Dahlau deih, sang ong Tải Văn Thạnh, bangsa Khmer, daok di palei Lưu Cừ 1, xã Lưu Nghiệp Anh, (huyện Trà Cú) lac sang raong pabui mbong meng kan. Min kayua jien buh tame glaong, jit ruak rilo saong yaom kaom oh tani tanat, sang ong bhian khat lahik. Meng tuk salih tapa raong pabui glai, jien mek tame di sang ong Thạnh hu rilo.

Ong Thạnh brei thau, pabui glai ong raong lac pajaih lai. Pandap mbang di pabui lac njam puan, njam bei, patei, njam baok saong dom pandap klaak di kaya nong. Kein laba meng bruk raong pabui glai glaong jang dut saong raong meng pandap mbang kong nghiep. Meng tapon pabui caga pablei tabiak hu yaom 90 ribau dong yaok kg, ong Thạnh kuhria mboh lac jien mek tame hu yaok pilih trieu dong.

Pabui glai hu prein pacang haong langik tasik siam jang dut saong dom pajaih pabui palei, kayua nyu lac athur glai. Ralaow pabui glai hu rilo thar saong pahe bingi jang nan ye hu darak pasa biak takre. Urak ini, urang kak kaiy hu mbaoh tangin pambuak bruk blei abih mbong haong yaom 90.000 - 100.000 đồng/kg. Tui yaom pablei urak ini, urang raong hu laba labaih 3 triệu đồng yaok drei pabui.

Daok saai Trần Thị Thu Ba daok di palei 12, xã Long Hữu, ban sit Duyên Hải bhian khat lahik kayua raong limo nan ye blei 10 drei pabui glai lai mai raong iek. Harei harei, saai Thu Ba brei ka pabui mbang njam bei pala vil val sang saong phun patei. Tok hadei di 2 bilan meteh, tapon pabui di saai trak meng 30 - 35kg sa drei saong meda pablei hu. Saai Ba brei thau: “Ini lac mbang camriep dahlak raong pabui glai, min mboh mbuan raong dut saong pabui mbong. Raong pabui glai tok abih jien blei pajaih bo oh abih jien blei pandap mbang, takik ruak. Kayua yau nan ye, ini lac bruk ngak lagaih ngan haong dom sang raong sit sot yau dahlak”.

Tui Pasak pachreih nong tỉnh Trà Vinh pabui glai lac athur raong biak bahrau ngan haong mikva daok pak ini. Bruk ba pajaih pabui glai lai tame raong di mikva urang ngak nong lac lagaih haong jalan ba tabiak lac parilo janih athur raong di gah ngak nong tỉnh.

Pasak Pachreih nong Trà Vinh hu daong ka urang ngak nong mateh phun jien blei pajaih trak 8kg sa drei soang mateh jien jru vacxin haong jru pametai anek ruak var raong. Dalam tuk raong, pasak hu urang jakar ky thuat trun daong tapak, tacei pato ilamo. Gam haong nan, jeng hu pambuak bruk duah dom labik blei atau labik sik ralaow piah hu labik pablei ka dom sang raong pabui. Ong Lưu Văn Phúc, Akaok Jabat raong glang – Pasak Pachreih nong tỉnh Trà Vinh brei thau, “Bruk raong pabui ini oh lac ba bruk ngak saong patagok jien mek tame ka urang ngak nong, bo daok pandar hu pandap labaih, pandap klaak di kaya nong, yau njam patam, baoh karaoh saong pandap mbang hijao. Nyu jeng daong tame bruk salih jalan raong glang klak tapa bruk raong pabui tui jalan cak rok patagok khang kajap. Tapa nan daok ba mbuan lagaih ka dom baoh sang raong glang hu mbaok tame raong, bac megru saong klah rabha ilamo haong gauk"./.