Bilan 9/2008, Trung úy Thinh bac tamat Sang bac Trung cấp Hàng hải (Thành phố Hồ Chí Minh) tuk umo bahrau 21 thun. Hadei di nan sa-ai ngak harak likau tame ngak lin saong jeng urang lin quân hàm xanh ngak bruk di Đồn Biên phòng Tam Quan Nam (Bộ đội Biên phòng tỉnh Bình Định) khik caga chủ quyền bhum tasik saong duah daong urang njauk bala angaok tasik.

Urang taong ikan bhum pabah tasik Tam Quan saong bhap bini dalam bhum tuk halei jeng thau dhar phor dom urang lin Đồn Biên phòng Tam Quan Nam oh huac metai lahik daong ka mikva tuk gaok bala kan kandah. Sa-ai Thinh saong đồng đội hu pagap yau “phao cứu sinh” di urang taong ikan tuk ghe gilai di mikva gaok bala di pabah tasik Tam Quan.

 Biar harei 12/3/2018, taduan hu panuac khan lac hu 2 urang menei tasik mblung ia di labik menei Thiện Chánh, xã Tam Quan Bắc (huyện Hoài Nhơn, t.Bình Định), Thinh saong đồng đội tagok cano, yam tapa riyak praong, ngin khang nao tal labik urang gaok bala.  Trung úy Thinh hadar veik:  “Hadei di tuk kham merat nduac cano duah, dahlak mboh 1 urang daok ndong angaok mbaok ia. Dahlak samar chat trun tasik, caluai nao jaik bloh kua khang urang gaok bala, hu 2 đồng đội daong dui urang nan tagok cano, bloh ba nao cấp cứu, daong ka urang nan klah di metai. Sa harei hadei, kol dahlak duah mboh saong sraong tagok urang ka 2 metai ba tame gah.

Sa-ai Võ Sĩ Thoan, daok di xã Hoài Mỹ (huyện Hoài Nhơn) drut drui lac: “Harei nan, kol dahlak nao menei tasik yu njauk riyak paoh dui tabiak atah takai tasik, dahlak kham merat caluai tame min oh truh, bloh njauk riyak khang dui tabiak atah. Ayut di dahlak njauk riyak paoh lahik. Daok dahlak paseik tui ia, cang metai. Biak patuah, tuk nan sa-ai Thinh haong adei sa-ai Đồn Biên phòng Tam Quan Nam mai tal, sraong dahlak tagok cano ba nao cấp cứu, dahlak meng klah di metai. Dahlak saong rilo urang taong ikan bhum ini biak thau dhar phor dom urang lin Biên phòng lo”.

Ong Võ Minh, po kapal BD 96013 TS, khan veik: Tuk tame pabah lamnge Tam Quan, kapal di dahlak gaok bala, kram. Biak patuah tuk nan hu sa-ai Thinh saong đồng đội samar daong sraong tagok, ngak brei kapal ndaong tagok. Hu bruk daong nan meng trun hu khat lahik, hadei di tuk pasiam veik, kapal hu 3 mbang nao tasik.

Dalam thun 2018, Nguyễn Khắc Thinh saong đồng đội di Đồn Biên phòng Tam Quan Nam hu daong sraong 4 ghe gilai kram, daong padam pui 3 sruh ghe gilai khuah tuk daok pataok di pabah lamnge Tam Quan. Sa-ai daok hu daong ka bhap bini padang ngak sang jum pataom, kuac raok ribaong dalam mblang hamu, pataom mek harei di takai tasik, pasiam dom khut khat kayua ribuk ia sua saong abih drei hu mbaok tame danak dak: Daong adei yam takai nao tal sang bac…

Tuk tangi sua ka dom bruk ngak hu di drei, Thinh klao bloh lac: Pren yava rik daong di ayut sahabat dalam đơn vị lac biak praong. Meyah oh hu ayut sahabat nan, dahlak oh ngak hu hagait rilo.

Thiếu tá Huỳnh Công Hợi, Chính trị viên Đồn Biên phòng Tam Quan Nam brei thau: Trung úy Nguyễn Khắc Thinh lac urang jakar daok ranaih umo biak sami samar, abih hatai jai dalam bruk ngak saong tuk halei jeng ngak siam bruk di drei.  Tuk vak tapa, Thinh ngak hu rilo bruk, abih di nyu nan lac bruk duah, daong urang njauk bala. Tapa nan, nyu daong pabak jang hatai jia di bhap bini brei ka Bộ đội Biên phòng. Meng nan, urang taong ikan dak jum pataom, dak anit ranam, daong ka Bộ đội Biên phòng ngak hu siam bruk khik caga chủ quyền an ninh biên giới bhum tasik.

Meng dom bruk ngak hu dalam cứu hộ, cứu nạn, Trung úy Thinh taduan hu rilo harak meyaom di huyện, di tỉnh, hu Bộ Chỉ huy Bộ đội Biên phòng tỉnh Bình Định alin brei angan Chiến sĩ thi đua cơ sở saong angan Gương mặt trẻ tiêu biểu Bộ Chỉ huy Bộ đội Biên phòng tỉnh thun 2018.Yau nan min, ngan saong sa-ai, bruk bui sambai praong di abih lac hu urang taong ikan hadar tal drei saong đơn vị dalam dom mbang tabiak tasik taong ikan, atau tuk tame pabah lamnge./.