Sa-ai Sa Y Dah ndih tapui thun 1983 di ban raya Hồ Chí Minh dalam sa baoh sang urang Chăm kan kathaot hu asal mai meng bhum palei tỉnh An Giang. Dahlau di tuk jeng doanh nhân ngak mbang pablei salih khan ao Cam Islam, Sa Y Dah ngak đầu bếp sa quán mbang ka urang Islam Malaysia,  bloh ngak lễ tân ka sa  hotel hu angan di Bei Gon. Bruk ngak mbang di Sa Y Dah hu peih taniak meng bruk pilih ruah khan ao Cam Islam ka tuai Malaysia. Bruk naih gheih ka thời trang Chăm Islam di sa-ai hu mblo tabiak. Tal thun 2010, sa-ai Sa Ydah yam tame bruk ngak mbang gah khan ao Cam meng bruk taduan ngak 2.000 baoh kapiah tuak ka urang likei Islam. Hadei di nan, sa-ai pah labik pablei sit sit dalam darak Bến Thành, pablei di tuk melam. Pandap di sa-ai hu rilo janih bingu la biak gheih: hu janih hu bingu la bak angaok mbaok tanyiak, hu janih hu bingu la patui rak merai, jeng hu bingu la thaik binguk ine girai, thaik binuk ia bulan, saong dom janih karei karei…oh yau dom janih pandap di dom labik pablei karei karei. Oh padeih di labik ngak dom pandap meng kan, sa-ai Sa Y Dah daok duah thau dom janih bingu la bahrau piah ba tame pandap di drei, piah pabak hatai takre di tuai damuai. Dom janih pandap di sa-ai ngak tabiak, mboh biak mekre saong hu rilo janih yau ye: telekung – khan ao cuk samen di urang Islam, kapiah, khan, ao, tanyiak… Dang anak yaok ribau janih pandap di sa-ai, takik mboh pandap halei yau gauk ka bingu la, kayua yaok janih pandap jeng hu sa-ai sahneng duah jalan ngak karei di gauk, nan ye pandap di sa-ai hu dom cửa hàng, labik pablei pandap lưu niệm blei piah pablei veik ka tuai damuai.  Tapa nan, rilo tuai thau tal pandap di sa-ai, nan ye jien mek tame dak harei dak glaong. Hu labiah jien ndo, sa-ai blei veik cửa hàng praong di darak Bến Thành saong caik angan lac Abul Aziz saong Saedah. Lingiu di nan, sa-ai Sa Y Dah daok ngak pô dom pô shop karei tra.

Tapa rilo thun peih praong bruk ngak mbang, cửa hàng khan ao Cam Abul Aziz saong Saedah  yaok thun mek tame hu jien tỉ. Sa-a Sa A Dah hu ba bruk ngak ka 10 adei sa-ai kumei, yaok urang yaok bilan hu meng 4 tal 5 triệu đồng.

Tuk bruk ngak mbang hu jak jeng, sa-ai Sa Y Dah buh jien tabiak nao tapa dom negar yau Malaysia, Ấn Độ, Campuchia…piah hu mbaok tame nyaom darak, parang iek, yaih khan dom janih pandap di drei, saong bac megru jalan ngak mbang. Tapa nan, rilo hợp đồng yaom yaok rituh triệu đồng hu mbaoh tangin pambuak bruk. Sa-ai Sa Y Dah brei thau:dom thun jaik di ini, bruk kinh tế kan kandah, min meng hatai kham merat, sa-ai tuk halei jeng hu jalan ngak cambaih laih, nan ye khik hu tani tanat bruk pablei salih, peih praong darak pasar.  Nan ye bruk  ngak mbang di sang sa-ai tuk halei jeng khik hu tani tanat saong cakrok patagok, thun hadei glaong jang thun dahlau.: " Anak tal, hulin kham ngak habar hu rilo janih pandap birau piah hu rilo tuai palei langiu takre mai blei gam piah yaih khan ka khan ao Cam palei Viet Nam ini ka urang negar langiu thau rilo, tap daong khin ramik ialmu bangsa drei"

Oh lac ngak siam bruk pablei salih, cửa hàng khan ao Chăm Abul Aziz saong Saedah daok hu karja palei taong yaom lac ngak siam dom bruk xã hội yau bruk daong ka urang kan kathaot, urang jaoh jo.…Ong Karim, sa urang dalam Mban Quản trị Surao Islam phường 17, quận Phú Nhuận, ban raya Hồ Chí Minh brei thau: " Sa Y Dah nan lac urang gheih daok dang saong puk paga, tuk ngak ngak mbang hu daok thau daong ka urang kan daman, kan kathaot..."

Piah hu yau nan, tuk halei dalam hatai di sa-ai jeng sahneng lac: “Oh hu bruk hagait kan, tok huac hatai oh khang”. Meng naih gheih saong meng hatai kham merat oh thau glaih glar, sa-ai Sa Y Dah saong dom urang ngak di cửa hàng khan ao Cam  Abul Aziz saong Saedah daok ngak tabiak dom janih pandap ndung bak ilamu meng kan, rik daong ka bruk ba khan bai Cam Nam bộ par atah./.