Tal urak ini, labik daok di mikva oh daok  njaom nerak tachauk

Puac thun 2021, 14 dalam 16 xã, ban sit di huyện Lộc Ninh daok brei padang dom kapul piah pataom tame pathau khan, jak ba, pachreih mikva tame bruk panduan ba var ro raong glang tabiak truh labik daok.

Rilo thun raong limo, amuk Thị Chiến daok di ấp 54, xã Lộc An bhian kak limo jaik sang yau yaok ratuh sang raong limo karei dalam xã. Puac thun 2011, hadei di tuk hu karja palei pathau khan panduan ba athur raong, amuk biak pachreih hatai ngak tui. Urak ini tapon limo di sang amuk hu ba tabiak truh atah di sang, khik hu siam mekre labik daok saong prein yava di abih menuac dalam sang.

Yaom lac hu rilo taneh pala phun cao su, pa-ok blait, min ong Lâm Ngheo daok di xã Lộc Khánh jeng brei ngak var limo jaik tapen sang. Hu karja palei jak ba, ong brei kaoh klaak labaih pluh phun cao su mek taneh ngak var ro. Var limo di ong Lâm Ngheo hu padang dalam bein cao su, nan ye takik mbau, vil val sang hu hacih sa-at saong la-hơi bingi.

Ong Nguyễn Cao Thanh Sang, Phaok Bí thư Đảng ủy xã Lộc Thành brei thau: Jalan ngak di huyện Lộc Ninh ka bruk Ba var ro raong athur tabiak truh atah sang danaok, labik daok lac lagaih. Xã hu padang 2 kapul lac: 1 kapul pathau khan, jak ba saong sa kapul peih bruk panduan ba. Dalam tuk ngak, rilo bhap bini pachreih tui jalan ngak ini. Min hu dom palei hu sang bhap bini bangsa takik jeng daok raong kreik jaik sang kayua oh hu taneh piah ba var ro nao. Nan ye xã hu caik tabiak 0,7ha taneh di karja piah padang var ro brei ka mikva.

Dahlau di nan, dalam huyện Lộc Ninh hu 910 var ro, labik kak, kreik athur raong dalam labik daok ngak brei nerak tachauk ngan saong labaih 4.700 drei. Meng tuk peih bruk ba var ro tabiak truh atah sang danaok labik daok, taong abih urang jakar meng huyện tal xã, ấp, sóc jeng abih drei hu mbaok tame. Bruk pathau khan hu daong ka bhap bini pachreih hatai ngak tui. Dom urang pan bruk agama, dom taha palei, urang hu angan je jeng hu mbaok tame pathau khan, jak ba bhap bini bangsa takik panduan ba var ro raong athur tabiak truh atah di sang daok. Tui Kapul urang ngak nong huyện Lộc Ninh, urak ini dalam palei oh daok athur raong, bruk nerak alam môi trường, tachauk halau ia meda lac oh daok. Urak ini, taong abih labik var ro dahlau daih hu ramik ngak labik pala phun, pala njam patam, pala bingu atau labik me-in piah ka bhap bini oh kak veik limo kubao di labik klak.

Tal harei ini, Lộc Ninh hu ngak salah bruk ba taong abih dom var ro nao, njauk tui bruk ba tabiak. Ini lac jak jeng praong di huyện biên giới dalam bruk salih bhian randap, jalan sahneng saong jalan ngak di bhap bini bangsa takik ka bruk raong kreik athur dalam labik daok. Jalan ngak ini hu daong ka abih gauk thau jang ka bruk khik caga alam môi trường, rik daong paglaong “tiêu chí môi trường” dalam padang ngak palei pala bahrau di puk palei bhum tapen negar./.

Urang lang: M. Phương – 24/08