih dom tal bac ngôn ngữ ký hiệu dong ka sang di urang tangaoh ndom biai siam jang song gauk gar dalam sang. Saai ba tabiak dom bruk pambuak saong gauk, ngan song 8 dịch vụ, meng pato pakai,  can thiệp sớm tal dom kỹ năng ba drei tame bhap bini. Saai gam ngak akaok pasak, nao ieu urang dong ka dom adei tangaoh kan kathaot, gam lac anai gru pato ka urang tangaoh, gaok tuk mai saai dok iek glang uranaih piah thau hatai sahneng di yaok anek saih. Urak ni saai dok lac Tổng thư ký Liên đoàn Khiếm thính dunya, Chủ tịch Liên đoàn nghe kém Châu Á – Thái Bình Dương. Hu rilo bruk njauk ngak min saai oh thau gleih glar song cong khin hu buh pren yava daong ka urang tangaoh. Saai Dương Phương Hạnh brei thau:

Dahlak cong khin peih sa sang bac bo di labik nan yaok tal bac tok hu 20 anek saih, bo hu 10 adei tangaoh, 10 adei oh tangaoh, meda lac uranaih metui medar , atau sang kan kandah. Tuk dom adei tangaoh bac tamat pakat I , dom adei meda bac di sang bac trung học cơ sở, trung học phổ thông halei jeng hu. Tuk nan bruk ba drei tame oh daok kan kandah hagait ngan saong dom adei.

Dom bruk bo saai Dương Phương Hạnh dok kham merat ngak jeng mai meng sa boh hatai bak anit ranam, thau hu bruk glaih glar di dom urang tangaoh. Kadha praong jang nan lac, ngan saong sa-ai, meda taduan jaoh jo min oh taduan lah thar vak, kayua lac bruk hagait jeng meda ngak hu ./.