Ngak jeng janih gluh blaoh tuh ia tame lai ka nyu mbrang piah buh ka phun pala

Tui dom urang ilamu gah dinh dưỡng phun pala, hu rilo janih piah ka phun pala khang kadang, min pataom veik oh kurang hu 3 janih dưỡng chất hu takik dalam langik tasik di kol drei lac nitơ (N), phốt pho (P) saong kali (K).

Khak athur: Khak ini hu gam khak manuk, khak limo saong khak saih bhian hu rilo nitơ, phốt pho saong kali. Min kayua hu amoniac glaong saong meda ngak tasak phun. Kayua yau nan ye, mikva njauk pa-auk khak dalam dom mbuk pa-auk pandiak saong caik ka khak nyu ralai, bruk, dahlau di tuk ba nao drak dalam bein. Daok khak tapai hu lượng amoniac bier nan ye meda buh tapak ka phun pala.

Dom janih talang: Tapung talang hu brei thau lac pandap ngak pasiam taneh biak rilo bo urang ngak bein di rilo labik bhian pandar, min takik urang thau jalan eng drei ngak di sang. Tapung talang lac janih hu rilo phốt pho, canxi, saong dom janih nitơ. Jalan eng drei ngak khak hữu cơ meng talang athur ngak di sang biak mbuan ngak. Hadei di tuk mikva tuk talang meng dom janih athur di var ro, njauk kaoh klaak ralaow atau blau daok kandaong veik, hadei di nan meng ba pabu thu blaoh saok klik piah buh ka phun pala.

Darah athur: Miva njauk pataom mek abih darah athur dalam tuk sik ralaow saong riak mbiah  tal tuk dreih yau gluh. Hadei di nan, meda tuh tabiak khali atau khay rao meng ia saong bluh thu tal tuk halei thu talah tabiak saong saok klik jeng tabung blaoh buh ka phun pala.

Đạm ikan: aih ikan atau rup ikan lac sa janih khak biak siam, Piah eng drei ngak khak ikan, khol drei dak talang ikan pablak haong hala kayau truh atau pon tame dom thung, blaoh hadei di nan meng tuh ia tagok nyu. Njauk caik hatai lac vah dom pandap srau ini dom harei sa mbang dalam 3 adit, saong hadei di nan ngak jeng janih gluh blaoh tuh ia tame lai ka nyu mbrang piah buh ka phun pala.

Khak drak meng baoh kayau labaih: mikva cakak sit baoh kayau mbang labaih, blaoh srau haong haluk cuah, hadei di nan buh tame thung atau tame kalaok saong gum sir mbaok, cang tal tuk baoh kayau bruk bram abih. Meda pandar janih khak ini piah pala bingu, atau ngak khak buh ka phun tuk praong.

Janih neraik di anek manuac: ia ma-ik di anek manuac lac janih khak biak siam meda salih ka dom janih khak bhian pandar urak ini. Mikva njauk lai mbrang haong ia tui jalan ngak lac: 1 ia ma-ik srau haong 10 ia hacih tal 2 ia ma-ik haong 10 ia hacih piah pruh ka phun. Dalam ia ma-ik, langiu di đạm biak glaong daok hu rilo khoáng chất đa lượng saong vi lượng yau ye nitơ, phốt pho saong kali di tỷ lệ labaih 11-1-2,5, samu haong hàm lượng NPK dalam dom janih khak tổng hợp. Ini daok lac sa jalan ngak piah khik caga phun pala plaih di rilo janih halak halin bhian gaok./.

Urang lang: Thu Thao – 19/10