Bac tamat Đại học, hu bruk ngak tani tanat, min meng hatai caong saong kham merat ngak kaya meda meng bhum taneh palei drei, urang likei dam 8X Phan Thanh Sang daok di P9, ban Đà Lạt, tỉnh Lâm Đồng hu kak kajap saong bruk pala bingu, pablei salih bingu, hu jak jeng tuk umo daok ranaih saong yaom jien mek tame dom tỷ đồng sa thun. Sa-ai lac sa dalam 10 urang Viet Nam daok ranaih umo hu pok meyaom di Ha Noi birau ini.

     Ndih tapui thun 1984, bac tamat kỹ sư nông ngiệp, Phan Thanh Sang palih ruah jaln ngak kaya meda meng bruk lagaih ralo di Đà Lạt, palei ribau bingu di bhum pasai di sa-ai. Meng taneh di sang drei, sa-ai padang ngak trang trại bingu lan.

Sa-ai Sang khan lac: Sang sa-ai pala njam palei la-ar min meng tuk daok sit sa-ai tok takre dom yot bingu lan. Tuk camereip padang mbang ngui sa-ai tok hu 50 phein bingu phong Lan, oh hu ralo phun jien nan ye sa-ai pablei salih sap janih phun bingu cảnh karei piah duah jien buh tame ngak mbang. Thun 2007, sa-ai buh tame 200 triệu đồng piah padang duk ngak iek raong pabam mô thực vật. Meng duk ngak iek ini, sa-ai Sang brei tabiak 100 janih Lan quý, dalam nan hu 10 janih Lan mbang camereip hu mboh, lingik yau habar jeng diuk hu, nyu hu sambo màu biak mekre, saong daok mbau pahe tra. Sa-ai Phan Thanh Sang khan lac:

"Biak di nyu nan lac bruk takre, meng tuk daok bac pakat 2 ye dahlak takre bingu Lan paje, tuk nan daok pala bingu lan di taneh, saong pala di taneh jeng diuk hu. Min tuk dahlak pakacah tame đại học thun 2003 ye dahlak kham merat gam bac gam ngak piah hu ilamu saong tapa nan pataom hu hasit jien ndo piah tal tuk bac tamat meda peih hu duk ngak iek piah lai pajaih. Yau dom ayut hu thau phun pajaih hu makna biak praong bo taneh ia drei lac taneh ia ngak nong yau nan ye khol drei njauk ngak tabiak pajaih."

Oh njauk hatai haong bruk pablei salih janih Lan hu blaoh di drei, sa-ai Sang nao negar langiu blei dom janih Lan mai pala, eng drei duah pabam pajaih birau hu yaom glaong jang, lagaih saong langik tasik Đà Lạt. Sa-ai peih praong bein bingu Lan tui jalan ngak nong hacih, sinh thái gam saong ilamu công nghệ glaong. Langiu di peih praong bruk pala bingu Lan, sa-ai Sang daok sangka padang angan Lan Sang Còi, bingu hu pablei di labik pala saong dom labik pablei bingu cảnh di Đà Lạt, ban raya Ho Chi Minh, Đà Nẵng, Gia Lai, Buôn Mê Thuột, Hà Nội.

Tal urak ini, bruk ngak mbang di sa-ai Phan Thanh Sang hu 3 hecta taneh pala Lan tui ilamu birau, 500 phein bingu Lan praong sit, 500 ribau phein phong Lan, yaok rituh ribau phun daruai dalah mtha, phun ngak mekre, saong ngak po 30 đại lý bingu Lan dalam taneh ia, jien mek tame kuhria rah tapa 3 tỷ đồng yaok thun saong ba bruk ngak ka 40 urang ngak dalam palei saong yaom jien bilan tani tanat. Gam saong bruk patagok kinh tế sang, sa-ai Sang daok kham jak ba mikva saong hu panuac brei padang Khu phố Hồ Xuân Hương, P9, ban Đà Lạt jeng Palei dulich ngak nong Xuân Hương ngan saong bruk pala bingu lan, daruai dalah mtha, bingu phein, dâu tây thủy canh, njam hacih…Langiu di nan, sa-ai Sang daok hu pambuak bruk saong Tỉnh đoàn, Kapul Dam dara, kapul urang nong tỉnh saong Kapul pala bingu peih bruk brei ka mikva urang ngak nong, dam dara, urang đoàn, anek saih, sinh viên mai rivang iek, bac megru, klah rabha ilamu padang mbang ngui saong hatai caong hu rik hasit pren yava tame tacei jalan, pambak hatai takre ngak nong sinh thái tal menuac urang. Sa-ai Phan Thị Chúc Quỳnh, Bí thư Tỉnh đoàn Lâm Đồng lac:

"Tapa bruk ngak di sa-ai Phan Thanh Sang, dalam dom mabng tỉnh đàon peih bruk nao rivang main, atau yaih khan dom bruk ngak ka dam dara dalam atau langiu tỉnh, ye khol dahlak jeng hu mai bac megru bruk ngak di sa-ai Phan Thanh Sang. Ini lac sa dalam dom bruk ngak biak siam saong caik hatai jia tame hu. Kayua sa-ai Sang lac sa dalam dom urang dam abih hatai klah rabha ilamu ngak kaya meda saong tapa bruk ngak ini hu biak rilo dam dara padang mbang ngui meng rilo jalan ngak karei di gauk."

Meng dom bruk ngak hu, Phan Thanh Sang lac sa dalam 10 urang ranaih umo Viet Nam naih gheih hu pok meyaom birau ini pak Ha Noi. Phan Thanh Sang brei thau, sa-ai tuk halei jeng kham merat bac da-a, ngak rilo bruk hu kein laba ka bhap bini, ka puk palei./.