Dalam pandiak khang di bilan thu, khaol dahlak tui takai sa-ai Mạc Thanh Bình, akaok Kapul urang kamei ban sit Chơn Thành, tinh Bình Phước, nao rivang bruk raong danko mek aia di sa-ai Thuy. Yaok rituh thung danko  dak taphia gauk di mala halui bein phun cao su, phun tràm, darang la-an bingi. Langiu di sap ngin, daok hu sap di sauk anek danko par nao par mai di yaok rituh ribau drei danko thợ daok tari taring nao duah, ba dom asar phấn bingu sit sot mai ngak sruh danko.

Sa-ai Thuy daok mek tangin takaik sruh bak ia danko, dui tabiak. Gam ngak, sa-ai Thuy gam ndom: “Thung ini bahrau mek aia danko dom harei dahlau, min anek danko nyu ngak jeng sruh 3 tal aia danko, mbang ini daok pandiak bhang, phun pala tamuh oh siam, anek danko duah pandap mbang kan jang, min pabak veik, aia danko siam jang, yamen pahe jang”.

Brei thau kayua halei tame bruk raong danko mek aia, sa-ai Thuy khan lac, atah di ini labaih pluh thun, sang sa-ai lac sang kathaot, taneh pala drak oh hu, luac thun nao kuah katak cao su mbang pah. Blaoh hu sa harei hu mbaok tame tal pathram ka padang mbang ngui tabiak truh kathaot di Kapul urang kamei ban sit Chơn Thành, hu nao rivang iek bruk padang mbang ngui hu jak jeng, dalam nan hu bruk raong danko, sa-ai meng nan hu caik hatai tal bruk raong dangka mek aia, kayua mboh bruk ini jeng mbuan ngak. Sa-ai ngak harak likau mesre phun jien di Kapul urang kamei hu dua pluh triệu, blei hu 20 thung danko, raong dalam mblang bein sit di sang.

Tuk camereip, oh ka thau hasit hagait ka ilamu raong danko, sa-ai eng drei kham merat duah thau meng dom urang ngak dahlau, duah puac harak báo angaok mạng saong bac megru jang meng dom kỹ sư ngak nong di palei. Meng nan, sa-ai pataom hu ilamu saong dak harei dak thau kajap ilamu jang.

Bình Phước hu langik tasik biak laghaih haong anek danko, langiu di nan, pak ini daok hu bein pa-aok blait, cao su prong abih dalam taneh aia, 2 janih phun hu bingu biak siam ka aia danko. Ini lac siam lagaih praong ka urang raong danko. Yau nan min sa-ai Thuy brei thau, prong di abih nan lac ilamu saong drei tari tareng halei oh: Drei njauk thau cambaih tập tính di danko, thau cambaih ka langik tasik, bilan halei hu bingu hagait, daok pak halei, piah ka drei ba tapul danko nao tal nan ka nyu njuk mek mật hu mbuan laghaih jang. Tuk halei mboh danko nyu kurang pandap mbang ye drei pabak brei. Langiu di nan, khin ka tapul danko cak rok khang, urang raong brei thau ilamu neh tapon, padang danko chúa... Piah ka aia danko pahe bingi, brei thau cambaih bingu dalam labik nan hu ginup ka anek danko mek phấn halei oh. Dom janih phun dalam labik nan lac phun hagait, hu pandar dom janih jru pruh pametai halak halin halei oh.

Langiu di nan, bilan danko njuk mật lac dalam 6 bilan (meng bilan  1 tal bilan 6 saka ia bulan), tukvak hadei nan njauk ba tapul danko mai raong pasiamveik blaoh parabha tapul saong pambak prong anek pajaih. Dalam tuk neh rabha tapul njauk padang tabiak sa drei anek danko chúa ka yaok thùng, danko chúa hu bruk caih menek tabiak danko thợ piah nao njuk mật saong pasiam veik dom cầu danko dalam sa dung”, sa-ai Thuy ndom yau nan.

Urak ini, bruk raong danko mek aia di sa-ai Thuy lac sa dalam dom bruk ngak ka cakrok khang kajap, jak jeng haong labaih 300 thung danko. Kuhria rah tapa, yaok thun sang sa-ai mek hu jaik 30 tấn aia mật danko. Kaoh abih phun jien buh tame, sa-ai daok laba  hu jaik 500 triệu đồng. Langiu di nan, sa-ai daok ba bruk ngak ka jaik pluh urang di palei.

Sa-ai Thuy brei thau, kinh tế sang hu grap tanat yau harei ini, langiu di bruk kham merat di rup drei, daok hu bruk daong tuk camereip ka phun jien, ilamu di Kapul urang kamei palei. Nan ye, piah daong dom urang kamei karei dalam kapul ngak mbang saong tapa truh kathaot, sa-ai halar hatian daong taong abih, meng phun jien, anek pajaih tal ilamu. Urak ini sa-ai Thuy hu Kapul urang kamei ban sit Chơn Thành bhian daa nao hu mbaok dalam dom mbang pataom mbaok piah klah rabha ilamu, tacei pato ilamu ka dom hội viên, ka urang hu hatai caong padang mbang ngui meng bruk raong danko mek aia./.