Sa-ai Nguyễn Thị Bình ( gah hanuk) hu 40 mbang halan hatian brei darah di Bình Phước

Ndih tapui tabiak di Thanh Hóa, thun 1984, sa-ai Bình tui amaik ame tame Bình Phước diukrai. Hadei di tuk tok pasang padang mbang ngui, sa-ai ngak công nhân di Công ty TNHH sa thành viên cao su  Phú Riềng saong urak ini peih hưu blaoh. Luac 26 thun ngak bruk dalam gah cao su, sa-ai tuk halei jeng kham merat ngak, sahneng duah piah ngak siam bruk di drei, rilo mbang hu Công ty meyaom brei angan lao động tiên tiến, ngak bruk naih joi. Abih di nyu lac, sa-ai hu Mentri Ngak nong saong patagok palei pala dua mbang meyaom alin brei kỷ niệm chương kayua hu rilo daong ka bruk patagok gah ngak cao su.

Hadar veik mbang akok meti nao brei darah di thun 2007, sa-ai khan lac: “Dahlak daok hadar miat, baoh hatai megei samar mboh huac hasit kayua oh thau rup drei ginup prein khang piah brei darah ha-oh, brei darah blaoh prein yawa hu hagiat ha-oh? Min hadei di mbang nan, dahlak mboh prein yawa khang kajap, mboh biak bui sambai kayua bruk drei ngak hu rik daong ka urang ruak caong hu darah yam tapa tuk kan kandah mbuan metai, nan ye kak kajap meng nan mai”. Meng nan, yaok mbang Kapol Chữ thập đỏ huyện Đồng Phú peih bruk brei darah ngak pahala, sa-ai Bình jeng hu mbaok tame ginup.

  Oh lac hu mbaok tame brei darah, sa-ai Nguyễn Thị Bình tuk halei jeng kham merat jak ba, pathau khan urang dalam sang, gauk gar jeng yau mikva puk paga nao brei darah.Urak ini, sa-ai jak ba hu pasang, 3 adei likei, sa adei thang kumei saong rilo urang karei brei darah gam gam. Sa-ai Nguyễn Văn Hải, ndih tapui thun 1988, adei likei di sa-ai Bình brei thau: “ Sa-ai Bình hu mbaok tame rilo bruk ngak pahala, abih di nyu lac rilo mbang brei darah. Mboh bruk ngak hu makna  nan ye dahlak jeng ba drei tame brei darah. Tal urak ini, dahlak alin brei hu 8 mbang saong daok tui bruk brei darah daong menuac”.

Meng hatung hatian anit ranam anek menuac, sa-ai Bình daok brei hu mbaok tame Kapol urang ngak pahala Tùy Tâm. Tal urak inii, kapol pachreih hu 70 urang tame. Bruk ngak di kapul lac pathau khan jak ba urang rik jien tame daong tahaneh lisei ka urang ruak hu raidiuk kan kathaot di Sang iek ruak đa khoa tỉnh atau daong dom urang rambah rambeip, metui medhar…

Dom bruk ngak ndung bak hatai anit ranam di sa-ai Nguyễn Thị Bình hu rik tame bruk pathau khan, pato pakai jalan sahaneng, bruk ngak di yaok urang piah daong ka manuac sia. Sa-ai hu UB bhap bini tỉnh 4 mbang brei harak meyaom, rilo mbang hu UB bhap bini huyện Đồng Phú saong UB bhap bini xã Đồng Tâm alin harak meyaom kayua hu rilo mbang halan hatian brei darah daong menuac.

Muk Đinh Thị Ca, Akok Kapol Chữ thập đỏ huyện Đồng Phú, tỉnh Bình Phước brei thau: “Sa-ai Nguyễn Thị Bình lac kareih camin hadah dalam bruk halan hatian brei darah. Yaok thun, Kapol Chữ thập đỏ huyện hu peih 3 mbang brei darah ye sa-ai Bình jeng hu mbaok ginup. Langiu di nan, tuk halei sa-ai jeng halan hatian brei darah ka rilo urang ruak kan daman”. Sa-ai hu UB bhap bini tỉnh Bình Phước meyaom lac kareih camin tiên tiến dom bhap bini ndih tapui thun 1975 hu rik daong rilo ka xã hội di tuk pahadar 45 thun Harei peih paha gah meraong negar, yasa taneh ia./.  

Urang lang: Aí Nghiêm  11/5/2020