Di ban Cần Thơ, Ủy ban Mặt trận Nagar Việt Nam ban Can Tho pagam pambuak haong Insitu Viện Friedrich Naumann Foundation di Việt Nam daok peih tal bac pato Bruk ngak mbang ka urang bangsa Khmer di palei Thới Hòa B, ban sit Cờ Đỏ, huyện Cờ Đỏ. Di tal bac, dom urang kapul urang kumei hu saai kumei Trịnh Thị Hồng, urang padang Kong ty Minh Hồng Biotech pato pandar phun hala hu mbiah di dalam bhum palei yau ye phun lục bình, phun kayau hala baoh karaoh klak parah ba tame pandar rao jam panyin, papah khan ao, uak sang danaok…, meda lac oh bih jien bo daok siam ka prein yawa manuac urang pandar nyu.

Tui nai Trịnh Thị Hồng, meng labaih 3 kg rah hareik phun kayau haong 10 lít ia hacih dan haong 300 gram saradang pabam dalam khang katak brei gam sei (sư) mada brei tabiak hu 5 lít ia papah rao haci hacih.

Dom janih ndap nda rao panyin jam, ia papah, ia uak sang danaok, raco akaok, rao tangin… (jeng ye pahacih karei karei) jeng ngak hu ngak jeng taong abih 100% meng hareih rah klaak parah di njam patam, baoh karaoh, phun kayau bruk khut di dalam sang, daong khik caga siam hacih alam win rup manuac urang. Langiu di nan daok mboh janih ia ini pandar brei tuh ia ka kayau phun pala daong hu siam jang taneh pala.

Camreip urang ngak janih ia ini piah pandar dalam sang blaoh hadei di nan hu pamaong tal brei ka urang ngak mbang ngak tabiak ndap nda. Piah pabak ka urang pandar, langiu kuria brei ka ndap nda karo siam njauk brei pablak haong janih piah ka nyu mbau pahe, hu mbọt, ia mambeik … min tapi nyu jeng siam ka urang pandar siam ka dunya alam.

Taduan mek 3kg rah hareih phun lục bình, kanduh baoh kruac bhung hu ngak pahacih gam haong pandap ngak ba mai sang hadei di bac magru, muk Thạch Thị Đầm, Akaok Kapul kumei palei Thới Hòa 2, ban sit Cờ Đỏ mboh chreih hatai haong bruk ngak ini. Mang dalau halei mai, dom rah di janih njam patam baoh karaoh labaih biak ralo di dalam sang klak parah, urak ini brei pandar ngak jeng ia pahacih rao pasaat ndap nda rup saik, gam patrun jien ndo gam piah pandar ndap nda drei ngak tabiak eng.

Muk Nguyễn Ngọc Thẩm, Phok Akaok MBang Dân vận Huyện ủy Cờ Đỏ taong yaom lac, bruk mek hareik harom kayau phun njam patam piah ngak tabiak jeng janih ia pahacih piah rao panyin jam, ia rao pahacih tangin, uak sang danaok mang caga jalan di saai kumei angan Trịnh Thị Hồng biak kein langaih. Rah hrom ini pabam pamaluk haong janih ia karei brei ngak khak buh ka phun pala. Tui bruk ngak cara jalan barau bac magru, tuk wak masa yang anak tal, rahra urang bhap bini mada thau jalan patagok raidiuk ekonomi, patagok bruk ngak mbang, abih di nyu hu mboh mik wa urang bangsa Khmer di dalam bhum palei.

Ba tabiak bruk ngak mbang ka mik wa urang bangsa Khmer di bhum Taneran kraong Cửu Long ieu lac sa bruk ngak atah dhua. Di dalam tuk wak masa kurang ralo janih, mayah tahu bac magru pagam ilamu, gru jru, rahra bhap bini, karja gam hu urang daong, dom janih jalan ngak mbang lagaih haong mikwa palei pala mada daong bhap bini patruh eik patrun kathaot, uak rup yam tagok, pakhang paglaong rai diuk sang danaok di drei, iek daong patagok bhum palei./.