Urang likei jeng tỷ phú meng raong darko

       Padang mbang ngui meng dua plak tangin saoh, hadei di 4 thun kham merat, gam saong hatai takre bruk raong darko mek ia hani, urak ini urang likei Quách Trung Kiên, ndih tapui thun 1992, palei Quang Thái 2, xã Thái Hòa, huyện Hàm Yên, tỉnh Tuyên Quang hu dalam tangin labaih  1.000 tapol darko mek ia hani, yaok thun laba hu jaik 1,5 tỷ đồng.

         Amaik metai sớm, ame ruak kik luac thun, yau nan ye tuk bac tamat THPT, Quách Trung Kiên oh pakacah đại học, bo daok di sang ngak bruk daong sang drei, raong adei mbang bac. Meng hatai caong duah jien piah diuk rai, Kiên oh huac kan kandah ngak biak rilo bruk piah duah jien, min jien mek tame tok ginup mbang.

         Quách Trung Kiên khan lac : thun 2012, urang Wa di Kiên daok di ban sit Tuyên Quang hu ba dua thùng darko mai nyim saai pasang iek dalam tukvak oh daok di sang. Yaok harei sa mbang, saai gaok darko piah pasang iek bruk praong tagok, dak harei daok mboh takre saong khin kak kajap haong bruk ini. Tapa duah thau angaok tapuk, báo saong Internet, mboh lac raong darko daok jeng jalan nao barau piah patagok kinh te, saai sahneng tal bruk padang trang trại raong darko mek ia hani.

      Puac thun 2012, saai Kiên nao mesaiy 50 triệu đồng, blei 36 tapol darko mai raong. Tuk mereip, kayua oh ka thau hu alamu raong darko, saai Kiên gaok oh takik kan kandah tuk tapol darko brei ia hani takik saong bhian ruak. Piah pasiam bruk ini, saai Kiên caik tukvak nao rilo labik piah bac megru alamu ka bruk ngak di drei. Tui nan, piah tapol darko hu ia hani luac thun, saai Kiên ba tapol darko di drei nao tal tỉnh Lào Cai, Yên Bái, Hà Giang, hu tuk nao tal tỉnh Đắk Lắk, Lâm Đồng... piah mek mật dom janih bingu di yaok puk palei. Oh palai pren menuac, meng 36 tapol darko akaok mereip, urak ini, saai Kiên hu labaih 1.000 tapol darko, mek hu labaih 50 tấn mật/sa thun, saong yaom pablei 50 triệu đồng/sa tấn, kaoh tabiak jien buh tame yaok thun saai Kiên laba hu jaik 1,5 tỷ đồng.

       Tukvak tal saai Kiên daok kuhria padang hợp tác xã raong darko, pamaong tal bruk padang angan ia darko chất lượng glaong, ngak jeng darak pasal tani tanat, plaih urang blei kateik yaom. Saai jeng caong khin samal padang  hợp tác xã piah pataom dom dam dara dalam xã takre raong darko, daong gauk patagok kinh tế.

         Oh lac ngak meda ka drei saoh, saai Kiên daok abih hatai daong dom sang raong darko dalam bhum, klah rabha alamu raong darko, pablei pandap…Urak ini, trang trại raong darko di saai hu ba bruk ngak ka 5 urang ngak puk palei ngan saong yaom jien 6 triệu đồng/sa urang sa bilan. Saai Quách Hoàng Hải, palei Quang Thái 2, xã Thái Hòa, huyện Hàm Yên brei thau : “meng hu saai Kiên ba tame ngak bruk di trang trại bo dahlak hu jien mek tame tani tanat rik daong paglaong raidiuk”.

     Bí thư Đoàn xã Thái Hòa, huyện Hàm Yên Nguyễn Thị Dung brei thau : saai Kiên lac urang đoàn ba akaok nao dahlau dalam bruk “Dam dara pakacah gauk patagok kinh te di puk palei ”. Lingiu di nan, saai Kiên daok hu mbaok tame dom bruk kayua Đoàn xã ba tabiak, halan hatian daong dom dam dara karei padang mbang ngui, padang raidiuk tani tanat jang.