Urang Laow nao main Tết di angaok jalan 

Dalam chreih chrai, bak menuac nao mai di drak Châu Đốc lac sa labik joa lange angan  Quan Đế miếu, labik bhap bini urang  Laow  pak ni mong lac labik khik ramik ilamu di drei. Khol hulin taom gaok  ong Hà Nhi (urang dahlau deih ngak Chủ tịch Hội Tương tế urang laow  Châu Đốc), piah pang ong khan ka bruk raok  Tết di sang drei song di mik va.

Ngan saong ong, Tết Nguyên đán lac tuk piah ka anek taco mai pataom gauk, tadhau yuh pren yava ong muk song bui sambai haong gauk gar, pamong tal sa thun bahrau biak patuah jamo, siam mekre song ginup meda. Ong Hà Nhi brei thau, Bhap bini urang Laow di  Châu Đốc urak ni hu labaih  300 boh sang, hu dom bangsa lac: Tiều, Quảng, Hẹ, Phúc Kiến, Hải Nam, dalam nan urang Tiều lac rilo di abih. Yaom lac  parabha tabiak dom Hội đồng hương dalam bhap bini urang Laow, min urang jeng hu sa tín ngưỡng, sa hatai jia song cong khin hu duik rai siam mekre, jum pataom hong urang Yuan pak ni, rik dong dak padang palei Châu Đốc dak harei dak kaya meda.

Gam ndom biai song khol hulin, ong Hà Nhi gam maong tapa dom phun mai taha dalam bien Quan Đế miếu, dahlau di nan dom harei hu dom like  urang Laow  cakak  dom hala piah caga raok thun bahrau. Ong Hà Nhi khan lac, urang Laow  jeng hu “ba  patao Ging tagok langik” di harei  23 bingun bilan mat. Pandap pok kakuh piah palao ba tui yaok boh sang, min oh praong rilo. Harei  24 bilan mat, bhap bini urang Laow di  Châu Đốc ba gauk mai di  Quan Đế miếu pok kakuh likau siam mekre salamat dalam thun bahrau. Ni lac tuk piah ka abih gauk mong iek veik dom bruk ngak hu dalam thun song likau dom bruk siam mekre dalam rai duik ka rup drei song ka boh sang. Hadei di nan, mikva pataom gauk mbang menyum me-in sambai salam uan thun bahrau  piah kak kajap talei jum pataom, dong gauk dalam bhap bini ..

Dak jiak tal Tết, urang Laow dak jar var  hong bruk pablei salih , min urang jeng caik tuk vak rami ramik sang danaok ka hacih saat, siam mekre. Tui adat cambat meng kan mai, urang raok muk kei mai mbang Tết hong anek taco di harei 30 bilan mat. Anak papan kakuh muk kei , mik va am gilau pahe likau ka sang danaok siam mekre, anek taco ngak mbang hu ginup meda dalam thun bahrau. Di sa labik ginreih karei, urang jeng am gilau pok kakuh Quan Thánh Đế Quân song cong khin po yang ini dong ka rai duik di abih menuac boh sang , abih di nyu lac piah patao pakai  anek taco tapak tapaiy dalam bruk ngak song rai duik .

Dalam tuk diukrai haong gauk angaok bhum taneh Châu Đốc, An Giang, bhap bini urang Laow jeng hu njom ilamu  Việt nan ye Tết Nguyên đán di urang jeng hu har pei nung, rilaow kho tapen dom janih pandap mbang meng kan. Langiu di nan, urang jeng hu nao baha  lễ Phật song tal  Quan Đế miếu likau dalam dom harei akaok thun.  Ong Trần Bỉnh Hòa (sa urang dalam mban khik ramik Quan Đế miếu) dalam dom harei puac thun klaak, akaok thun bahrau biak jar var taduan raok tuia mai kakuh Quan Thánh Đế Quân. Ong Hòa brei thau, nan lac adat cambat di urang Laow, urang mai likau dom siam mkere ka thun bahrau song pok kakuh “trả lễ” đức Quan Thánh ka dom bruk drei cong khin dalam thun klak  .

Langiu di nan, Ban Khik ramik  Quan Đế miếu jeng hu peih bruk jao pok jien bac  ka anek kamuan urang Laow  bac da-a naih joi  yaom jien dong  2 triệu đồng/sa pok, piah pachreih hatai kham merat di rai rah ranaih umo, pachreih anek kamuan kham merat angaok jalan bac daa. Dalam ilamu urang Laow, bruk yau Yuan lac “Tích cốc phòng cơ - dưỡng nhi đãi lão” hu jeng sa janih ilamu karei, pato pakai dom rairah ka bruk patak pataom, tari tareing ngak bruk, anit ranam amaik ame, ong muk, nan lac kadha bo dom urang prong thun dalam sang ndom nyai song anek taco dalam dom harei akaok thun bahrau. 

Dom harei akaok thun, dalam khan aow meng kan di bangsa drei,  mik va urang Laow  nao tadhau ayuh ka gauk  dom kadha hu makna, siam mekre di abih ka 12 bilan gah anak. Saong bruk urang cong khin di abih lac hu mong mboh anek taco jak jeng, rik dong tame bruk patagok di ban sit Châu Đốc, An Giang, piah ka taneh ia tapa yaok bilan xuân dak kaya meda, hadah hadai./.

Urang lang: Hanipha -20/1