Bhap bani daok pak ini bhian cap mek janih ikan hu ralow pahe bingi ini piah pablei mek jien kuria ka raidiuk. Kadha “Urang ngak hamu caong thau” adit ini, urang vak Trần Hiếu hu khan brei mikva saong taong abih gauk thau ka bruk taong mek janih ikan ini di Cà Mau.

Amuk Đỗ Thị Hoá (daok di xã Trần Thới, huyện Cái Nước, tỉnh Cà Mau)  ngak bruk taong mek janih ikan ini meng labaih 40 thun ini mai. Tukvak amuk daok angaok ghe gilai, angaok vỏ lãi piah klauk vah, caik halam njuan mek ikan ye nyu rilo jang tukvak daok angaok ar nan ye janih ikan ini nyu yau habar amuk jeng thau cambaih laih. Tui amuk Hóa, ikan “vồ chó” bhian nao duah mbang tui tapon di dom pabah kraong tabiak tasik. Di dom pabah kraong takik ghe gilai tame tabiak ye ikan hu rilo jang. Mikva tui nan bo klauk vah, caik halam njuan mek ikan. Urak ini, ikan oh daok rilo yau dahlau diah saong hu rilo manuac urang ngak bruk ini nan ye klauk vah oh daok hu rilo tra, urak ini mikva cap mek meng halam, njuan.

Angaok sruh võ lãi di sang amuk Hóa, tuk halei jeng hu jaik 1.000 mét halam njuan piah cap mek ikan. Harei njauk, amuk mek hu 20 – 30 kg, daok harei takik jeng duah hu jaik 10 kg. Amuk Đỗ Thị Hoá hu rai diuk tani tanat jeng mai meng jien duah hu meng bruk taong mek janih ikan ini: "Harei halei jeng ngak oh hu harei padeih, halam tahak rilo ye jeng buh jien tame rilo. Halam caik ala kraong, tavak tame gha phun ye drah tahak. Dalam 7 bilan salih halam bahrau sa mbang abih 5-6 triệu. Jien mek tame harei halei njauk duah hu yaok triệu, daok harei takik jeng duah hu 3 – 4 rituh ribau".

Ngak bruk rilo thun yau nan min amuk Hóa saong dom urang karei jeng oh thau kayua halei ikan vồ biển hu ieu lac ikan vồ chó. Tok mehit dom urang prong thun khan lac, angaok ka-ing dom janih ikan ini hu dom sọc vằn yau sambo màu bilau asau, meda lac kayua yau nan ye, bo nyu hu angan iew yau nan.

Piah mek hu ikan daok di labik aia mbak saong ia meteh mbak meteh taba ini, dom urang daok di bhum tasik Cà Mau pandar janih halam njuan 3 tal, meta halam njuan meng 7 phân tagok. Hadei di tuk caik halam, mikva meda mek gai atah taong khang trun mbaok aia piah ngak ka ikan nduac tame halam. Ikan gam tame halam njuan bhian teik trak meng 300gr tal 1kg. Bhap bani ngak bruk ini jeng bhian pambuak gauk meng 2 – 3 sruh ghe gilai taong mek haong gauk piah taong mek hu rilo jang.

Tui sa-ai Phạm Văn Phú, daok di ban sit Cái Nước, huyện Cái Nước, piah taong mek ikan oh kan min piah tui bruk ngak ini lac biak glaih glar, njauk nao meng dah page tal biar harei sup meng mai sang. Rilo harei sa-ai nao mai meng 70 – 80 km, min pabak veik ye jien mek tame hu rilo: "Nao rah rah jeng hu, blaoh nao atah jeng hu, labik halei hu ikan ye nao, tui anek ikan miat yau nan. Bilan hajan ini ngak lagaih jang dom bilan pandiak, jaik tasik hu ikan rilo jang. Jien xăng nao mai jeng labaih kurang dua rituh ribau đồng. Yaok harei jeng daok hu 400 – 500 ribau đồng, lisei sang ba tui. Yaom ikan tui janih, 30 – 40 ribau đồng, ikan prong meng meteh kg tagok ye pablei hu 60 – 70 ribau đồng/kg".

Ikan ini kalik janar, ralow laman, yamen, pahe, takik mbau hanye. Bhap bani labik ini bhian ngak lẩu, atau kho tương janih ikan ini. Ikan ini daok rilo di bhum taneh Cà Mau. Abih di nyu lac, di đầm Thị Tường – sa labik rivang ma-in hu angan di “Bhum taneh Puac langik” hu sản lượng ikan biak prong saong hu cap mek piah ngak jeng pandap mbang biak karei, duh ka tuai damuai mai rivang ma-in./.