Urang kumei Dao rilo nghi luc

          Ndih tapui thun 1988 di palei kathaot Bó Mi 1, xã Tân Phượng, huyen Lục Yên, tỉnh Yên Bái, saai Trịnh Thị Thành tuk 4 thun metui amaik blaoh, 12 thun metui ame. Meng ini, saai njauk klak bac gam saong ông muk Nội prong thun tagok puh trun hamu duah mbang tapa harei.

      Thun 2006, saai Trịnh Thị Thành khing saai Trịnh Tiến Hiến urang daok gam palei. Metui meng tuk daok sit, saai thau ka bruk glaih glar di eik lipa, kathaot rambah. Yau nan ye meng tuk barau khing gauk, diuk pasang saai meng ba gauk tame ngak kinh te. Pak halei hu mô hình gheih, lagaih saong bruk di sang ye saai bac megru ngak tui. Saai Trịnh Thị Thành khan lac : Maong pak libik karei urang pala krem rabung hu rilo jien lo, drei nao bac megru mai piah ba tame pala di dom mbon ceik, plah patau oh pala hu dom janih phun karei. Dahlau thiah tuk daok ngak hamu, yuak padai lac oh nao halei duah jien hu rambah rilo, tukvak ini hu rabung paje, drei tok mek rabung mai pablei lac hu jien paje.

        Langiu di 200 phun krem libung mai jien mek tame jaik 25 triệu đồng yaok thun, urak ini sang saai Thành daok raong 3 drei kubao, 10 drei pabui lai yaok lứa. Sang saai jeng peih quan pablei tạp hóa, pablei vật tư ngak nong yau khak drak, jru khik caga phun pala, tangei pajaih ka mikva dalam bhum piah patagbok jien mek tame. Saai Thành Lac : jalan nao darak blei sara, bột ngọt biak atah saong kan si nao; dom urang anek bhian mbang han keo veik nao biak kan landah. Yau nan ye dahlak  peih quan pablei tạp hóa, ka sa lac duh ka drei; ka dua lac piah ka mikva  tuk abih sara, bột ngọt oh njauk nao tal darak atah piah blei.

Oh lac tari taring bac megru, kham merat patagok kinh te, saai Thành daok nao dahlau dalam bruk bac megru saong peih ngak dom mô hình barau kayua kapul urang kumei dom pakat ba tbaiak ye : mo hình raong pabui, ngak lubang hareik hacih saat. Saai jeng abih hatai pataom tame dom bruk ilimo, padhih di puk palei, lac urang di kapul bóng chuyền kumei, kapul văn nghệ palei. Ông Bàn Trung Kiên, akaok palei Bó Mi 1, xã Tân Phượng, huyện Lục Yên, tỉnh Yên Bái brei thau: (Sang saai Thành meng tarieng ngak mbang thau pandar alamu kỹ thuật tame salih phun pala, kaya raong , meng di nan sang hu patagok jang. Urak ini, sang saai Thành njauk ndom lac sa dalam dom sang hadah trah di palei, lac kreih caim piah adei saai bac megru.

Tari tarieng bac megru saong ngak tui, meng sa anek naih metui kathaot tui ông amuk nao duah mbang tapa harei, urak ini saai Trịnh Thị Thành hu jien mek tame jaik 100 triệu đồng sa thun. Ini lac paok jien oh sit di sa palei bhum glaong hu jaik meteh sang kathaot.

       Meng paok jien mek tame ini, saai ngak hu baok sang praong, laneng  yaom jaik 500 triệu đồng, raong pato dua urang anek siam jang. Dom panap ye radaih patuh, tivi, tử la ar, máy giặt hu blei ginup. Saai Thành brei thau,  daok kham merat piah raidiuk ginup meda jang, taphia nan saai halan hatian taceo pato alamu di drei ka abih urang, abih di nyu nan lac dom adei saai kumei bhum glaong. ./.