Tuấn Tú lac palei hu rilo bhap bini Cam daok di xã An Hải, huyện Ninh Phước. Palei praong abih tih 458ha min jaik abih lac taneh cuah klak bilau, daok taneh ngak nong pala drak tok hu labaih 215 ha. Dalam tuk langik pandiak thu lagu, urang ngak nong khang hatai salih janih phun pala, ngak tui jalan pruh ia patak pataom, ngak brei dom mblang taneh cuah  patih jeng mblang hamu that hijao siam.

 Ong Từ Công Toán, daok di xã An Hải, huyện Ninh Phước brei thau, dahlau diah pruh ia tui jalan klak lac njuk ia tagok dom ribong ia sre piah ia nduac tame hamu blaoh njom trun taneh atau pruh ia sre bak angaok mbaok taneh ba tal palai lahik ia biak ralo, abih rilo prein pruh ia saong mbaih mbaoh taneh riya. Nan oh ka ndem tal dom thun pandiak bhang kurang ia, ngak ka bruk pala drak gaok biak rilo kan kandah. Hadei di tuk bac megru dom bruk pruh ia  patak pataom, ong Toán buh tame 25 trieu pagam mac jamraih pruh ia patak pataom, pruh kanjok ia sit sit ka taong abih 7.000 m2 taneh pala dom janih phun măng tây, lasun,  njam sabei, ratak lo saong phun tammekai.

Ong Hùng Ky, Yam ndoc HTX Jit vu tong hop Tuấn Tú khan brei thau, HTX urak ini hu 84 urang tame hu mbaok tame bruk pala măng tây xanh tui jalan mblang hamu praong jaik 40 hecta  daok tui jalan pruh ia patak pataom. Kuhria rah tapa yaok sa sào taneh, buh jien tame ngak pandap pruh ia hajan meng 3-5 trieu dong, pruh kanjok sit sit abih meng 10 -12 trieu dong. Meng hu pagam mac jamriah pruh ia patak pataom nan ye bilan thu oh daok kurang ia, dom xã viên ngak mbang pala drak tani tanat saong peih praong bruk pala drak di dom labik taneh kurang ia. 

Daok di bhum pala nyo di xã Vĩnh Hải, huyện Ninh Hải, tal urak ini 200ha nyo hu dom po bein, trang trại pagam mac jamraih pruh ia patak pataom. Pruh ia patak pataom hu daong parabha ia sumu gauk nan ye oh ngak brei hu labik dauk ia yau pruh ia sraiy, daong ka gha phun nyo tamuh khang kajap, urang pala hu ginup ia piah pruh luac thun.

Tui kuhria, bruk pruh ia patak pataom pruh hanjan, pruh kanjok sit sit meda patak pataom hu ia meng 20-40%, hu janih phun pala patak pataom hu tal 70% dut saong jalan pruh ia yau dahlau diah; gam haong nan phun pala brei rilo baoh meng 15-20%.

 Langiu di nan,  meda pambuak haong bruk buh khak, che pham sinh hoc tapa mac pruh ia, daong patrun phun jien buh tame. Meng nan  bo tal urak ini Ninh Thuận hu jaik 2.000 ha pandar kong nghe pruh ia hajan , pruh ia kanjok sit sit, dalam  nan hu labaih 800 ha phun pala lavik thun saong jaik 1.200 ha phun yaok thun.

Tukvak anak tak, gah ngak nong pambuak haong dom gah, dom puk palei brei tui iek catang bruk langik pandiak hajan, halau ia di dom danak dak ribaong kraong piah sumu ba tabiak jalan ngak, khik iek saong peih - kareik ia ka lagaih. Gam haong nan, tỉnh brei jhul pakhang bruk pandar cong nghe glong, pambak praong dom bruk pamdar kong nghe pruh ia birau, pruh patak pataom ia ka dom janih phun pala di dom bhum palei karei di gauk piah khik kajap bruk pala drak njauk tui jalan ba tabiak./.