Pala phun: kuac roh dom lubang taneh dalam saong praong meng 20 tal 30cm, yaok lubang atah di gauk meng 40 tal 50cm saong yaok jalan atah di gauk meng 1 tal 1,5m. Veih hanjul tangin dom bầu phun, raih klak kadung nilon blaoh lam sir trun lubang taneh, mek taneh dua gah ro kateik tagok ka nyu khang gha. Tuh sa tal taneh, bau, atau khak athur pa-auk vil val gha glaong labaih 5 cm piah khik caga saong khik ka phun dang tapak. Njauk pala di tuk bier harei langik la-an tuk abih pandiak.

Iek glang: Tukvak phun măng tây tamuh praong meng tuk pala tal tuk kaoh mek lac meng 6 tal 9 bilan, nan ye, di tukvak ini, bruk iek glang saong pruh khak lac biak tani tanat.

Pruh ia: Bhian pruh ia piah pabak ginup độ ẩm ka taneh piah ka phun praong siam. Di bilan pandiak meda pruh sa harei  2 tal 3 mbang, caik hatai plaih pruh ia ka phun hadei di maong 5 bier harei piah plaih ngak oh siam tal dom akaok ribung bahrau tamuh, meda me-om pon nerang, bau atau “sơ dừa” piah khik tathah. Di bilan hajan njauk caik hatai ngak jalan tathuak ia biak siam, tui iek ia pruh oh caik ka taneh  dauk ia, mayah yau nan phun mang tay meda njauk bruk gha saong matai got. Tuk halei jeng khik ka phun padang tapak piah phun mek hu ia harei abih gah, daong ka hala hu hu pataom veik chất hữu cơ raong phun saong raong gha.

Buh khak: hadei di tuk pala hu 15 tal 20 harei ye njauk buk khak mbang ka 1 meng khak NPK akaok kubau 15-15-15 sarau haong ia pruh tame got phun. Ngak tasaoh haluk hasit ka got phun piah khik caga ka gha phun. Buh khak NPK 16-16-8 gam haong sa dalam dom janih khak vi sinh yau ye WEHG, GA3 atau Agrostim dalam yaok 10 tal 15 harei sa mbang mbiah tal tuk dahlau di kaoh mek mateh bilan.

Kaoh mek: Măng tây hijao hadei di tuk pala meng 6 tal 9 bilan meda kaoh mek rabung mada, tuk dom phun rabung anek glaong meng 20 tal 30cm, ye kaoh mek rabung. Njauk kaoh mek di tuk dah page meng maong 4 tal maong 9 mesup. Tuk kaoh blaoh brei ba tame caik di labik lahei chip, plaih gaok tapak ia harei. Jalan kaoh mek, tok ba tangin tame pan kajap gha rabung, mbleing phun blaoh payeng hasit rabung meda tablait tabiak./.