Sa-ai kamei Nguyễn Thị Hồng Mơ daok di ấp 3, xã Thạnh Hòa, huyện Phụng Hiệp, tỉnh Hậu Giang hu 1ha taneh dahlau daih tok pala pa-ok Đài Loan. Min janih phun pala ini kein laba oh glaong, labik pablei oh tani tanat. Atah di ini 3 thun, sa-ai Mơ hu ramik ngak pasiam veik bein saong blei phun dâu tằm meng Đà Lạt mai pala. Tuk camereip, sa-ai pala iek dom phun, hadei di nan, mboh phun lagaih haong bhum taneh bahrau, tamuh siam saong bruk caong blei baoh di mikva dalam bhum lac rilo nan ye sa-ai khang hatai pala pabak jaik 700 phun. Urak ini yaok thun sa-ai Mơ paik baoh hu 2 mbang, yaok mbang hu 5 tấn. Tui yaom pablei meng 50.000-60.000 đồng sa kg, hadei di tuk kaoh abih phun jien buh tame, sa-ai daok laba hu labaih 100 triệu đồng sa mbang.

Taphia nan, sa-ai Mơ daok hu raong takuh Hamster, raong menuk palao dalam bein, raong ikan dalam danao tui jalan ngak lac, mek pandap labaih di phun pala, athur raong ini piah ngak pandap buh ka phun pala, athur raong karei. Meng ngak yau nan bo sa-ai Mơ trun hu phun jien buh tame, tagaok hu kein laba. Sa-ai Nguyễn Thị Hồng Mơ daok brei thau lac: “Urak ini drei daok raong takuh Hamster. Dom mùn cưa, dom pandap tauk ka takuh ye mek tabiak ngak khak, daok dom pandap mbang labaih di takuh drei ngak pandap mbang raong menuk bein, raong ikan. Urak ini daok palao raong 5000 drei ikan tai tượng. Nyu abih takik jien blei khak saong pandap mbang ka ikan. Urak ini bein dâu daok tut angan Vietgap baoh kayau hacih, lac oh hu pruh jru tapak tame baoh bo tok pandar khak hữu cơ atau jru sinh học piah pruh ka phun dâu tamuh siam.”

Tui ong Trần Văn Tuấn – Akaok Jabat ngak nong saong patagok palei pala huyện Phụng Hiệp, dâu tằm lac janih mbuan pala, takik prein sangka, takik ruak kik halak halin, hadei di 1 thun pala, phun hu baoh. Yaok mbang paik baoh dalam 1 bilan, blaoh hadei di nan tok cakak dhar, buh khak piah ka baoh tabiak veik mbang hadei di nan. Bruk ngak di sa-ai Mơ hu ba mai kein laba glaong ka sang, daong cakrok kinh tế sang urang nong saong peih tabiak sa jalan nao bahrau dalam bruk salih janih phun pala, athur raong takik kein laba tapa janih phun pala, athur raong hu kein laba glaong jang.

“Menuac sia di miền Tây blei dâu tằm biak rilo. Urak ini urang thau ngak dâu that, ngak si rô dâu, ngak alak dâu… kayua nyu hu biak rilo dinh dưỡng bo tuk urang blei meng Đà Lạt mai tal ini oh daok that nan ye bruk ngak ini lac biak siam lagaih. Daok kein laba kinh tế, kuhria tabiak bruk pala dâu tằm pambuak haong raong takuh Hamster brei kein laba glaong, jaik 300 triệu sa thun, dalam nan kein laba meng pala dâu hu 220 triệu saong raong takuh hu 80 triệu.”

Langiu di jien mek tame yaok ratuh triệu đồng meng pala dâu tằm, raong takuh Hamster, sa-ai Mơ daok hu jien mek tame oh takik meng raong menuk palao bein. Taphia nan, sa-ai daok hu ba bruk ngak gam gam ka 8 tal 10 urang ngak dalam palei, haong yaom jien mek tame meng 5 tal 6 triệu đồng yaok bilan meng bruk sangka, iek glang, paik baoh dâu tằm.

Urak ini sa-ai Mơ daok buh jien ramik ngak pasiam jang bein dâu piah ngak jeng labik du lịch sinh thái. Taphia di bruk pala dom janih phun mbang baoh ka bein hu rilo janih jang, sa-ai Mơ daok cakrok dom pandap hu ngak meng baoh dâu tằm yau dâu sấy, alak dâu, mật dâu,…  piah peih bruk ravang iek, duah thau, ba drei tame paih baoh, mbang huak di bein. Tuk camereip, labik du lịch di sa-ai hu taduan raok rilo kapul tuai du lịch mai ravang iek saong duah thau./.