Yaok melam sut, melam car song melam adit yaok adit, adei saai kumei urang Ê đê di palei Phơng, xã Cư Dliê M’nông, huyện Cư M’gar, tỉnh Dak Lak chreih chrai pan mbut kalam, harak tapuk jak gauk nao tal sang ilamu bhap bini piah bac haroh. Tal bac kayua saai H’Hồng Kđoh, Akaok dhar kapul urang kamei palei  Phơng, peih tabiak meng bilan 10/2014, song hatai khin xóa mù chữ ka adei saai. Saai H’Hồng brei thau:

Băng(Êđê):  Adei saai kamei dalam palei rilo meng oh thau haroh, nan ye, bruk kapul urang kamei dalam palei oh patagok, adei saai nyim urang karei mbaoh tangin brei ka drei dalam dom harak gar. Rilo mbang nyaom  mboh bruk oh thau haroh di adei saai biak kan kandah dalam rai duik, nan ye hulin peih tal bac piah xóa mù chữ ka adei saai.

Tuk camereip, kayua melau song rai duik kan kandah, adei saai oh ka thau rami ramik tuk vak, nan ye bruk jak ba peih tal bac biak gleih glar. Kham nao tal dom boh sang ndom nyai, bloh bhian ieu phone, pachreih likei pasang brei duik nao bac, saai H’Hồng dok buh jien kadung tabiak blei mbut, blei tapuk siphau ka dom adei sa-ai mai bac. Var bac camereip, tal bac tok hu 8 urang. Min meng hatai khin thau cih, thau puac nan ye adei saai jak gauk mai bac, urang bac tagok tal 44 urang, dalam nan hu rilo urang umo labaih 40-50 thun. Dom urang bac kham merat yam tapa dom kan kandah ka umo thun, bruk ngak hamu puh yaok harei, piah yaok melam puac adit mai bac. Saai  Aduôn Sa Li, sa urang mai bac um ojiak 50 thun khan lac

Băng (Êđê): Kayua khin thau haroh, nan ye hulin nao bac, rilo urang nao bac song thau haroh, nan ye lin jeng nao bac. Meta lin mong oh cambaih, min kayua takre bac lo, nan ye hulin dok kham bac. Hulin umo prong ye, min nao labik ini labik deih brei thau haroh, nan ye hulin kham bac. 

 Hatai khin thau haroh piah oh nyim urang karei mbaoh tangin brei ka drei tuk nao ngak harak mesraiy jien atau nao iek ruak, tut angan ka anek nao bac, nan ye adei saai biak kham merat. Melam sup, min hu saai pok anek sit nao tal labik bac. Hu dom saai nao ngak puh mai, tahanek lisei bloh oh ka huak ye samar takai nao tal labik bac. Saai Aduôn Di khan lac

  Băng (Êđê): Ami Uyên pato oh mek jien, anai nan pato biak abih hatai. Sang anai jenmg kan kandah lo, min anai caik tuk vak piah pato haroh ka khol hulin. Nao bac thau hu rilo janih. Dahlau deih, lin oh thau sa haraoh halei, urak ni hulin thau bac, thau cih ye. Hulin biak takre nao bac. Thau dar phol Ami Uyên biak rilo

Bruk kham merat di urang prong, hu pambak tapa ka uranaih palei Phơng. Rilo anek saih tiểu học tuk melam jeng tui saai, tui amaik nao tal labik bac piah bổ túc. Tapa tal bac ni, dom anek saih tal bac 3, tal bac 4, di sang bac puac oh njauk dấu ye urak ni puac siam jang. Song bruk prong jang nan lac, tong abih adei saai kumei di palei Phơng thau puac, thau cih lagaih ka bruk ngak mbang yaok harei song bac megru hu dom kadha bahrau. Amuk Ami Lin - Akaok Kapul urang kamei xã Cư Dliê M’Nông, huyện Cư Mgar, mboh lac :

Băng (phổ thông):  Bruk saai H’Hồng  peih tal bac xóa mù chữ ka adei saai kumei dalam palei biak siam, biak hu yaom glaong ka adei saai urang kamei. Patagok ilamu siam mekre di urang kamei, paglong akaok sahaneng ka adei saai kamei. Meng hu saai  H’Hồng peih tal xóa mù chữ bo rilo adei saai dalam palei Phơng thau cih, thau puac, thau mbaoh tangin… Adei saai thau ngak harak mesraiy jien di gilang pariak sarak karja, thau tut angan ka anek nao bac, nao iek ruak ka anek.

Meng bruk xóa mù chữ ka adei saai, bo bruk urang kamei dalam palei Phơng hu rillo salih bahrau. Lingiu bruk pato akhar haroh, saai H’Hồng dok hu pablak adat hukum, an toàn giao thông tame kadha bac, pathau khan ka adei saai. Thun 2015, saai H’Hồng hu pachreih dom urang bac hu mbaok tame kadung jien patak patom ngan song yaom jien abih tih jiak 20 triệu đồng, padang “ jeik brah anit ranam” hu labaih 100 kg brah song rong pabui haluk 800.000 đồng piah dong ka dom adei saai kan kathaot, adei saai hu rai duik kan kandah.

Jiak 2 thun tapa, tal bac di saai H’Hồng jeng daok hu peih tabiak. Bruk takre bac da-a di dom adei sa-ai kumei lac pren khang piah saai H’Hồng khik ramik tal bac, pambuak song bruk xóa mù chữ, chống tái mù, ngan song bruk sinh hoạt di kapul urang kamei, khan brei thau dom ilamu ka bruk iek glang pren yava, pala drak, rong glang. Caik hatai tui pang, pachreih ba,  klah rabha dom kan kandah song pachreih adei saai kham merat yam tagok dalam rai duik, dom bruk ngak di kapul urang kamei jeng hu saai  H’Hồng peih ngak biak siam, ba mai rilo salih bahrau dalam palei Phơng.

Mboh hu dom rik dong di saai ka puk palei, bilan 12 thun 2015, saai H’Hồng Kđoh hu pilih ruah lac sa dalam dom urang di tỉnh Dak Lak nao hu mbaok di nyaom roya pakacah gauk anit ranam taneh ia pakat negar mbang 11 . Min bruk pok meyaom prong di abih di saai lac hatai anit ranam di mik va dalam palei, lac bruk salih bahrau rai duik di urang kamei palei  Phơng dak harei dak siam jang./.