Asar caraih pablei yaom 50.000 đồng sa kg janih oh ka paok kanduh

Daok atah di palei menyim khan bai Cam Caklaing jaik 1 km, lac dom mblang hamu caraih daok tal tuk raak bingu. Amuk Quảng Thị Kim Tín (daok di ban sit Phước Dân, huyện Ninh Phước), po labik ravang iek caraih Hoa Tín brei thau, labik ini dahlau daih lac bhum taneh dhaong, ngak padai oh hu laba, 3 thun dahlau, sang amuk hu bac megru bruk pala caraih meng Tây Nam Bộ piah ngak du lịch sinh thái, pambuak haong pablei pandap meng caraih. Phun caraih tamuh siam dalam langik tasik, taneh riya di Ninh Thuận. Urak ini, sang amuk hu peih praong taneh pala tagok labaih 1 ha. Piah daong palagaih ka tuai damuai, sang amuk Quảng Thị Kim Tín brei ngak dom mbaik tatua kreim nao tal dom baoh sang kathom di kreh mblang hamu piah maong iek caraih, thaot dom blah thaot mekre tapein bingu caraih haong gauk gar, ayut sahabat.  

Kuhria rah tapa, yaok harei hu yaok pluh mbang tuai, daok harei puac adit, tuk lễ, Tết hu yaok ratuh mbang tuai mai ravang me-in, thaot binguk, menyum dom janih tea caraih, asar caraih, ngó sen, laba menuk ngó sen, bu caraih … Abih di nyu nan lac hu thau ka ilamu mbang huak di urang Cam hu ngak biak pahe bingi oh lac labik halei jeng hu.

Tui amuk Quảng Thị Kim Tín, pala caraih takik glaih jang ngak padai, phun jien takik, bo taong abih janih di phun caraih jeng meda pablei hu. Urak ini, yaok harei, sang amuk paik asar caraih, pablei yaom 50.000 đồng sa kg janih oh ka paok kanduh,  ngó sen pablei yaom 40.000 đồng sa kg, bingu caraih yaom 3.000 đồng sa dhar, tai caraih pablei yaom 600.000 đồng sa kg… Sang amuk hu jien mek tame rilo meng pala caraih.

Hu thau, urak ini, hu jaik 10 baoh sang urang Cam tame bruk pala caraih pambuak haong ngak du lịch sinh thái. Tui kuhria mboh, jien laba meng 1 sào pala caraih (1.000 m2) rilo jang 5 - 6 mbang duk haong ngak padai. Bruk ravang me-in palei caraih hu jeng sa labik oh kurang hu angaok jalan ravang me-in dalam ban sit, meng palei ngak gaok glah Hamu Chaok tal palei meyim khan bai saong mblang hamu caraih Caklaing.

Amuk Đàng Sinh Ái Chi, Phaok Chủ tịch UB bhap bini ban sit Phước Dân, huyện Ninh Phước brei thau, bhap bini khang hatai bac megru, duah thau piah salih tapa pala caraih pambuak haong ngak du lịch sinh thái biak siam. Taong abih dom janih pandap ngak meng caraih jeng hu darak pasar takre blei, daong ka dom sang urang nong hu jien mek tame rilo. Tukvak anak tal, palei brei jhul khang bruk salih mbang hamu ngak padai, njam patam takik kein laba tapa pala caraih pambuak haong  du lịch sinh thái, padang kapul pambuak gauk patagok bruk pala caraih tui tiêu chuẩn VietGAP, blei veik abih dom pandap ngak tabiak.

Huyện Ninh Phước pambuak bruk haong dom pakat, gah chức năng peih tal pato pasram, paglaong ilamu ka menuac ngak di labik du lịch tui jalan chuyên nghiệp;  brei ngak pasiam labik ravang me-in. Gam haong nan, palei brei jhul khang yaih khan bruk ravang me-in palei caraih, ngak siam bruk khik caga hacih sa-at, siam mekre labik ravang me-in palei caraih Caklaing./.

Urang lang: Mousa Phương – 15/06