Ndik tapui tabiak song prong tagok di bhum ceik glai Hang Chú dok rilo kan kandah,,, meng sit  saai Mùa Thị Dông mboh lac adei saai kamei di labik ni dok kurang sap janih tuk oh hu nao bac rilo, nan ye akaok sahaneng dok bier. Kayua yau nan ye, dom sang adei saai kumei rilo meng kan kathaot kayua oh thau salih janih phun pala, anek athur rong,  kinh tế takik tagok, rai duik pagam pambak tame langik tasik, eng drei ngak, eng drei mbang... Njauk ngak yau habar piah dong ka dom urang kamei dalam xã tabiak truh kathaot? Hatai sahaneng nan tuk halei jeng dok dalam akaok, pachreih saai oh huac hajan, pandiak, nao tal yaok palei piah pathau khan,,, jak ba adei saai kumei salih jalan sahaneng,,, jalan ngak:

 “Hulin nao pathau khan jak ba urang hội jhui jah glai ngak puh. Gam song nan, ba taneh pala drak oh kein laba tapa pala dom janih phun mbang boh hu yaom  kinh tế glong tui ilamu kỹ thuật”.

Tuk camereip bruk jak ba  di saai  Dông jeng gaok rilo kan kandah kayua adat cambat tanarakun, hatai sahaneng di urang Mông lac adei saai kamei njauk dok DI sang iek glang anek bhik, patagok bruk sản xuất. Kham merat tui jalan yau Yuan lac “Mưa dầm thấm lâu”, saai dui ba adaei saai kamei hu mbaok tame dom tal bac xóa mù chữ, piah takik di abih jeng thau kuhri kuhria ngak mbang. Ndom sap  phổ thông mboh adei saai oh thau rilo, saai langyah meng sap Mông mbiah tal tuk adei saai thau meng luai.   Saai   Hờ Thị Máy, daok di palei  Pá Cư A, xã Hang Chú brei thau:

: “Khol hulin hu saai Dông akaok kapul urang kamei  xã nao tal yaok palei pathau khan brei adei saai kumei urang hội thau ka bruk patagok kinh tế, dak padang boh sang haniem phol, ndik tapui tui sarak karja song brei anek tal umo hu nao bac da-a. Bruk njauk biai nan lac tuk saai nao pathau khan, sa-ai bhian pathau khan meng sap Mông song sap phổ thông, yau nan ye adei saai urang hội khol hulin mbuan thau song mbuan ngak tui hu  ”.

Meng di tuk camereip hu biak takik adei saai urang kamei hu mbaok tame kapul, urak ni, abih tih hội viên urang kamei xã Hang Chú tagok tal  527 urang. Meng bruk tok bhian randap dok sa labik, meng sang tagok hamu, rilo adei saai urang kamei urak ni sami samar song pasang likei khang hatai patagok kinh tế boh sang. Yau ye bruk pala phun mbang boh di angaok taneh klaak saoh. Rilo boh sang adei saai di labik ni hu ba phun Sơn Tra (dok ieu lac táo mèo), thảo quả tame pala brei kein laba  kinh tế glong. Urak ni, dom sang urang hội pala takik di abih labaih 1ha sơn tra, thảo quả,  sang pala rilo meng  20-30 ha tagok. Pambuak song rong (glang) kabau, limo, pabui, menuk palao angaok mbon, tui kuhria yaok thun, dom sang urang kamei hội hu jien mek tame meng  40 tal 50 triệu đồng sa thun . Hu 15 boh sang duah hu meng  60 tal 100 triệu đồng yaok thun. Tui saai Hờ A Dua, Akaok  UBND xã Hang Chú: Bruk di Kapul urang kamei  xã, meng hu bruk tacei ba biak siam lagaih di urang kamei dang akaok Mùa Thị Dông hu rik dong patrun biak rilo boh sang kan kathaot di xã:

   “Saai  Mùa Thị Dông, Akaok kapul urang kamei  xã Hang Chú lac sa urang tuk halei jeng nao dahlau dalam bruk pathau khan, pachreih ba dom adei saai kumei urang hội jang yau bhap bini dalam  xã ka bruk patagok sản xuất song rong glang. Abih di nyu nan lac pala phun  sơn tra song thảo quả; tagok rilo jang dom boh sang ngak alak Hang Chú piah pablei tabiak darak pasa. Tapa nan, mik va hu bruk ngak song hu jien mek tame tani tanat ”./.