Taom gaok kol dahlak dalam sa van biar harei sup hadei di tuk ngak bruk, sa-ai Nguyễn Trọng Tiến oh mboh hagait lac glaih glar, bo mbaok sa-ai jeng daok hadah hadai, bak chreih chrai. Sa-ai brei thau: “Glaih min njauk ngak ka drei bui sambai mai dalam bruk ngak, yau nan meng hu pren piah ngak bruk siam jang!”.

Tame ngak urang kỹ thuật di Công ty trách nhiệm hữu hạn Apparel Far Eastern Việt Nam di Bình Dương, gah jik pet meng thun 2013, meng ilamu hu bac mgru saong tapa bruk ngak, sa-ai Tiến tuk halei jeng kham merat ngak sam bruk di drei.

Meng tari tareng kham merat bac megru, sa-ai hu ba ilamu kỹ thuật tame bruk ngak, roh duah dom jalan ngak piah paglaong ilamu kỹ thuật, meng nan patak pataom jien padai buh tame ngak, paglaong chất lượng pandap panda. Sa-ai Nguyễn Trọng Tiến khan lac, dalam bruk ngak sa-ai tuk halei jeng kham merat abih drei piah bruk ngak di drei mek hu siam mekre, tapa nan daong ka dom urang ngak karei ngak bruk siam jang, daong patagok năng suất ka công ty, patak pataom phun jien buh tame ngak: Anak meta nan lac bruk pachreih ba ka drei, ka dua tra lac daong ka adei sa-ai urang ngak pasiam hu thao tác, cakak trun dom bruk labaih dakam sản xuất, paglaong năng suất saong patak pataom hu ralo jien padai ka công ty.

Hadei di 5 thun ngak bruk di công ty, sa-ai Tiến hu roh duah ba tabiak ralo jalan ngak piah pasiam ilamu kỹ thuật, ta-eng  dua thun 2017, 2018 sa-ai hu 6 jalan ngak hu ba tame pandar mek hu kein laba dalam sang mac, yau: ngak rập cải tiến jik nhãn tangin ao; cải tiến jik kadung, jik trang trí nẹp đỡ; ngak ralo size angaok sa rập; cải tiến jik sóng takoi ao, takik jalan vắt sổ…. Meng nan yaok khâu trun hu labaih meteh tukvak ngak, patak pataom hu meng 500 ribau tal labaih 7 triệu đồng sa đơn hàng.

Amuk Phạm Thị Duyên, Phaok Akaok Công đoàn cơ sở Công ty Apparel Far Eastern Việt Nam brei thau: Langiu di dom sáng kiến pandar hu saong ba mai kein laba ka công ty, sa-ai Tiến daok hu tacei pato, daong ka đồng nghiệp paglaong ilamu chuyên môn, tangin ngak. Tui bruk tacei pato, daong ba di sa-ai, ralo urang ngak hu ngak siam bruk di drei. Amuk Duyên taong yaom glaong sa-ai Tiến bruk tari tareng, abih hatai dalam bruk ngak, oh padeih pakacah ngak bruk naoh jioy saong sahneng duah dalam bruk ngak: Sa-ai Nguyễn Trọng Tiến lac sa urang ngak naih jioy, thau sahneng duah. Công ty tuk halei jeng daong palaghiah saong peih dom bruk pakacah piah ngak jeng pren khang ka urang ngak cakrok patagok jang, paglaong jien mek tame saong daong ka công ty cakrok patagok, mek hu ralo kein laba.

       Meng dom bruk ngak hu siam mekre yau nan, sa-ai Nguyễn Trọng Tiến lac sa kareih camin hu UBND tỉnh Bình Dương pok meyaom dalam bruk pakacah “Urang ngak naih joiy, urang ngak sáng tạo” thun 2018./.