Daok di palei Phước Thuận, xã Phước Thạnh (ban Mỹ Tho, tỉnh Tiền Giang), saai Nguyễn Văn Thông hu rilo urang thau ngan kayua oh lac sa urang tari tareng dalam bruk ngak mbang, yam tapa kan kandah ngak kaya mada bo ieu lac sa urang daok biak takre bruk ngak pahla, ngak phol hu rilo urang biak anit ranam. Dahlau diah, sang saai Thông pala njam patam baoh karuac min tapi jien mek tame oh tani tanat. Dalau di ini labaih 5 thun, patuah di nyu tuk saai thau tal phun siro meng bruk di sa urang ngak nong daok di tỉnh Đồng Tháp.

Tui saai roh duah, phun siro biak mbuan pala, sa sanih phun pala caga siam haong langik pandiak njom ia mbak. Baoh siro hu mikva brei iaik mek ia ngak ia manyum, langiu di nan baoh siro jeng mboh ban sambo biak gheih mata, phun di nyu laman mbuan mbeik yau nan ye hu rilo urang pilih blei mai ngak phun piah ieik main. Mai meng nan, saai Thong hu nao tal di labik piah duah thau ilamo sangka iek glang meng po bein saong dak blei 100 phun pajaih mai pala di labik mblang taneh bein di drei.

Kayua tari tareng sangka iek glang yau nan ye bein phun siro di sang saai Thông praong biak drah samar, brei baoh biak rilo. Meng dom phun siro tuk camriep akaok mati, saai Thông pabam peih praong dalam bein di drei, mbiah tal ini bein saai hu labaih 1.500 gok phun siro, tamuh ma-aom bak labaih 4.000m2 taneh bein. Ini hu brei thau lac bruk pala phun siro praong abih di tỉnh Tiền Giang.

Saai Thông khan lac: Phun siro biak mbuan si pala, oh bih rilo khak drak, takik halak halieng kaik palai saong buh takik prein piah sangka iek glang dut saong rilo janih phun pala karei. Phun pala hu labaih 2 thun meda tabiak baoh. Meng bilan 2 phun meng tabiak bingu, tal bilan 5 baoh tasak, tukvak masa paik baoh dui atah tal bilan 10 dalam thun. Tui kuhria yaok phun siro brei baoh, yaom pablei labaih 50.000 đồng/kg.

Abih di nyu lac, baoh siro biak gheih, tuk ka tasak nyu hu ban sambo tím sen hồng. Baoh tasak hu sambo mau tím dang pablak ban sambo hijao maong ieik biak gheih mata yau nan ye hu rilo urang takre blei mai pala ngak phun kieng phun piah ieik makre. Tuk baoh tasak nyu mboh lamen bingi, gam hasit masam, mbau pahe, bhian hu tram haong saradang ngak jeng ia sirô piah manyum atau ngak ia màu, ngak ia brei ngak pandap mbang, ngak jru tavao. Baoh siro ngak ia manyum, jru tavao... hu urang taong yaom glaong.

Bein phun siro di saai Thong brei mbaoh luac thun, dui pachreih hu rilo tuai damuai atah jaik mai rivang iek. Tuai bhian blei baoh ngak ia manyum, blei phun pajaih ba mai pala saong blei gam phun siro mai ngak phun gheih piah ieik di mblang sang drei. Mbiah labaih 5 thun cak rok patagok min bruk pala phun siro di saai Thong hu jien mek tame sang meng 100-150 triệu đồng. Langiu di nan, bruk ngak ini daok rik tame bruk ngak parilo janih bruk ngak nong di ini.

Anak tal saai Thong kuhria caga peih praong bruk pala phun siro bak bein taneh. Abih di nyu nan lac, mayah doanh nghiep hu hatai caong pambuak gauk cak rok patagok bruk ngak du lich sinh thai main, saai halain hatain bui sambai pambuak ngak.

Gru jru Đoàn Văn Khanh, Yam ndok Kong ty TNHH Long Thuận (xã Song Thuận, huyện Châu Thành, tỉnh Tiền Giang) hadei di tuk nao rivang iek bein siro di saai Nguyễn Văn Thông ndem lac: “Baoh siro biak gheih mata kayua ban sambo mau tím biak gheih mata. Tuk wak masa anak tal, dahlak kuhria caga roh duah ngak tabiak, njaik mek ia jeng pandap ia siro atau buh tame dom janih jru gha hareik piah ngak tabiak janih ia manyum biak siam ka prein yava”./.