Di xã Cư Né saong dom xã jaik taphia di huyện Krông Búk, tỉnh Đắk Lắk , urang ngak nong angan Lê Quốc Hoàn hu angan ieu anit ranam lac "menuac vác tù và" , kayua tuk halei jeng abih hatai haong bruk di puk palei. Menuac sia di labik ini iek praong sa-ai kayua lac meng sa urang ngak mbang pah, ngak phụ hồ min meng tari taring, kham merat bo sa-ai hu jeng tỷ phú, hu pok ngak akaok palei saong tuk halei jeng dang akaok palei dalam bruk patagok kinh tế sang, abih hatai daong ka mikva kan kathaot. 

Hadei di labaih 4 thun ngak ginup bruk, yau ye nao mbang pah paik cà phê, phụ hồ atau peih xe ôm, thun 2004, anh Lê Quốc Hoàn, daok di palei 6, xã Cư Né, huyện Krông Buk, tỉnh Đăk Lăk,meng tabiak truh kan kathaot, tuk blei hu 5 sào taneh piah pala cà phê pablak haong phun mbang baoh. Patui di nan lac labaih 10 thun haok ia hauk, tari taring patak pataom meng jien ndo tal ilamu ngak nông, sa-ai hu trang trại praong labaih 7 héc ta, pala pablak cà phê haong bơ; peih hu dom cửa hàng pablei salih khak drak, kaya nong, blei hu 2 máy múc san lấp mặt bằng…

Urak ini, menuac sia di Cư Né oh lac thau tal Lê Quốc Hoàn yau sa tỷ phú, ngak bruk hagait jeng hu, bo daok iek praong sa-ai kayua kham merat hu mbaok tame dom bruk xã hội, tacei pato ilamu ngak mbang pala drak ka urang nông, pablei tavak khak drak oh mek laba ka dom sang kan kandah. Sa-ai Lê Tiến Văn, daok di palei Cư Kty, xã Chư Kpô, huyện Krông Búk brei thau, sa-ai lac sa dalam dom rituh sang hu sa-ai Hoàn daong saong tabiak truh hu kan kathaot: "Dahlau daih kol dahlak blei khak njauk bayar jien chip, meyah tavak veik njauk bayar laba saong padang dom janih harak gar. Min meng tuk sa-ai Hoàn brei ka mikva kol dahlak hu blei pacaik, oh cang pandap pandap, oh mek laba; tal tuk paik cà phê pablei meng bayar veik ka sa-ai. Dahlau daih sang dahlak lac sang kan kathaot, meng hu blei khak oh mek laba di diuk pasang sa-ai Hoàn piah patagok cà phê bo tal urak ini sang dahlak tabiak truh hu kan kathaot."

Meng ilamu ngak mbang saong hu angan je dalam bhap bini, thun 2011, sa-ai Hoàn hu mikva palei 6 xã Cư Né pok ngak akaok palei. Meng nan tal urak ini, sa-ai tuk halei jeng ngak siam bruk di drei, rik daong biak rilo ka bruk patruh eik, patrun kathaot, pathau khan bhap bini ngak njauk tui sarak di Đảng, hukum di karja, khik caga siam mekre, sron mbon puk palei.  Lingiu di nan, sa-ai daok hu mbaok tame bruk padang ngak palei pala bahrau meng bruk brei radaih di drei nao ngak jalan, daong jien blei xi-măng ngak jalan palei, ngak sân hội trường palei... Taong yaom ka bruk rik daong di akaok palei Lê Quốc Hoàn, ong Y Bhi Niê, urang dang akaok kapul urang ngak nong xã Cư Né, huyện Krông Búk lac: "Dalam dom thun tapa, sa-ai Hoàn peih đại lý pablei khak pacaik ka mikva, daong phun pala, janih raong ka mikva dalam palei cakrok kinh tế. daok bruk di urang dang akaok palei, sa-ai ngak biak siam yau bruk: pathau khan giải tỏa ngak sang bac THPT bangsa gam bac gam daok, daong 100 triệu đồng ngak geng dok saong dom bruk karei ka xã.."

16 thun ngak bruk piah ngak kaya meda, 6 thun hu mbaok tame bruk xã hội saong hu rilo rik daong ka puk palei, urang vác tù và" Lê Quốc Hoàn hu dom pakat kapul nyaom, Karja pok brei rilo harak meyaom, saong lac urang ngak nong duy nhất di huyện Krông Búk hu pilih ruah nao hu mbaok dalam nyaom biai pataom iek veik bruk pakacah gauk ngak mbang pala drak naih joi pakat negar. Ndom ka bruk ngak di drei, sa-ai Lê Quốc Hoàn khan lac, sa-ai hu yau harei ini, meng hu bruk daong di rilo menuac saong dom kapul nyaom. Urak ini, tuk hu ginup meda, bruk rik pren haong bhap bini lac bruk njauk ngak:  "Tukvak nan kan kandah lô diuk pasang dahlak nao ngak mbang pah piah duah jien mbang. Hadei di nan diuk pasang patak pataom blei hu 5 sào puh saong hu Kapul urang ngak nong brei mesraiy hasit phun jien piah raong glang, blei khak mai buh ka bein cà phê. Bloh hadei di nan  blei hu bein, hu puh piah pala cà phê, phun mbang baoh.  Tuk hu jien ye peih đại lý blei kaya nong di mikva, pablei khak pacaik ka mikva. Hu mikva anit ranam pok ngak akaok palei, yaom lac jar var yau habar dahlak jeng kham merat ngak siam bruk di drei."

Dom urang naih gheih dalam ngak mbang, pala drak, abih hatai dalam bruk xã hội yau sa-ai Hoàn lac pren khang pachreih ba bhap bini bhum palei pala Đắk Lắk kham merat ngak mbang, pala drak, jum pataom, daong gauk patruh eik, patrun kathaot, yam tagok ngak kaya meda. Tapa nan, rik daong biak siam ka bruk padang ngak palei pala bahrau./.