Ndih tapui thun 1994, bac tamat Sang bac ĐH Nông Lâm TP. Hồ Chí Minh, hadei di rilo thun ngak bruk di TP.HCM, sa-ai Trần Chí Công, daok di xã Tân Hưng, huyện Hớn Quản, tỉnh Bình Phước klaak ban raya mai palei ngak nong.

Sa-ai Công brei thau ka bruk pala bingu lan angaok taneh Bình Phước: “Tuk camereip, dahlak likau tame ngak di trang trại pala bingu di huyện Củ Chi, TP. HCM kayua nyu njauk haong bruk bac di drei. Hadei di nan, mboh laba meng bingu ba mai ka urang pala, dahlak caik hatai bac megru ilamu meng po bein saong sahneng tal bruk pala bingu di palei drei lac Bình Phước”.

Hadei di tuk sahneng kuhria, janih bingu hu sa-ai Công pilih ruah lac lan mokara. Ini lac janih bingu hu rilo siam lagaih, yau ye: mekre, bingu praong, rilo bingu angaok sa dhar, sambo hadah, tabiak bingu luac thun. Phun biak khang kadang, tamuh siam, tabiak gha rilo saong samar, takik hu halak halin. Abih di nyu nan lac janih bingu ini biak lagaih haong langik tasik Bình Phước. Hu bruk pachreih tui di abih gauk dalam sang, thun 2019, sa-ai Công padeih bruk blaoh mai palei padang mbang ngui.

Lan mokara pala 6 bilan lac tabiak bingu, min bingu siam di abih lac tuk ginup 1 thun. Tuk camereip, meng phun jien di sang, sa-ai Công padang bein pala labaih 1.000m2 taneh. Piah patak pataom jien sahui, sa-ai ngak taong abih dom bruk, meng padang khung sang halam tal ngak bồn pala bingu. Tui sa-ai Công, janih bingu ini takre pandiak min brei ngak sang halam, pandar halam jhuk pacang piah trun hu meteh pandiak saong pacang bruk palai kaik di halak halin. Patui di nan lac ngak dom ro bingu, yaok ro meda pala meng 2-3 talei, praong meng 60cm-1,2m sa ro. Hadei di nan, caga kanduh ratak haluk, tuk blei mai brei ngak hacih anek ruak dahlau di tuk ba tame ro pala. Hadei di 1 thun pala iek mboh siam, sa-ai peih bein ka 2 praong 1.500m2.

Urak ini, bein lan mokara di sa-ai Công daok pablei ka dom shop bingu di Bình Long, Phước Long, Hớn Quản. Yam lan mokara meng 5.000 - 7.000 đồng sa dhar. Tui yaom pablei ini, urang pala meda mek veik hu phun jien hadei di labaih  1 thun pablei bingu. Tukvak pablei bingu biak atah, meng 5-6 thun, tal tuk phun lan taha meng buac klaak blaoh pala veik.

Amuk Nguyễn Thị Trang, Phaok akaok UBND xã Tân Hưng brei thau: “pala lan công nghiệp lac bruk ngak bahrau di Tân Hưng, pabak hu bruk salih janih kinh tế ngak nong di puk palei. Meng kein laba di bruk ngak ini, kol dahlak caong lac urang đoàn dam dara, urang ngak nong meda bac megru ilamu, ba tame ngak angaok dom mblang taneh lagaih, meng nan, paglaong jien mek tame ka sang”

Jak jeng haong bruk ngak di drei, sa-ai Công halan hatian klah rabha ilamu pala, iek glang lan mokara ka urang đoàn dam dara saong ka rahra daok jaik taphia drei./.