Hadei di 2 thun kak kajap haong bruk raong menuk tui jalan công nghiệp, mboh yaom pablei biar, kein laba oh glaong nan ye sa-ai Quỳnh Mai daok di ấp Bình Phú, xã An Phú, huyện Hớn Quản salih tapa raong menuk meng phun jru.

Tapa duah thau angaok harak báo, internet saong hu Pasak Dịch vụ ngak nong huyện Hớn Quản palih ruah ngak iek bruk raong menuk meng phun jru, sa-ai Mai khang hatai ngak tui. Tal urak ini, sang sa-ai pablei tabiak hu 4 mbang menuk raong meng phun jru. Sa-ai Mai khan lac: Raong menuk meng phun jru mboh drei menuk nyu siam jang, yaom pablei glaong jang. Menuk pajaih Bình Định  ba tame raong jeng hu saong brei ngak catang tui dom jalan ngak, abih di nyu lac klauk vắc xin ka nyu njauk harei umo. Menuk hadei di 30 harei brei nyu mbang phun jru gam haong haleik. Phun jru brei ka menuk mbang nan lac dom janih phun yau húng quế, plang, laya, tía tô, hareik mần trầu…

Manuk raong công nghiệp 3 bilan lac pablei hu, min manuk raong meng phun jru ye 6 bilan meng hu pablei. Bruk njauk biai nan lac, raong manuk meng phun jru urang raong pasang iek hu jit ruak, takik pandar jru kháng sinh saong manuk praong siam jang. Langiu di nan, manuk pablei tabiak darak pasar, ralow nyu pahe bingi, pabak hu bruk caong pandar pandap hacih di urang blei mbang.

Sa-ai Mai daok brei thau lac, manuk tal harei mek pablei, menuk binai yaok drei trak 1,8kg saong manuk tano lac meng 2,2-2,5kg haong yaom pablei meng 120-150 rabau đồng sa kg tui manuk binai atau tano. Yaok mbang pablei, sa-ai  Mai laba hu 20 triệu đồng/1.000 drei. Bilan hajan, phun jru mbuan pala jang nan ye hu rilo janih brei ka manuk mbang gam haong haleik piah hu pabak vitamin dalam dom janih đạm thực vật. Phun jru hu chai klik srau haong haleik, pagul jeng asar brei ka manuk mbang. Urak ini sa-ai Mai raong tui jalan gam kreik gam palao bein piah ka manuk eng nyu duah pandap mbang.   

Meng ilamu labaih 4 thun raong manuk, sa-ai Mai brei thau, raong meng phun jru saong blah tauk sinh học brei kein laba glaong. Pandar blah tauk sinh học daong ka tapon menuk oh njauk dom ruak gah jalan tung pruac, labik raong oh mbau bruk, siam ka prein yava di urang raong saong ka tapon menuk raong. Yaok mbang mek pablei, blah tauk sinh học hu pandih jeng khak hữu cơ buh ka phun pala.

Ini lac bruk bahrau dalam raong manuk hacih, meng nan ba mai yaom kinh tế glaong ka urang raong saong khik hu siam mekre prein yava di urag blei mbang. Ini jeng lac jalan nao anak tal ka bruk raong glang khang kajap anak bruk jit ruak di athur raong dak harei dak srau kadau yau urak ini.

Ong Nguyễn Văn Thịnh, Phaok akaok Kapul urang ngak nong huyện Hớn Quảng brei thau: Bruk raong manuk meng phun jru hu Kapul urang ngak nong saong Pasak bruk ngak nong huyện pambuak gauk peih ngak iek ka dom sang bhap bini saong hu kein laba glaong,  hu jien tame tani tanat, daong paglaong raidiuk urang ngak nong. Abih di nyu nan lac, bruk raong ini jeng ngak tabiak angan bahrau ka huyện. Kol dahlak daok pambak praong bruk ngak ini saong pamaong tal bruk padang dom kapul pambuak bruk, dom hợp tác xã raong manuk meng phun jru./.