Urang kumei huyện Châu Thành parang bruk “ngak brei nerak jeng jien”

Tal biar harei 19 yaok bilan, dom kapul adei sa-ai kumei bak mbao, pan kadung caik nerak vô cơ pataom gauk di labik ginum biai me-in sambai di bhap bini palei Phước Thuận, xã Phú Tân, huyện Châu Thành piah pablei. Amuk Triệu Thị Vui brei thau, dom janih nerak vô cơ yau klaok ia yamen, klaok sabon raco akaok atau dom dom mbaik nhôm, katak… pandar blaoh, meda pablei ve chai hu, jeng hu dom adei sa-ai pataom mai caik di sa labik. Jien pablei hu meng nerak ini hu buh tame phun jien brei adei sa-ai nyim ngak phun atau padang kadung jien patak pataom.

Daok di kalup kapul “Pataom mek nerak vô cơ piah padang kadung jien” di urang kumei palei An Trạch, xã An Hiệp, huyện Châu Thành, tỉnh Sóc Trăng, yaom lac bahrau padang hu jaik 1 thun min ngak bruk hu siam lagaih. Sa-ai Thạch Thị Saly daok di palei An Trạch brei thau: “Tuk tame kalup kapul, kol dahlak thau hu rilo janih, thau parabha nerak, thau khik ramik haci hacih vil val sang, khik ka sang danoak, labik daok hu hijao, hacih, mekre. Jien pablei ve chai ye adei sa-ai rik pataom veik piah yaok bilan urang kumei halei gaok kan kandah ye brei nyim piah yam tapa tuk kan kandah”

Yaok bilan, yaom lac yaok urang pablei nerak tok hu meng10.000 đồng tal 20.000 đồng atau rilo di abih jeng lac 40.000 đồng, min adei sa-ai jeng daok kham merat hu mbaok tame oh lac kayua jien bo praong di abih lac sang danaok, labik daok oh njom nerak tachauk. Yaom jien pablei hu, yaok sa-ai khik veik 10.000 đồng piah patak pataom atau piah ngak phun daong gauk, daok veik yar ka akaok dhar kapul khik piah. Puac thun yaom jien ini hu bayar veik ka adei sa-ai.

Tal urak ini, bruk “ngak brei nerak jeng jien”, “pataom mek nerak piah padang kadung jien” hu mbaok di dom palei Phước Thuận di xã Phú Tân saong dom palei An Trạch, Bưng Tróp haong palei Giồng Chùa A di xã An Hiệp, palei Mỹ An di xã Thiện Mỹ... Bruk ngak ini hu ngak brei salih bharau biak siam hatai sahneng di adei sa-ai kumei bhum palei pala dalam khik caga alam môi trường. Sa-ai Phạm Thị Ngọc Bích, akaok kapul urang kumei xã An Hiệp, huyện Châu Thành brei thau: “Tapa kalup kapul hu daong ka adei sa-ai kumei thau parabha nerak hữu cơ saong vô cơ, thau mek nerak hữu cơ ngak khak piah buh ka phun. Taphia di nan lac adei sa-ai kumei thau pathau khan brei mikva dalam palei saong gauk gar dalam sang thau”.

Thun 2014, bruk “ngak brei nerak jeng jien” di Kapul urang kumei tỉnh Sóc Trăng hu pilih ruah piah pathau khan dalam Nyaom biai yaok thun bhum Tapen tasik mbang ka III di Campuchia haong Thái Lan kayua Kapul khik ramik langik tasik pakat negar peih tabiak. Meng nan, kapul urang kumei tỉnh Sóc Trăng brei pambak praong, patagok bruk ngak ini. Bruk “ngak brei nerak jeng jien” daok hu daong salih jalan sahneng di bhap bini ka khik caga alam môi trường, rik daong patrun kanjah jhak di nerak tachauk bhum palei pala./.

Urang lang: M. Phương – 05/12