Mintri  Lao động Thương binh Xã hội bahrau hu harak payua  ka mintri  Kế hoạch song  Đầu tư ba tabiak sarak mesraiy jien dong labik pablei salih  song urang ngak mesraiy jien piah pasiam veik, khik ramik song dong patagok bruk ngak mbang pablei salih, rik dong song peih prong bruk ngak. Tanut mesraiy rilo di abih  tui sarak 74 di rajaei lac: ngan song labik ngak mbang pablei salih 2 tỷ đồng, ngan song urang ngak lac  100 triệu đồng. Tuk vak dong yaom jien laba lac 12 bilan ngan song  pok jien sre bahrau, song yaom jien tui kuhria lac 15.000 tỷ đồng. Meyah hu njauk hatai, ni hu mong lac pok jien dong  ka 2 hadei di pok jien  62.000 tỷ đồng hu peih ngak.

     UBND TP Đà Nẵng hu pok tagok Thủ tướng rajaei brei adat ka urang ngak bruk, anek saih, sinh viên saong bhap bini di dom labik karei daok di Đà Nẵng hu tabiak truh ban mai gilac labik daok tui caong khin. Đà Nẵng jeng hu payua harak ka UB bhap bini dom tỉnh, ban dalam negar ka bruk daong rahra daok di Đà Nẵng kayua njauk gar jit Covid-19 hu mai labik daok. Tui nan kakei dom tỉnh, ban ramik ngak jalan talei pandiak saong khan tabiak pambak praong piah taduan mek khau tin di rahra di pak ni daok di Đà Nẵng tut angan mai gilac labik daok. Ban meda khan brei thau ka bhap bini dom tinh, ban karei daok di Đà Nẵng peih bruk tut angan.

     Tui UBND tỉnh Bình Thuận, dalam tỉnh hu 48 danao ia  dom janih  dok pandar song  abih tih dung tích padang ngak labaih  330 triệu mét khối ia, meda pruh ka jiak 36.400 ha. Dom danao rilo meng hu pandar dalam rilo thun min oh ka hu phun jien  pasiam veik , nan ye rilo danao daok khut. Dom thun tap, meng phun jien di Trung ương, hu buh tabiak pasiam veik 7/30 danao ia. Urak ni dok  10 danao khut trak, mbuan si ba tal kan kandah lac : Sông Móng, Cà Giây, Cà Giang, Giếng Cỏ, Bo Bo, Năm Heo, Sông Mao, Đaguiry, Suối Trâm, Lâm trường Sông Dinh. UBND tỉnh hu panuac pok tagok Trung ương buh tabiak pok jien  190 tỷ đồng pasiam veik dom danao ia nan  piah khik caga siam mekre tong abih danao ia dalam bilan hajan.

     Balai mek jien nduac tapa tatua Đồng Nai (ban Biên Hòa) meda padieh mek jien meng maong 1 mateh harei 24/8 piah Mintri jalan mbak njauk gauk dom bruk yau haong gah buh jien tame. Tui Tổng cục jalan mbak, danak dak tatua Đồng Nai bahrau saong dua gah akaok tatua daok tavak dom kan kandah yau ye: jien laba vaktu peih ngak di danak dak ka oh hu Mintri jalan mbak sanya langyah; jien buh tame ka oh quyết toán di danak dak tui kuhria labaih 24 tỷ đồng; urang buh jien tame pabak ka oh ginup harak gar peih jien brei ka danak dak. Tổng cục ieu kakei urang buh jien tame lac Tổng công ty padang ngak ka 1 khan brei thau bruk padieh mek jien, rami ramik saong langyah dom chế độ ka dom urang ngak di bilai mek jien; biyar jien harak bilan saong quý gilac ka bhap bini.

        Cục pacang caga jru phiel  song tội phạm, Bộ Tư lệnh Bộ đội Biên phòng pambuak bruk  song  bol lin  Biên phòng tỉnh Lạng Sơn bahrau tong tayah jalan ba urang kamei  Việt Nam metain tapa Trung Quốc ndik tapui anek , hadei di nan pablei anek kama . Dahlau di nan, melam  18/8, 1 sruh ô tô pajeng  6 urang kamei (dalam nan hu  2 urang dok metain) njauk chap hu tuk dok pajeng meng Việt Nam tabiak jalan negar. Urang Bế Ngọc Tăng (ndik tapui thun 1986), dok di Lạng Sơn, pal akaok bruk ni  njauk chap kreik. Gah chức năng hu dong  2 urang kamei hu dok di Quảng Nam song  Sóc Trăng (1 urang dok metain  song sa urang bahrau ndik tapui anek ). Dom urang nan hu ba tame iek glang di pasak  urang kamei song patagok, di  Trung ương Hội Liên hiệp urang kamei  Việt Nam. Bruk nan hu ba taba gah hình sự, dok hu pasang iek peih prong.

        Ngoại trưởng Mêhicô Marcelo Ebrard brei thau, negar ni taduan takik di nyu 2.000 mbang vắc-xin Sputnik V di Nga dalam mbang ngak iek peih praong tabiak vaktu 3 di janih vắc-xin ni. Tui kuhria bruk klauk jru vắc-xin ngak iek di Mêhicô meda peih tabiak di bilan 9. Urak ni hu labaih 20 negar hu kakei blei 1 tỷ mbang vắc-xin Sputnik V meng Nga,dalam tuk dom negar karei jeng daok ginum biai haong Nga piah ngak tabiak janih vắc-xin ni.

       Dom bác sĩ di Australia jiak di ni hu mboh dom urang njauk  Covid-19 hu dom triệu chứng dreih yau ruak saluak anek takai dok tagok di negar ni. Saluak anek takai lac sa ruak oh bhian mboh di  Australia yau nan ye bruk tagok urang ruak di jiak ni hu dom  bác sĩ tong yaom lac biak karei. Tapa dom roh duah di dunya jiak di ni brei tha, dom urang ruak  Covid-19 hu dom tổn thương sambo ngu meriak angaok nek tangin nek takai  song hu ieu lac ruak anek takai  Covid. Dom roh duah dunya ka ruak nek takai Covid jeng brei mboh urang njom ruak ni bhian oh hu dom  triệu chứng di ruak Covid-19 atau meyah hu ye dok di tanut hanjuan.

        Bang California (Mỹ) njauk ba tabiak bruk samar drah kayua khuah gilai dalam tuk yaok triệu urang daok anak bruk lahik gom điện praong abih kayua quá tải lưới điện tuk tiểu bang ni daok tapa vaktu pandiak sarau kadhau. Urak ni hu 23 mbang khuah gilai praong rahtabiak di grauk bang saong labaih 300 mbang khuah gilai sit karei. Taeng di gah vịnh San Francisco hu 15 mbang khuah gilai praong, abih jeng langiu di bruk pacang cakak. Yaok ribau bhap bini njauk nao tal labik karei tabiak truh dua labik vịnh San Francisco saong ban Vacaville kayua khuah gilai pambak praong. Pui khuah gilai nyu mbang biak rilo taneh gilai, ngak kan kandah tal yaok ribau mblang bien, labik khik ramik saong công trình rahra di bang California./.

Urang lang: T.Thảo - H.Pha  22/8/2020