Saai Cà Thị Hoan menek tabiak saong praong tagok dalam sa sang hu ilamu cuak ariya, paneh kadha daoh bangsa Thái di sa  bản bhum glaong Thuận Châu, tỉnh Sơn La. Ame di saai lac aruah (cố) nghệ nhân Cà Văn Xôn saong Cei lac Cà Văn Cón, lac urang paneh  dom kadha daoh bhapbini, trường ca bangsa Thái. Meda lac kayua yau nan bo meng sit saai biak takre cuak ariya, paneh kadha daoh bangsa. Thun 1993, bac bloh sang bac Cao đẳng Sư phạm Sơn La, saai Cà Thị Hoan hu pilih ruah tame ngak biên tập viên di mBan văn nghệ rayo paparsap papar binguk tỉnh Sơn La. Labik ngak bruk nyu daong ka saai lagaih piah tui hatai takre di drei. Piah hu dom kadha gheih, saai caik tukvak trun puk palei, duah thau sap ndom panuac puac, adat cambat tanarakun di rilo puk palei, hadei di nan pataom veik jeng sa kadha lambaok ka abih bhum palei. Meng bruk dalam raidiuk yaok harei saai ngak jeng ariya, panuac “ khắp” mbang tame hatai menuac. Asal kadha ka Đảng, Wa Hồ, ka taneh ia, anek menuac saong bhum palei Sơn La tuk halei jeng mboh dalam dom kadha di saai yau ye trường ca “ Tình yêu nơi biên giới”; “hadar harei Wa mai ravang”; “Trường ca Điện Biên”; Kịch truyền thanh hu: “Ka jalan menyek harei hadei di negar”; “Saai Pành cai jru  phiệl” .... 

Saai Quàng Văn Chương, xã Chiềng En, huyện Sông Mã tỉnh Sơn La, urang takre pang dom kadha daoh bhapbini di saaai Hoan paneh, brei thau:“ Adei bhian pang danakdak daoh kadha daoh bhapbini Thái, kadha daoh bhapbini di saai Hoan paneh adei biak takre, dalam sang adei thei jeng takre. Yaok harei adei saong sang di drei bhian pang rayo, harei adit tal tukvak lac adei padheih bruk mai sang piah pang danakdak.

Oh lac paneh dom kadha daoh, kịch bangsa Thái, saai daok lac Biên tập, lang dom kadha bhap bini saong ngak danakdak daoh tamia di rayo paparsap papar binguk tỉnh Sơn La meng papar sap tal papar binguk. Ngan saong saai, ngak danakdak tabiak njauk hu mikva pachreih tui saong pabak hu caong khin di mikva. Yaok harei, danakdak di saai taduan hu yaok pluh mbang phone di urang pang rayo meng dom libik ieu mai, oh ta-eng tỉnh Sơn La bo dom tỉnh saong dom puk plei taneh ia Lào libik hu rilo bhapbini Thái daok. Hu urang pang, urang maong rayo caong pang veik dom kadha daoh bhapbini Thái bo drei takre, min jeng hu biak rilo urang caong khin saai paneh dom kadha daoh piah saai ndom tagok hatai di dom urang nan. Meda ndom tal: kadha “urak kumei urak ini”; “ 2 urang amaik”; “harak meyut meyau payua ka saai libik biên giới”,  “urang kumei Châu Yên”... Gam saong nan lac bruk biên tập dom kadha daoha, kịch di nghệ nhân dom bhum payua mai ka danakdak. Ông Tòng Văn Xôm, urang dahlau diah ngak bruk saong saai Cà Thị Hoan daok brei thau lac : Saai Hoan dalam tuk ngak bruk saong gauk tuk halei jeng jum pataom saong adei saai, ayut sahabat, abih hatai saong bruk ngak. Pagap ye thơ, văn kịch jeng hu pataom mbaok tame saong mek hu giải dalam dom mbang pakacah di tỉnh, di ngành saong trung ương. Saai biak sami samal saong tuk halei jeng ngak siam bruk hu jao brei.”

Kuhria tal urak ini, saai Cà Thị Hoan paneh hu jaik 200 tác phẩm ca, kịch. Dalam labaih 30 kadha di saai mek hu dom giải karei di gauk dalam dom mbang pataom papar sap, papar binguk dom thun tapa, hu 01 kadha mek hu giải nhất ka alam môi trường kayua Hội Văn học Việt Nam peih tabiak, 2 kadha mek hu giải nhất ka bac megru saong ngak tui jalan hadah trah siam mekre di Hô Chí Minh. Meng dom bruk ngak hu, saai Cà Thị Hoan hu Hội Nhà văn Việt Nam, rayo sap ndom Việt Nam, rayo papar binguk tỉnh Sơn La, Uỷ ban bhapbini tỉnh Sơn La alin rilo harak meyaom. Dom bruk ngak abih hatai di saai hu daong ngak brei phong phú jang kho tàng ilimo dom bangsa Việt Nam.  Caong khin di saai lac ngak habal piah khik saong pato alamu ka rairah ranaih umo, urang patui veik. Ngan saong urang pang, urang maong rayo Thái Sơn La, biên tập viên Cà Thị Hoan njauk lac urang kumei ngak báo di palei negar./.

Thúy Linh