Bruk pandar công nghệ halin payeng iar raong ariang dalam garaong katak hu ai kamei Nguyễn Thị Quyên meng thun 2023 buh jien labaih 400 triệu đồng. Saai hu karja daong 180 triệu đồng. Bih jien ralo di abih brei ka 1 hệ thống pakuang bê tông, gam haong jammaraik, janih brei halin ia nao mai, pahacih iar brei ka bruk raong ariang dalam garaong katak.

Garaong pakuang saai Quyên brei raong ariang praong 30m2, gam haong labaih kurang 300 baoh ndaop dak angaok gauk. Dalau di nyu, karja daong saai Quyên raong ariang yếm pak mata jeng ariang 2 kulik (cua kom). Tapi min, gait ngak ieik brei “palimek” ariang oh hu baoh jeng ariang hu baoh kiak dan haong ariang hu ralo laman kanduh jeng  ariang khal ralo. Saai Nguyễn Thị Quyên khan lac:“Adei mboh raong ariang oh hagait kan. Siam di nyu njauk pilih pajaih ka tanat. Tuk drei ba ariang tame raong drei tut harei blaoh, tal tuk halei nyu jeng ariang hu  baoh kiak, ariang dua kulik drei labaih thau. Raong ariang njauk caik hatai, ieik glang meng peih gom manek atau ieik yếm di anek ariang piah thau pablei hu atau ka oh.

Pajaih ariang piah “palimek” haong kein raba glaong abih tuk ariang ka oh hu baoh kiak. Tui ai Quyên, yaom di ariang kiak dan haong ariang 2 kulik yau gauk, min tapi masa brei ka ariang kiak brei pablei do 2/3 dut tui ariang 2 kulik.

Yaok baoh katak raong 1 drei ariang. Ia brei raong ariang hu brei halin nduac nao mai luac 24/24. Saai Quyên brei “pamamek” ariang meng công nghệ halin iar nao mai 5 vụ. Tui janih ariang bo masa raong glang meng 20 – 40 harei, jien mek hu meng 5 – 7 triệu đồng/ sa vụ. Njauk ndom mayai dalam nan hu dom harei tame Tết atau dom harei raya praong, yaom kaom hu tagok glaong kein raba tagok glaong 2 mbang.

Bruk halin iar nao mai brei ka raong ariang dalam ndop katak di saai Quyên daong ka bruk ieik glang tani tanat alam môi trường jeng ye dom janih raong glang. Bruk ngak mboh jeng glaong, khik hu tantu raba. Ông Võ Văn Nhớ, urang di jabat ngak Nông - Patagok bhum palei huyện Cái Nước, taong yaom lac:“Danak dak pandar công nghệ halin ia nao mai raong ariang, khat kurang meng 10 – 20%. Tal mbang ka 3, mbang ka 4 urang raong bac magru hu ralo dalam bruk pilih pajaih ariang haong halin pilih ariang, tapa di nan paglaong hu ariang raong, pakurang hu ariang lahik meng 5 – 10%”.

Ông Trần Thanh Liêm, Akaok Pahasa kapul urang ngak Nông xã Tân Hưng Đông brei thau, bruk raong ariang dalam ndop katak kein lagaih praong kayua oh cang mblang taneh praong piah raong. Urang raong tuk halei jeng raong buh raong hu jeng ye bruk raong khin pablei tui hatai piah mek raba glaong di abih:“Bruk raong ariang di saai Nguyễn Thị Quyên daok ngak meng ariang kurang baoh kiak jeng ariang hu kiak baoh, daok ariang yếm pak mata jeng ariang 2 kulik. Tui taong yaom mboh bruk raong ariang ba mai hu ralo raba. Bruk raong ariang yau saai Quyen oh cang bih ralo taneh. Masa tuk vak mai tal mada papraong bruk raong ariang brei ka mikwa dalam xa”.

Bruk “Pandar công nghệ halin nao mai raong ariang dalam ndop katak” oh mada cuang kandah ka môi trường alam; mbuan sanang ieik glang, raong ba, pilih tui hatai bruh buh pajaih ariang jeng ye thau harei brei mek pablei. Bruk ngak ini daong ka saai Nguyễn Thị Quyên blei salih mek jien karo. Mada yaom lac bruk raong ariang njauk buh jien ralo tuh camreip dalau min tapi dom vụ raong mbang raong hadei oh bih ralo jien. Bruk raong ariang yau ye khan mayai ieu lac sa jalan barau daong brei ka urang ngak mbang raong glang pilih ruah tame bruk ngak mbang blei salih di bhap bini rah ra palei pala./.