HTX raong kiuk Phát Đạt, di xã Nhuận Đức, huyện Củ Chi, TP. Hồ Chí Minh hu taneh praong abih tih 5ha. Urang ba akaok nao dahlau dalam bruk raong kiuk di pak ini, lac sa-ai Dương Đình Tình. Meng thun 2017 - 2018, sa-ai Tình duah thau saong ba tangin tame padang labik raong kiuk angaok taneh di sang haong 2 danao raong. Sa-ai ravang iek bruk raong kiuk di tỉnh Tây Ninh saong salih tapa ngak danao tauk bạt raong kiuk pajaih, mek hu rilo siam lagaih.

Piah daong dom baoh sang raong dalam xa saong piah duah labik pablei, thun 2019, meng bruk daong di Kapul urang ngak nong palei, sa-ai Dương Đình Tình dang tabiak padang HTX raong kiuk Phát Đạt haong 7 urang. Taphia bruk tacei pato ilamu kỹ thuật ka dom urang dalam HTX, sa-ai Tình daok sahneng duah, salih bharau jalan raong kiuk piah ba mai kein laba glaong.

Salih ka bruk raong kiuk dalam danao, HTX buh jien ngak dom talei bingun meng kiak, nền bê tông, parabha jeng rilo ô karei gauk pak di dalam bein sang. Sa-ai Mai Huyền Đệ - urang dalam HTX brei thau, meng hu daong ilamu di HTX nan ye sa-ai thau cambaih bruk raong kiuk saong dak harei dak mbuan lagaih. Tui sa-ai Đệ, labik ngak bingun xi măng raong kiuk brei lahơi bingi, joa kandang. Vil val labik ngak bingun meda pala phun hijao piah pacang meneing ia harei atau pandar halam nylon pacang veik min oh pacang abih kayua kiuk caong hu ia harei meng langik.

Dom bingun raong hu parabha jeng rilo ô jaik taphia gauk, pak kreh hu jalan nao lagaih ka bruk iek glang. Gah langiu labik raong meda pandar lưới thép piah pacang glaong, plaih ula, takuh…palai kaik.

Tui sa-ai Tình, raong kiuk dalam danao biak kan pasang iek jit ruak, kiuk diuk takik, lahik rilo. Min tuk salih tapa raong kiuk dalam bingun xi măng angaok thu, meda trun hu dom bruk oh lagaih nan. Urak ini, HTX Phát Đạt ngak tui 2 jalan raong lac raong trệt saong raong angaok sạp. Raong trệt lac brei kiuk daok la di mala mbat danao, ia dalam meng 5 - 6cm. Raong angaok sạp kayau ye ia dalam meng 20 - 30cm, yaok 2 harei dom urang dalam HTX brei salih ia sa mbang piah khik ka ia hu siam, hacih.

Bruk jak jeng di HTX Raongkiuk Phát Đạt lac raong kiuk meng phun jru. Dom janih phun jru yau ye tỏi, phun cỏ mực… hadei di tuk chai lac janih kháng sinh biak siam piah pacang caga ruak ka kiuk. Tuk raong pajaih hu 2 bilan meteh, dom urang dalam HTX thaok tỏi srau haong pandap mbang ka kiuk. Tuk mboh kiuk aih craoh, urang raong thaok cỏ mực srau haong pandap mbang piah pasiam jalan tung prauac...

Ralow kiuk lac pandap mbang hu rilo dinh dưỡng daok hu rilo menuac takre. Jaik abih dom pandap mbang dalam dom quán nhậu, dom nhà hàng jeng hu kiuk haong rilo angan ieu karei di gauk. Nan ye, urang dalam HTX Raong kiuk Phát Đạt oh huac oh hu labik pablei kiuk.

Meng pandar ilamu bahrau dalam bruk raong, kiuk pajaih di HTX hu rilo labik raong kiuk dalam taneh ia caik hatai jia. Dom kiuk pajaih hu HTX rami ramik raong iek tui darak pasar nan ye tani tanat saong patrun hu dom khat lahik.

Urak ini dom kiuk raong di HTX ginup pabak meng 1 - 2 tấn yaok harei. Yaom drei kiuk daok diuk pablei lẻ 50.000 đồng/kg, daok kiuk hu ngak ralow hacih blaoh yaom 100.000 đồng/kg. HTX daok hu padang fanpage kiuk Phát Đạt angaok Facebook, Zalo saong padang website Trại kiuk Phát Đạt, ba mai siam lagaih dalam bruk yaih khan saong pablei kiuk pajaih, kiuk ralow.

Sa-ai Mai Huyền Đệ - urang dalam HTX brei thau, sang sa-ai hu labaih jien ndo, drap ar lac mai meng raong kiuk meng phun jru. Meng 1.000 yau (gu) kiuk pajaih, tuk kiuk ralow oh ginup pablei, yaom kiuk pajaih tagok tal labaih 900 đồng sa drei hu ba jien tame ka sang sa-ai sa rituh triệu đồng./.