Bruk raong menuk Peru di sa-ai Võ Hoàng Vinh daok di xã An Hiệp, huyện Châu Thành, tỉnh Sóc Trăng hu rilo menuac thau tal kayua urak ini dalam var menuk di sa-ai hu labaih 100 drei manuk anek saong rilo drei manek amaik ame piah pabam pajaih, padang veik tapon.

Sa-ai Vinh khan lac, manuk Peru hu yaom glaong, menuac di dom tỉnh: Sóc Trăng, An Giang, Hậu Giang saong Bạc Liêu… mai duah blei piah mek pajaih saong raong iek me-in. Mboh bruk raong manuk Peru hu kein laba, sa-ai  brei peih praong var ro saong blei mac kram baoh. 1 drei manuk Peru hadei di tuk raong hu 2 bilan ye brei daok karei. Janih manuk ini meyah mek baoh gam gam meda caih baoh hu rilo, jaik 13 baoh. Meyah pandar mac kram baoh ye meng 19-20 harei, baoh nyu caih. Ndom ka yaom, baoh manuk pablei yaom 200.000 đồng sa baoh. Daok manuk raong meng 6-8 adit pablei hu yaom 600-800 rabau đồng sa drei. “Dom menuac mai blei lac dom menuac takre raong menuk, urang meda raong iek, blaoh blei nao piah mek pajaih. Manuk trak meng 3kg tagok lac menuk praong ye urang biak takre. Thaik thaok di nyu mekre jang gà nòi di drei. Bhian di nyu, drei pablei angaok dom blah mạng yau ye tik tok, zalo, facebook, drei ba tagok nan pablei, dom tỉnh ban urang kakei blei drei jeng jao brei abih, bhian di nyu drei pablei menuk anek.”

Urak ini bruk raong menuk ini brei mboh hu kein laba tapa bruk pablei baoh manuk, pajaih manuk anek…yaok thun sa-ai duah hu meng 200-300 triệu đồng. Ndom ka ilamu raong manuk Peru, sa-ai Vinh brei thau: “Menuk anek ye drei brei daok karei piah mbuan raong, sa var ro meng 1-3 drei, meyah drei raong dalam sa var ro rilo menuk ye manuk nyu caoh gauk, njauk rambuas saong lavik lavik harei nyu matai nao. Dua tra lac khik ramik ia hacih saong pandap mbang ka manuk. Pandap mbnag oh caik ka nyu ma-ih, daok ia ye oh hu thur mur mbuan ngak ka manuk njauk ruak jalan tung pruac. Pandap mbang ka manuk njauk pabak njam patam baoh kraoh ka manuk praong khang kadang”.

Meng kein laba kinh tế, bruk raong manuk Peru di sa-ai Võ Hoàng Vinh hu jeng bruk padang mbang ngui di Đoàn xã An Hiệp piah ka dom dam dara urang ravang iek bac megru, ngak tui jalan padang mbang ngui di dam dara, urang daok ranaih. Bahrau ini, sa-ai Vinh daok hu Gilang pariak sarak karja huyện brei mesraiy 90 triệu đồng piah peih praong bruk raong manuk. 

Sa-ai kamei Võ Ngọc Huỳnh, Bí thư Đoàn xã An Hiệp, huyện Châu Thành brei thau, sa-ai Võ Hoàng Vinh lac urang đoàn di Chi đoàn palei An Tập, hadei di tuk duah thau dom bruk ngak, sa-ai khang hatai ba pajaih manuk Peru meng An Giang mai raong tal harei ini mek hu kein laba glaong. Ini jeng lac urang likei takre bac megru, hu hatai kham merat yam tagaok cakrok kinh tế: “Tapa 1 thun mboh hu kein laba rilo. Yaom kinh tế di drei manuk mai meng bruk pablei baoh saong manuk pajaih. Baoh menuk pablei yaom 200 rabau đồng sa baoh. Manuk anek meng 6-8 adit pablei yaom 600-800 rabau đồng sa drei. Labik pabak menuk ini hu biak rilo labik raong manuk di Cần Thơ saong Hậu Giang mai duah blei janih manuk ini. Meng nan, mboh hu laba biak glaong.”

Meng bruk raong manuk Peru di sa-ai Võ  Hoàng Vinh nyu brei mboh bruk khin sahneng, khin ngak, hatai kham merat yam tagok di dam dara urang daok ranaih, daong ba bruk dam dara ngak mbang naih joi di palei dak harei dak cakrok, patagok jang./.