Sang sa-ai Nhiệm bhian blei saong pabak arieng, hadang tabiak darak pasar. Dalam tuk blei arieng, plaih caik lavik arieng metai, sa-ai Nhiệm palao raong di dalam danao raong hadang. Kayua arieng palao saong gauk meda meblah mek pandap mbang mbuan jaruh ginraong, nan ye sa-ai Nhiệm sahaneng tal bruk pandar dom pa-op katak caik karei yaok drei piah palao raong. Sa-ai Lê Hữu Nhiệm khan lac: “Tuk camereip dahlak oh sahneng tal bruk palimek bo blei arieng rilo mai palao raong piah plaih lahik ia, trun tek trak. Blaoh drei mboh lac tapa nan arieng nyu karei jang. Dahlak ngak iek meng pa-op katak, blaoh ba ka urang karei mbang piah taong yaom. Tapa 16 urang mbang iek, jeng taong yaom lac arieng nyu bingi jang”.
Meng nan, sa-ai Nhiệm tame bruk palimek arieng. Jalan ngak di sa-ai biak mbuan, tok lac tual dom pa-op katak mala mbaok ia danao hadang, palao arieng tame saong brei ka nyu mbang yaok harei. Dalam tuk ngak, sa-ai Nhiệm mboh lac ralow saong gạch arieng nyu bingi jang, drei arieng jeng trak jang biak rilo. Hadei di 10 harei palimek, dom drei arieng trak meng 200 – 700 gram jeng tagok kilo jang labaih 10%, daong ka sa-ai hu laba rilo jang. Sa-ai Lê Hữu Nhiệm daok brei thau lac: “Hadei di tuk drei cap mek arieng blaoh, drei palao tame pa-op raong piah pachreik ka arieng mbang ikan dalam 10 harei. Ngak yau nan ka arieng hacih labar. Ralow arieng pahe jang, gạch mbang langeim jang, oh phik phik yau dom drei arieng drei bahrau mek meng danao hadang tagok”.
Sa-ai Lê Hữu Nhiệm, daok hu 100 pa-op katak piah palimek arieng. Arieng palimek di sa-ai hu urang blei mbang taong yaom glaong. Urak ini sa-ai Nhiệm daok peih praong bruk ngak ini ngan saong 1.000 pa-op katak piah pabak arieng siam jang tal urang blei mbang saong hu kein laba glaong jang. Sa-ai brei thau, suai lavik, sa-ai blei rilo pa-op katak jang, saong tacei pato bhap bini dalam palei jalan raong, blaoh blei veik taong abih arieng di mikva raong hu, haong yaom glaong jang meng 5.000 tal 10.000 sa kg duk saong yaom darak pasar.
Gah ngak nong palei mboh lac bruk ngak ini daok peih tabiak jalan nao bahrau ka urang nong dalam palei, daong ka mikva urang nong ngak kaya meda angaok mblang hamu di drei./.
Viết bình luận