Ong peih radeih dong duah urang halei khut radeih 

Bruk ngak di ong Lê Thanh Tùng lac peih radeih pajeng pandap pah ka sa công ty di Bình Dương. Yaok harei ong nao mai meng  quận 12 tal  Bình Dương, dok tuk lahaiy ye dong duik pablei cà phê.

Ong Tùng khan lac "Dahlau deih hu dom mbang nao ngak mai lavik melam, radeih hulin khut kreih jalan, gleih glar jhul mai sang kayua oh hu labik halei pasiam veik. Jhul mai tal sang biak gleih, nan ye  hu tuk ganong gam duik anek, bloh hulin sahneng, rilo urang oh patuah khut radeih atau abih xăng, jeng kan kandah lo meng mai tal sang, nan ye kham dong ka urang trun meneing glaih glar tuk melam joa".

Sahneng ye ngak,  jiak maong 9 melam, hadei di tuk dong duik ramik bloh quán ye ong Tùng peih radaih iek hu urang halei khin dong hagait halei oh. Ong bhian nduac tapa dom jalan prong, takik hu labik  sửa radeih yau jalan roya  1A, jalan roya  Hà Nội, jalan Phạm Văn Đồng, Mai Chí Thọ, ngã tư Ga, canah pak Bình Phước, tatua tapa Linh Xuân, Suối Tiên... Yaok melam, ong  peih nao peih mai angaok jalan nan 2 mbang.

Dahlau di tuk nao, ong Tùng oh var vaih tame labik pablei  xăng jiak sang tuh bak kan xăng 5 lít piah pandar tuk hu bruk. Boh thùng caik pandap trak jiak  40 kg, hu ginup pandap bal kong radaih, pasiam bugi, bơm hơi, pako ia... halan hatain dong dom sruh radeih khut jamriak di jalan. Radeih abih xăng ye ong tuh tame  labaih 1 lít piah ginup ka urang nao jalan peih tal cây xăng.

Saai  Sang dok di  pasa Tam Bình, Thủ Đức, hu ong Tùng dong - brei thau, tuk camereip saai jeng mboh huac kayua tuk kreih melam bo hu urang nao bal kong  radeih brei saoh. Saai sahneng lac ngak bloh jeng njauk bayar rilo jien, min sa-ai biak tatuak drei lac tuk bayar jien ye ong  Tùng oh mek, likau laik phone jeng oh brei . 

Ong Tùng brei thau,  oh khin brei laik phone ka dom urang  drei dong kayua jia lac patuah ye hu taom gaok veik . Min, jeng hu mbang dok peih radeih jiak tal sang ye ong taduan hu điện thoại ieu pasiam radaih di sa urang dok jiak  Khu công nghệ cao. Oh sahneng hagait, ong nduac nao veik piah dong.

Bruk ngak pahla min oh njauk lac tuk halei jeng taduan hu hatai jia di urang khin dong. Ong  Tùng khan lac, hu mbang gaok sa urang khut radeih tuk kreih melam, jhul  9 km meng tatua  Thủ Thiêm mai  Xa lộ Hà Nội, ong khin dong min urang nan oh taduan kayua huac lac pasot. Tuk nan, ong meng lac meyah mboh pasot ye preo khang sap tagok. Tuk ngak bloh, oh abih jien hagait, urang nan brei panuac dhar phor miat. Tangi sua meng thau, radeih khut min kayua dalam rup ong oh hu jien nan ye ong jhuk kabak . 

Yaok melam, hadei di tuk peih angaok jalan jaik 100 km dong ka urang, ong Tùng bhian mai sang di mong 2 jaik dah. Tui kuhria yaok melam  ong sửa radeih  ka labaih 3 urang,  hu harei tabung glong  jiak 10 urang.  Ong Tùng brei thau,  yaok bilan ong  abih  2 triệu đồng ka hatai takre  “huac lisei sang kuhria bruk ka urang karei” min mboh bui sambai lo. Jien duah hu di sang ginup pandar cai, min tuk halei dok dong hu menuac sia ye kham ngak, piah mboh rai duik nyu hu makna jang ./.

Urang lang: Hanipha- 8/6