Urang kumei abih hatai ka bruk xã hội

      Lac akaok dhar kapul urang kumei di ấp 2, xã Phong Phú, huyện Bình Chánh, ban raya Hồ Chí Minh, saai  Salikho, bangsa Cam tuk halei jeng abih hatai saong bruk ngak di kapul. Saai tuk halei jeng sahanneg ngak habal piah ka hội viên, urang kumei hu paglaong akaok sahneng, pasiam raidiuk. Meng nan paglaong libik dang di urang kumei dalam sang saong langiu xã hội. Kol drei nao taom gaok saong duah thau ka dom bruk ngak rilo makna di urang kumei abih hatai ka bruk xã hội ini tapa kadha “Kreih camin palei negar”

        Mai ravang saai dalam baoh sang pakat 4 saong cửa hàng tạp hóa sit, langiu bruk ngak piah duah jien tame, saai daok lac akaok dhar kapul urang kumei di ấp 2, xã Phong Phú saong gam ngak Phó Ban Mặt trận bhapbini urang Cam di ini. Saai Salikho brei thau, bruk akaok mereip bo saai sahanneg nan lac ngak habal piah thau hu dom caong khin di adei saai hội viên, pachreih adei saai khik ramik saong patagok bruk jum pataom, ba gauk dak apdang kapuk dak harei dak klhang kajap. Piah pachreih, pataom urang kumei tame kapul, saai Salikho hu nao tal sang duah thau hatai caong di adei saai piah samal pachreih ba, daong klah rabha dom kan kandah. Saai daok kham merat jak ba adei saai tame kapul, gam saong adei saai dalam Ban chấp hành chi hội peih ngak rilo bruk chreih chrai, siam mekre. Meng gheih ndom saong abih hatai, saai dak harei dak mek hu hatai jia di adei saai kumei, jeng meng di nan adei saai tame kapul dak harei dak rilo. Tal urak ini, dhar kapul urang kumei ấp 2 hu 30 urang.

     Taphia bruk ngak di kapul urang kumei, saai Salikho daok gam saong kapul dam dara ấp 2 jak ba dom adei uranaih tame mein hè di puk palei. Luac 3 bilan hè, langiu dom urang đoàn dam dara, daok hu mboh urang akaok dhar kapul urang kumei tuk halei jeng hu mbaok saong dom adei uranaih. Yaok pagaiy, saai medheih meng 5 tuk piah pato dom adei pasram thể dục, blaoh yaok melam, saai pataom dom adei di hội trường tổ dân phố, pato dom adei sram daoh, sram tamia, mein dom kadha mein mengkan, pachreih ba dom urang amaik, ame pato akhar Cam ka anek drei. Meng abih hatai yau nan, saai hu rik daong ba bruk xã hội di tổ dân phố dak harei dak patagok saong hu pakat angaok pok meyaom. Amuk Nguyễn Thị Thanh Thảo, akaok Ủy Ban bhapbini xã Phong Phú, huyện Bình Chánh brei thau :Saai Salikho lac sa dalam dom urang hadah krah dalam bhapbini Cam di xã Phong Phú saong jeng lac thành viên di Mặt trận negar  huyện. Tapa saai Salikho karja puk palei thau rilo jang ka adat cambat mengkan di bangsa Cam. Daok kapul urang kumei jeng tapa saai Salikho hu taom gaok urang kumei Cam, saai ngak bruk biak siam. 

     Gam ngak siam bruk xã hội, gam kuhria bruk ngak mbang duah jien, saai tuk halei jeng lac urang diuk, urang amaik siam mekre sangka iek glang ka sang. Sang saai thun halei jeng mek hu angan sang ilimo. Saai Salikho hu patui jalan hadah mengkan di urang kumei VN “joi bruk tanhe ia, gheih bruk sang ”./.

Thúy Linh