Dua duik pasang saai Đặng Phụ Hiền dok di palei Nà Vài, xã Xuân La, huyện bhum ceik Pác Nặm( Bắc Cạn) kham merat ba abih pren yava dalam 8 bilan kuac raok krong ribong nao tapa labik kan kandah, tapa ceik ba ia mai ka mblang hamu ngak padai ia. Meng nan rai duik di palei Nà Vài ngan saong 28 boh sang urang bangsa Dao hu salih baharau.

Dom thun dahlau, rai duik di 28 boh sang di palei Nà Vài biak kan kandah rambah rambeip, harei eik, harei ginup. Tong abih palei hu labaih 10 ha taneh pala drak, thu lagu nan ye oh ngak hu padai, yaok thun tok ngak sa vụ tangei min biak kan kandah kayua oh hu krong ribong ba ia. Thei jeng thau , dok atah di nan jiak 3 km hu sa chraoh ia nduac luac thun, min oh thei sahaneng tal bruk ngak jalan ba ia mai hamu, kayua lac kuac raok tapa ceik abih rilo pren yava. Yau nan ye, abih palei daok dalam eik lipa, hatai cong tỉnh, huyện ngak jalan ba ia mai hamu ngak padai.

Sang saai Đặng Phụ Hiền hu 3 “ bung” taneh prong (3000 m2) dok di mblang Nà Vài song bhian kurang ia, pala tangei bo hu thun oh hu baoh, sang bhian iek lipa yau mik va dalam palei. Saai Hiền sahaneng lac “ Meyah cong tame tỉnh huyện oh thau tal tuk halei công trình thủy lợi Nài Vài meng hu ngak, njauk halei oh hu taneh riya bo eik lipa gam gam” Hadei di rilo bilan nao mai pasang iek, luac abih saai Hiền mek jaleing, xẻng xà-beng kuac raok iah ba ia mai hamu

Akaok thun 2010, duik pasang saai Hiền jak ba mik va dalam palei ba gauk ngak thủy lợi Nà Vài. Jalan ceik glaong biar nan ye rilo labik njauk kuac raok dalam yaok mét tui jalan ceik, rilo labik taneh dhong brei mek patau meng labik karei mai pacang. Abih rilo pren yava bo oh mboh nao tal halei, oh ngak hu hagait, hadei di sa bilan mik va dalam palei taduan lah, klak bruk. Oh kadun likuh, duik pasang saai Hiền harei melam ngak bruk, kham merat ba hu ia mai ka mblang hamu.

Danak dak oh hu thiết kế, nduac atah tapa labik kan kandah nan ye bruk kuac raok dak harei dak kan kandah jang. Oh hu bản vẽ thi công, duik pasang saai Hiền kuac tal lei brei ia sre tal nan piah gam mek taneh, gam ka taneh pasah piah mbuan kuac raok. Dom labik taneh biar, saai mek patau pacang, tuh haluk tagok ngak jeng ribaong ba ia.Saai Hiền khan lac “ dalam tuk kuac raok, njauk nao tapa rilo labik glong beir, hu labik nao tapa ceik. Hu rilo mbang, dahlak khin ndom hong duik lac klaak nao, kayua mboh biak kan ngak. Luac di abih, duik pasang dahlak jeng ngak hu jalan ribong atah jiak 3 km, dalam nan hu labik atah 80 mét kuac raok tapa ceik, taeng lubang ni abih labaih 3 bilan meng kuac raok bloh.

Luac di abih, bilan 11 thun 2010, duik pasang saai Hiền biak uan tabuan, mik va palei Nà Vài tatuak drei tuk ribaong ia Nà Vài hu ngak salah bloh, jalan ia khang nduac mai mblang hamu Nà Vài dok mahu ia. Phó Bí thư Đảng ủy xã Xuân La – ong Dương Văn Chung khan lac: Khol dahlak iek công trình thủy lợi di saai Hiền lac sa danak dak “ lịch sử” di xã Xuân La ni. Akaok sahaneng, pren khang di duik pasang saai hu tong yaom glong song hu rilo pakat pok meyaom, yaih khan. Meng ribong di saai Hiền, kan kandah dalam bruk pala drak di urang nong palei Nà Vài oh dok tra.

Meng công trình thuỷ lợi kayua duik pasang saai Hiền kham merat yam tapa kan kandah, mek pren khang song pandap thô sơ ngak jeng, mblang hamu Nà Vài hu ia pruh pamedeih pren khang. Tal urak ni, sang saai Hiền song mik va palei Nà Vài hu salih bahrau biak biai, urang ngak hu 2 vụ padai yaok thun, padeih bruk mbang tangei bo harei eik harei trei. Yaok pluh ha taneh thu lagu klaak saoh di Nà Vài hu pala drak hadei di tuk hu  ribong di saai Hiền, ba mai rai duik trei sil ka mik va Nà Vài./. 

Bài, ảnh: THẾ BÌNH