Urang ngak gam haong po doanh nghiệp kham merat yam tapa tukvak jit ruak 

Dalam dom harei puac bilan 3, labaih 2.000 urang ngak di Cty TNHH sa thành viên jhik  Bình Dương daok di ban sit Thuận An, tỉnh Bình Dương jeng daok jar var haong bruk ngak di drei. Ngan haong dom urang daok pak ini, ngak njauk tui bruk pacang caga jit ruak lac bruk njauk ngak. Min bruk ngak ka nyu salah dom đơn hàng jeng lac bruk biak praong piah khik jalan cakrok tani tanat di doanh nghiệp, khik bruk hit ngak mbang ka urang ngak. Sa-ai Nguyễn Thị Ngọc Yến – urang ngak di Cty jhik Bình Dương khan lac, urak ini takik đơn hàng, urang ngak oh hu tăng ca, jien bilan takik min thei jeng uan tabuan kayua doanh nghiệp daok ngak bruk: Taong abih urang ngak pak ini daok kham merat jhul kadun likuk jit ruak, daok bruk ngak di drei ye drei kham merat ngak siam..

Sa-ai Hoàng Xuân Hải,  ngak dalam Cty haong sa-ai Yến, khan lac: Urak ini kol dahlak daok ngak catang bruk  pacang jit tui jalan ba tabiak di Cty. Saong daok kham merat ngak bruk siam piah gam haong doanh nghiệp yam tapa kan kandah, jit ruak urak ini.

Daok Cty TNHH Phước Ý di ban sit Bến Cát, tỉnh Bình Dương, tuk Cty brei thau lac takik tăng ca piah ngak hu suai lavik jang, urang ngak takik njauk hatai, rilo menuac khin klaak bruk nao labik karei ngak. Piah brei ka urang ngak thau saong klah rabha haong doanh nghiệp, công đoàn Cty kham merat dang tabiak pambuak bruk di pô doanh nghiệp haong urang ngak. Sa-ai Nguyễn Phi Long – urang dang akaok Công đoàn Cty TNHH Phước Ý brei thau: “Bhian pathau khan ka pacang caga jit ruak, brei thau ka jit ruak piah urang ngak oh huac oh duh hatai, bruk ngak siam jang piah Cty ngak bruk tani tanat”. 

Bruk kham merat di urang jakar công đoàn gam haong dom jalan pathau khan siam, hu daong ka urang ngak thau cambaih jang, oh daok suh sah anak dom khau tin suan, labaih, kurang.  Kayua yau nan ye, urang ngak di Bình Dương dak harei dak daong ka doanh nghiệp ngak siam bruk pacang caga jit ruak, pataom tame ngak bruk. Ong Trương Văn Phỉ, Phó Chủ tịch Công đoàn dom labik ngak kong Bến Cát lac, oh tuk halei yau tuk ini, labik dang di urang jakar công đoàn brei hu patagok. “Njauk khan ka urang ngak thau bruk kinh tế-xã hội di taneh ia, thau hu bruk kan kandah piah ka urang ngak klah rabha haong doanh nghiệp. Ngak habar ka pô doanh nghiệp thau hu dom kan kandah di urang ngak piah meng nan pô doanh nghiệp haong urang ngak mboh anit gauk jang”. 

Taong yaom bruk sản xuất dalam tỉnh, Sở Lao động-Thương binh & Xã hội tỉnh Bình Dương mboh lac, meyah jit ruak dui atah, ini meda lac cuang kandah praong ka doanh nghiệp, ka tỉnh. Ong Phạm Văn Tuyên, Phó giám đốc Sở Lao động-Thương binh & Xã hội ndom lac, doanh nghiệp haong urang ngak brei thau anit gauk, jum pataom gauk piah ba gauk yam tapa kan kandah ini: Ngan saong doanh nghiệp, hadei di tuk abih jit ruak, tuk sản xuất veik njauk caik hatai sangka jang tal urang ngak, pabak veik bruk urang ngak kak kajap haong doanh nghiệp yam tapa kan kandah”. 

Bruk ba gauk ngak di urang ngak haong doanh nghiệp meda lac jalan khang kajap ka talei pambuak bruk siam mekre, jhul patagok tani tanat saong khang kajap di doanh nghiệp piah yam tapa kan kandah kayua jit Covid-19 ba mai./.

Urang lang : Musa Phương