Thun 2009, sa-ai Trần Tấn Giang duah thau ka bruk raong lanung dalam danao. Hadei di tuk pang ayut sahabat meyaih khan, sa-ai Giang duah thau ka  bruk raong, blaoh padang ngak 3 baoh danao, duah blei anek pajaih mai palao raong. Kayua oh ka hu ilamu dalam bruk palih ruah pajaih, nan ye sa-ai blei njauk lanung hamu mai raong, lanung raong oh prong, khat lahik biak rilo, sa-ai lahik phun jien buh tame saong pren mong iek.

Oh klaak hatai takre, gam raong menuk công nghiệp patak pataom phun jien, gam duah thau angaok tapuk, angaok báo, duah thau tapa dom blah mạng ka ilamu raong lanung pacang sre, tal thun 2019, meng mblang taneh di sang saong phun jien patak pataom hu, sa-ai Giang khang hatai padang labik raong lanung, hu ginup abih dom bruk lac: labik raong lanung amaik ame; labik pabam lanung sit; labik raong lanung ralaow; dom danao ia.

Khang hatai raong lanung, sa-ai nao duah labik blei 60.000 drei lanung  anek di miền Tây mai pabam. Gam ngak gam bac, pandar ilamu bahrau, hadei di jaik sa thun kuhria meng harei blei lanung anek mai pabam, sa-ai hu lanung pajaih, lanung raloaw saong palih ruah hu lanung amaik ame siam ka nyu caih mebaoh.

Ndom ka ilamu raong lanung oh hu giá thể, sa-ai Giang brei thau: danao raong mbuan puh ramik, oh njauk xịt rao giá thể nan ye patak pataom hu aia; meda tui iek hu bruk mek mồi saong pasang iek hu ruak kik angaok drei lanung, patrun ruak ký sinh dalam aia saong di drei lanung. Danao raong hu mbaok aia biar, hu aia takik, tuk aia nduac sre gam patak pataom hu aia gam khik ka danao raong tuk halei jeng hacih sa-at. Bruk caik ka aia nduac sre mikva tok peih ngak dalam melam, rami ramik aia tame tabiak gam gam dalam 12 tuk, samu haong jaik 200% aia dalam danao raong, tuk harei salih aia abih hadei di yaok mbang brei mbang.

Urak ini, labik di sa-ai Giang hu 50 danao piah raong lanung ralaow, yaok danao praong 5m2; 20 danao raong lanung amaik ame praong 25m2 sa baoh, haong 100 khay ấp baoh saong pabam lanung anek. Dom danao ba aia pabak ginup aia ka taong abih labik raong lanung.

Abih tih tapon lanung amaik ame hu jaik 600kg. Kuhria rah tapa yaok 20 harei pataom mek baoh sa mbang. Baoh hadei di pataom mek ye brei tame khay atau bình ấp hu nduac khí oxy. Piah ka baoh caih hu rilo, lanung amaik ame tuk juak gauk brei khik mbaok aia ka nyu laghaih, tuk lanung ngak sruh oh caik ka taneh glut jaleih pacang sruh di nyu, khik brei hu ginup hadah saong sap yava di labik raong.  

Baoh lanung tui vaktu bo sambo màu di nyu salih meng màu mbong, kanjik katam, kam, nâu, bhong. Meyah pilih ruah njauk sambo màu ye tuk ba nao ấp, baoh nyu caih hu  90%. Vaktu phôi baoh cak rok tal tuk caih jaik 7 harei. Tukvak pabam lanung anek tal lanung pajaih meng 80 - 90 harei.

Ngan haong 50 danao raong lanung ralaow, palao raong tui jalan yau Yuan lac cuốn chiếu. Yaok bilan palao raong 5 baoh danao. Yaok baoh palao raong 2.000 drei lanung pajaih. Pandap mbang di lanung lac haleik công nghiệp hu độ đạm meng 40% tagok, pabak men tiêu hóa định kỳ piah pacang caga ruak jalan tung pruac. Hadei di 12 bilan, lanung prong 4 - 5 drei/kg nan lac mek pablei.

Urak ini yaok thun sang sa-ai Giang pablei jaik 20 tấn lanung ralaow tabiak darak pasar. Jien mek tame labaih 2 tỷ đồng sa thun. Darak pasar pablei tabiak nan lac dom tỉnh Khánh Hòa, Ninh Thuận, Đồng Nai. Oh lac tok ngak kaya meda ka sang drei, bo sa-ai Giang bhian tacei pato saong klah rabha ilamu raong lanung ka dom baoh sang dalam palei./.