Yaom lac bruk ngak tuk halei jeng jar var, min saai Nguyễn Công Chính, daok di palei Bình Xuân 1, xã Xuân Phú, huyện Xuân Lộc, tuk halei jeng bui klao chreih chrai kayua bloh lac sa thun jayah oh lac di ta-eng saai bo gam mikva urang ngak nong. Dang tapen baoh mac laih asar tangei di drei ngak tabiak, “kỹ sư takai haluk” Nguyễn Công Chính hadah mbaok mata mayaih khan lac, saai tame bruk roh duah mac laih asar tangei meng thun 2020, tal thun 2023 sruh mac laih asar hu ngak salah. Langiu di labik akaok mac li-ua, saai sahneng duah ngak pabak tame jalan tạo khí nén dom labik piah laih asar saong ngak labik caik asar. Mac nduac tui jalan ngak lac: asar pajaih hu dom nding njuk hangin tapa labik laih asar, pak ini hu dom đĩa kareih peih piah ka yaok asar laik trun gilaong, puac abih lac lam taneh jeng kayua mac ngak. Mac lac pandar cơ saong hangin pambuak gauk veik piah laih asar. Tui nan labik hangin piah laih asar dalam khay, tuk mek tagok tok hu sa asar hu ba tapa jamraik piah định vị blaoh palao trun labik lubang bo mac bahrau nao tapa. Tui bruk drei rami ramik, sruh mac ini meda gieo trỉa abih tih dom janih asar praong sit karei di gauk, angaok dom janih hamu, puh.

Bruk chreih chrai jang tuk saai daok ngak tabiak mac laih asar janih mô đun, yaok mô đun meda ngak jeng talei trỉa asar. Sruh mac saai daok nduac iek hu tal 3 mô đun, meda drak asar jeng 6 lubang sa mbang haong gauk, yaok mô đun hu yaom tui kuhria labaih 50 triệu đồng. Saai Chính khan lac: “yaok mbang tuk tal bilan laih asar tangei, mikva urang ngak nong kaong ka-ing meng page tal sup, biak glaih glar saong pandik ka-ing. Urak ini meng bruk laih hu 6 lubang samu gauk, yaok harei sruh mac meda laih hu labaih 1ha biak siam, samu haong piluh urang ngak meng tangin dalam 2 harei. Sruh mac ini daong trun manieng tukvak trun pajaih, trun hu 1/3 phun jien pah manuac ngak.

Daok saai Trần Văn Chinh, daok di palei Sông Mây, xã Bắc Sơn, huyện Trảng Bom, Đồng Nai, yaom lac bahrau bac abih tal 9, ka oh tapa tal bac halei gah cơ khí min eng drei roh duah, ngak hu mac brei ka ikan mbang tự động meng prein hangin.

Sang saai Chinh hu 4 danao raong ikan koi, praong labaih 4ha, kayua ikan rilo nan ye bruk brei ka ikan mbang yaok harei dua mbang meng tangin lahik biak rilo tukvak saong prein yava. Tapa rilo harei pasang iek, mboh labik danao raong ikan di sang drei bhian hu hangin khang nan ye saai sahaneng tabiak bruk pandar dom pandap panda hu blaoh piah ngak tabiak mac jamraik brei ka ilan mbang tự động meng prein hangin. Hadei di rilo mbang ngak iek, saai ngak hu sruh mac brei ka ikan mbang meng prein hangin biak lagaih. Sruh mac hu saai caik di kreh danao, tuk tal mon brei ikan mbang, saai tok tuh yaok kadung haleik tame thung phuy, kandik taduan hangin eng nyu pavil saong jhul pandap mbang trun danao tapa 4 máng. Jeng meng prein hangin, van xả eng nyu rami ramik pandap mbang ka nyu lagaih, haleik parai tabiak grauk mbaok danao, tapon ikan hu mbang pandap mbang biak mbuan.

Urak ini, yaok thun sang saai Chinh pablei tabiak darak pasa labaih 12 tấn ikan cảnh pajaih, laba hu jien tỉ. Di dom harei puac thun, labik raong ikan cảnh pajaih hu chat luong glaong di sang saai Chinh tuk halei jeng taduan raok biak rilo urang mai blei, dom kapul tuai dalam saong langiu tinh vaih tame rivang iek saong blei ikan canh mai raong ma-in Tết./.