Bac tamat đại học, diuk pasang saai Dương (umo 35 thun) - Lê Hồ Thùy Linh daok veik TP HCM padang mbang ngui. Hadei di rilo mbang ngak oh hu, dua diuk pasang saai mai veik palei padang mbang ngui. Mai palei njauk tuk yuak padai, dua diuk pasang pala iek bimao pon meng ilamo hu bac magru blaoh. Hu gauk gar daong brei 25 paok pon, Dương pilih ruah 11 paok pa-auk dahlau, caik tagok kệ krem 3 m2. Jaik 1 bilan hadei dom pon ini bimao tamuh bak abih, paik hu 4 kg. Meng nan salih ka bruk pa-auk di mangaok kệ, dua diuk pasang ngak sang kathaop sit, pa-auk 14 paok pon daok veik. Bimao tamuh tagok biak rilo paik hu 39 kg, min ka oh thau cambaih ilamo nan ye phun bimau daok jhak, jhuk yau dang, takik urang blei.

Abih tih bimau paik hu laba 2 trieu dong, diuk pasang mek mateh blei pasei ngak jeng kệ, padang ngak jeng sang kreih pala bimao. Meng sa kệ pasei, blaoh tagok jeng dua kệ. Gam ngak, gam bac, dua diuk pasang nao grauk dom bhum pala bimau miền Tây bac magru ilamo.

Meng sa sang kreih pala bimau, urak ini tagok pala 4, 14 blaoh 24 sang kreih saong mboh lac yaok sang nyu karei di gauk: sang daok di akaok jalan rok rilo ia harei nan ye biak pandiak, sang mala halui phun lac pathah, sang pak labik hangin ye thu pon. Piah khik ka bruk pala hu samu yau gauk, yaok baoh sang bala bimao, saai Dương njauk salih jalan ngak ka nyu lagaih.

Thau cambaih ilamo pala bimao, yaok bruk jeng hu vak gilac cambaih laih, meng jalan pa-auk pon, pandap blei tame, tukvak, dom bimao paik hu. Hadei di yaok mbang, dua diuk pasang pataom veik, duah dom makna ngak brei salih năng suất.

Hadei di 5 thun peih bruk pala bimao, dom sang kreih di diuk pasang saai Dương dak harei dak rilo. Jien laba labaih 600 triệu đồng, dua diuk pasang pandar abih ka dom bruk roh duah, ngak pasiam veik, buh tame sang pala. Bilan 3 thun ini, dua diuk pasang likau sang mblang taneh praong 2.000 m2, padang bilik khang kadang piah pala bimao mbuan pasang iek, tukvak pandar sang pala atah jang.

Yaok bilik pala bimao praong 15 m2 padang ngak meng kiak, tauk xi măng. Bilik hu pacang ndaoh di gah langiu, caik kadi piah yuk pandiak tabiak langiu, khik nhiệt độ gah dalam di tanut 37 độ C.

Yaok mbang pala bimao bhian dui atah labaih 30 harei ngan haong dom bruk ngak, yau ye pa-auk pon, ba tame bilik, ngak hacih meng hơi ia, pabam pajaih, iek glang saong paik mek. Tui saai Dương, bruk kan di abih tuk ngak bimao lac langyah pon tamo blei tame. Saai Dương daok tui iek jalan ngak bhian randap di po padai, pon hacih atau daok kadaong dom janih jru hóa chất piah langyah ka nyu lagaih, daong ka bimao praong siam. Tuk ba tame pa-auk, saai mek cur piah pametai jru mek ka pon, pambuak haong bruk ngak hacih meng hual ia, tuk pon hacih meng ba tame pala ngak.

Tui kuhria, yaok bilik meda ngak hu meng 8-12 vụ yaok thun, mek tame 30-35 kg bimao sa vụ. Tui nan, yaok bilan mek hu 1,4 - 1,8 tấn bimau, jien mek tame 70-80 triệu đồng. Hadei di tuk kaoh abih jien sahui, jien pah urang ngak, diuk pasang saai Dương laba hu 35-40 triệu đồng, rilo jang 2-3 mbang dut saong jalan pala meng kan.

Saai Dương brei thau, meng jak jeng tuk camriep, tui kuhria meda salih jalan ngak ka mikva urang nong hu hatai caong, diuk pasang saai meda mbaoh tangin tame pataom blei gilac veik di mikva piah ngak bimao tui jalan ngak kong.

Ong Nguyễn Minh Ngọc, Bí thư huyện Tân Hồng, taong yaom ka jalan pala bimao pon dalam sang di saai Dương lagaih haong prein khang di palei, pandar hu pon labaih. Bruk pala hu pambak praong meda daong ka rahra hu jien mek tame langiu di bruk ngak padai. Anak tal huyện hu daong ka po pala bimao padang angan pablei salih, tut angan OCOP bhum palei – yaok xa sa pandap./.