-Saai Huỳnh Thị Như Mai, daok di ấp Vĩnh Bình, xã Bình Giã, huyện Châu Đức, tỉnh BRVTtame kapul urang kumei xã meng thun 2015. Tuk nan, raidiuk di sang saai daok kan kandah, dua diuk pasang njauk nao ngak pah di dom apuh amraik kalu dalam palei min jien mek tame jeng oh ginup raong dua urang anek mbang bac. Hu dom adei saai dalam xã yaih khan, tacei pato jalan mesraiy jien meng kadung jien patak pataom dalam hội viên, thun 2016 diuk pasang saai khang hatai mesraiy 30 triệu đồng buh tame ngak kinh tế bein, pala dom janih njam mbang hala saong jaik 100 drei menuk. Meng thau kuhri kuhria ngak mbang, urak ini saai hu bayan abih sraiy saong blei 6 sào taneh piah pala amraik kalu, raong limo. Kuhria yaok thun hadei di tuk kaoh bloh jien buh tame ngak, sang saai Huỳnh Thị Như Mai mek tame hu jaik 100 triệu đồng: “Akaok mereip sang dahlak tok hu 6 sào taneh, hadei nan dua diuk pasang ngak kinh tế meng phun jien mesraiy, kol dahlak raong limo, pabui gam pala cà phê, amraik kalu, patagok hu 12 sào taneh saong ramik pasiam hu baoh sang laneng praong jang, hu jien  raong anek mbang bac”.

-Tok kuhria dalam huyện Châu Đức, meng akaok thun tal ini, dom pakat kapul urang kumei di huyện hu daong ka jaik 4.600 mbang hội viên mesraiy dom phun jien ye: daong urang kumei patagok kinh tế trun kathaot, ngak mbang pablei salih bhum kan kandah ngan saong kadung jien mesraiy jaik 90 tỷ đồng. Ini lac lac sa dalam dom puk palei nao dahlau dalam bruk peih ngak đề án "Daong urang kumei ngak mbang tukvak 2017-2025". Tui amuk Vũ Thị Sen, akaok kapul urang kumei huyện Châu Đức, anak tal kapul meda sangka peih dom tal pasram pato alamu kỹ thuật ka hội viên pandar tame ngak, pala drak, raong glang, pambak praoing dom adei saai hadah trah ka bruk ngak mbang: “Tukvak tal, meda pataom tame dom bruk yau daong phun, anek pajaih meng bruk jak ba mạnh thường quân piah daong blei anek pajaih. Bruk ngak ini patagok hu kein laba biak glaong kayua drei blei anek pajaih daong ka hội viên urang kumei urang raong glang, meng raong glang urang meng patagok kinh tế sang”.

-Oh lac di bhum palei pala bo libik đô thị yau ban sit Vũng Tàu, ban sit Bà Rịa…bruk urang kumei padang mbang ngui jeng tagok hu kein laba. Saai Nguyễn Thị Yến, phường 1, ban sit Vũng Tàu khan lac, dahlau diah raidiuk sang biak kan kandah, dua diuk pasang gam ngak phụ hồ min oh ginup piah kuhri kuhria ka raidiuk saong raong dua urang mbang bac. Thun 2012 tuk hu kapul urang kumei phường daong, yaih khan ka saai Yến mesraiy 35 triệu đồng oh mek laba, saai buh jien tame peih quán cà phê dalam palei. Urak ini, raidiuk sang saai Yến hu tani tanat, paok jien mesraiy hu bayan abih ka tổ patak pataom, praong di abih dom urang anek hu nao mbang bac oh daok huac klak meteh dhi: “Nao ngak bruk xây dựng biak rambah, kapul urang kumei hu daong brei mesraiy jien pablei salih hagait nan ka nyun nyac, dahlak pablei cà phê meng nan tal urak ini. Yaok harei pablei cà phê rilo tuai damuai, mek tame hu 6 – 7 ratuh rabau, joa tuai damuai lac  4 – 5 ratuh min raidiuk jeng mbuan sahanang. Urak ini tani tanat paje, oh mesraiy jien veik, urak ini hu urang kumei halei kan kandah duk saong drei lac drei daong adei saai nan”.

-Meng rilo phun jien karei di gauk, dalam 9 bilan thun 2018, dalam tỉnh BRVT hu jak ba,  kapul urang kumei dom pakat jak ba hu jaik 850 tỷ đồng daong ka jaik 67.700 mbang adei saai kumei mesraiy piah pablei salih ngak mbang. Amuk Nguyễn Thị Lâm, akaok kapul urang kumei ban sit Vũng Tàu brei thau, tal urak ini hu labaih 12 tỷ đồng hu jak ba saong daong ka 3.000 adei saai hội viên kathoat hu mesraiy oh mek laba. Lingiu nan, yaok pluh rabau adei saai di dom xã phường daok mesraiy phun jien meng gilang pariak sarak karja ngan saong paok jien labaih 192 tỷ đồng buh tame pablei salih sit, pablei salih pandap mỹ nghệ, tạp hóa: “Moang tui bruk di yaok puk palei bo pandar, hu dom cơ sở oh lac 5 rabau bo lac 100 rabau đồng/sa urang sa bilan padang dom kapul patak pataom daong gauk. Thei caong khin daong dahlau lac adei saai daong dahlau. Di ban sit Vũng Tàu lac buh tame sa mbang sa triệu, daok 100 rabau đồng lac adei saai buh dahlau ginup sa thun. Phun jien ini hu adei saai khik veik piah payeng brei nyim.

-Anak tal, Hội Liên hiệp urang kumei tỉnh Bà Rịa - Vũng Tàu meda pataom tame bruk daong piah ngak ka pahu dom bruk tamuh tabiak meng hatai caong khin di hội viên. Lingiu di nan, kham merat duah phun jien meng dom dự án; sarak ka bruk padang mbang ngui piah hu jalan daong siam hu trọng tâm, trong điểm ngan saong yaok kapul nyaom cambaih laih, piah paglaong kein laba ka urang kumei padang mbang ngui hu khang kajap./.