Bingu kuk hu jeng sa makna angan di dalam raidiuk, patuah jamo saong bui sambai selamat. Makna di bingu kuk dalam ilamo Viet Nam hu makna ka dom ilamo siam gheih di anek menuac Viet Nam lac trung, tín, hiếu, nghĩa ieu lac tapak hatai – hatai jie – thau dhar thau phol. Kayua yau nan ye mboh yaok mbang raya Tet mai, yaok urang bhian parang yaih bingu kuk dalam sang saong caong ka rilo bruk siam gheih hu mai tame tal baoh sang drei.

Oh daok do yau nan, bingu kuk jeng ieu lac janih bingu hu angan makna ka bruk diuk suai atah thun umo jeng yau pabak phol ka urang pala. Ngan haong thaik thaot bingu vil, bar sambo kanyik that cangaih, abih di nyu nan lac bingu kuk kanyik lac hu makna ka bruk pacatuah jamo, ndung bak prein diuk. Tuk halei jeng hu makna ginup kaya meda, raidiuk suai atah thun umo.

Hadei ini lac dom ilamo pala phun bingu kuk rak chroh njauk harei Tet:

Tukvak pala:

Khol drei meda pala bingu kuk yaok thun, min bilan rak chroh di janih bingu ini jeng lac bilan harei Tet Nguyen Dan.

Ruah pajaih:

Phun kuk meda pala meng asar atau phun anek. Khol drei brei duah blei janih asar pajaih kuk kanyik di dom labik hu angan je njauk piah khik siam kajap jeng yau bruk tamuh phun di asar.

Tanut siam piah ruah phun anek brei hu glaong meng 5-7cm, hu meng 5-7 hala, rup phun hu praong labaih 0,2cm, agha atah meng 0,5-3cm saong hu rilo jang 4 agha.

Bruk cara sangka:

Piah ganap sampurana ka phun praong khang kajap saong gheih ye brei drak khak 2 mbang (dahlau tuk trun pajaih) saong drak (dalam tuk phun daok cakrok tagok).

Dom janih dalam khak drak: Khak nenuk, khak limo, khak NPK, khak KNO3, khak laning trun que… Lai pamaluk haong ia saong pruh vil taom dal takai phun, plaih pruh ia tagok hala kayua ngak ka phun mbuan kanyik hala.

Bruk tuh ia ka bingu kuk kanyik: Brei bhian pruh ia khik taneh tasah meng 70 - 75%. Oh pruh ia di waktu masa melam kayua mbuan ngak brei ka anek ruak tamuh.

Cakak hajung: Ini lac sa dalam dom bruk hu makna dalam bruk pala saong sangka bingu kuk, bruk cakak hajung saong dom dhan labaih piah pataom brei hu prein piah cakrok patagok bingu praong samu gauk saong gheih.

Min, ngan haong yaok janih bingu kuk hu bruk cakak hajung karei di gauk. Ngan haong bingu kuk hu pajaih bingu praong yau kuk đại đóa, kuk kanyik Da Lat hadei tuk pala meng 15 – 20 harei lac meda cakak hajung tok caik gilac meng 3 – 5dhan.

Ngan haong bingu kuk hu pajaih bingu sit ye bruk cakak hajung jeng brei cakak meng 15 - 20 harei hadei di pala, ngak 2 – 3 mbang cakak hajung piah hu rilo dhan sit. Tuk phun hu brei choh bingu, bruk cakak choh jeng hu ngak bhian, cakak dom choh bingu labaih.

Bingu kuk njauk caik hatai caga ralo pandiak, pandiak khang, tanriak hadah rilo jeng meda mbuan ngak ka phun kuk tabiak bingu samar drah, njauk caik hatai tuk nyu jaik tabiak.

Ngan haong bruk ini, khol drei brei pandar nyuel pacang pandiak piah patrun bruk phun gaok pandiak khang pandiak ralo, daong ka phun meda rak chroh njauk harei caong. Karei di nan ngan haong bilan kurang tanriak hadah ye khol drei brei truac gom tagok piah pasiam tukvak rak chroh bingu di phun kuk./.