Sa-ai Y Lợi, ndih tapui thun1985, bangsa Xơ Đăng, daok di xã Ngọc Wang, huyện Đắk Hà, tỉnh Kon Tum, tuk menek tabiak lac sa urang oh patuah kayua njauk jaoh jo. Sang hu 9 adei sa-ai,, rai diuk kan kandah,  bruk ngak mbang duah jien mbang huak, ngui cuk kateik trak tagok dua gah di amaik ame. Min oh lac yau nan bo sa-ai Y Lợi taduan lah thar vak, bo sa0ai tuk halei jeng kham merat yam tagok, ngak ralo bruk hu kein ka drei saong ka rahra.

     Bac bloh tal 9, Y Lợi njauk padeih bac daok di sang daong amaik ame. Tuk halei sa-ai jeng mboh melau tuk manuac urang mong tame drei saong oh khin ndom biai haong thei.  Meng hatai sahneng “Jaoh jo min klaak saoh”, meng hatai kham merat yam tapa pandik harao, thun 2005, Y Lợi likau nao bac  jhik, min urang bac takik, nan ye tal bac oh hu peih hu, hadei di nan sa-ai likau nao bac bruk văn thư lưu trữ di Pasak pato bruk ngak tỉnh Kon Tum.

      Sa-ai brei thau: “Bac tamat bloh, mai palei haong blah bằng trung cấp nghề dalam tangin, dahlak oh thau ngak meng halei, ngak yau habar? Dahlak biak duh hatai, kayua lac sa urang khang kadang mboh daok kan, ndom hagait tal urang jaoh jo”.

Hu bruk pachreih ba di amaik ame adei sa-ai dalam sang, sa-ai ngak hồ sơ nộp tame UB bhap bani xã Ngọc Wang. Harei pan quyết định taduan tame ngak bruk di UB bhap bani xã, sa-ai biak drut droi. Sa-ai hu brei bruk ngak di Văn phòng Đảng ủy. Piah paglaong ilamu ngak bruk, thun 2008, Y Lợi hu Đảng ủy, Karja brei nao bac tal sơ cấp lý luận chính trị. Thun 2010, sa-ai hu pilih ruah tame Hội đồng bhap bani xã saong tal thun 2011, sa-ai hu tame Đảng. Thun 2013, sa-ai  pakacah đậu tốt nghiệp THPT. Dalam luac tukvak bac megru, ngak bruk di drei, Y Lợi tuk halei jeng ngak siam bruk di drei saong hu pok brei ralo harak meyaom di dom pakat, dom ngành.

       Kayua mặc cảm, nan ye dalam ralo thun sa-ai oh sahneng tal hagait karei lingiu bruk ngak, var klaak bruk duah ka drei sa urang pasang likei. Bloh patuah jamo sa mbang tra hu mai haong sa-ai Y Lợi, sa-ai gaok pasang tuk sa-ai tui kapul urang jaoh jo di tỉnh Ninh Bình mai parang me-in pak xã di drei. Tuk sa-ai pok sap daoh kadha daoh “Tình cây và đất”, sap daoh lai li-an ngak ka sa-ai mboh megei baoh hatai. Tapa dom tin nhắn nao mai, dua sa-ai anit gauk tuk halei oh thau. Mbiah tal urak ini sa-ai jeng oh van hu harei sa-ai sua tangi: “Ngak diuk sa-ai nye, adei”. Hu  amaik ame dua gah njauk hatai, dua sa-ai mai daok haong gauk. Thau ka bruk kan kandah di dua diuk pasang, Liên đoàn Lao động huyện hu daong ka diuk pasang sa-ai padang ngak sa baoh sang pakat 4 piah grap tanat rai diuk.

      Kayua jien bilan takik, oh ginup ka rai diuk, dua diuk pasang sa-ai nao pah taneh pala bei plom saong peih quán pablei pandap. Pasang sa-ai oh nao hu radaih patuh, nan ye meng 4 tuk paghe, sa-ai medeih tagok nao mek pandap saong srap gap taong abih bruk brei pasang  daok di sang pablei pandap. Haniem phol hu mai tal diuk pasang sa-ai tuk hu sa urang anek kumei khang kadang di thun 2012.

       Yam tapa thar vak di drei, sa-ai Y Lợi lac kareih camin hadah piah ka dom urang kan kandah yau drei kham merat yam tagok. Sa-ai ndom lac “Pabah mbang rai diuk oh kareik veik ngan haong dom urang thau yam tapa thar vak, thau kham merat yam tagok, oh huac hagait dom cuang kandah gah anak. Tuk halei jeng chreih chrai, bui sambai, khaol drei meda ngak hu dom bruk, dom kadha bo drei caong khin”./.