Akaok thun 2019 sa-ai Nguyễn Phú Vinh (ndih tapui thun 1991, daok di TP Vĩnh Long, tỉnh Vĩnh Long) peih bruk raong bao darang juk saong duah labik pablei di dom nhà hàng daok di rilo labik.
Tuk camereip raong baoh bao darang juk oh ka hu năng suất, sa-ai Vinh brei dui atah tukvak raong piah baoh bao trak yau hatai caong khin di urang blei. Sa-ai Vinh brei thau: bruk raong baoh bao darang juk abih takik phun jien, mbuan raong, dalam tuk darak pasar biak praong. Labik raong lac sa-ai ngak pasiam veik danao daok klaak sraoh, brei mbang njam patam baoh karaoh dom janih yau baok dak, baoh kandaoh, lanaong, bèo… oh pandar dom janih mbang hỗn hợp mbuan ngak brei ruak, tuk nan meda ngak brei metai abih bao dalam danao raong.
Anak bruk baoh bao darang juk hu blei mbang rilo di dom ban praong, ta-eng sa-ai raong oh ginup pablei, nan ye sa-ai Vinh khang hatai klah rabha ilamu raong saong pambuak bruk haong mikva rilo puk palei raong bao darang juk piah hu ginup baoh bao piah pablei.
Amuk Lê Cẩm Giang (ndih tapui thun 1979 daok di huyện Cái Bè, tỉnh Tiền Giang) brei thau, sang hu urang taha prong thun njauk iek glang yaok harei, oh nao atah hu yau nan ye amuk ruah bruk raong baoh bao darang juk. Thun 2020 amuk peih bruk palao raong bao darang dalam 500m2 di bein lakuk sang. Bao pajaih blei di sa-ai Vinh pak Vĩnh Long, raong praong hu sa-ai Ving blei veik haong yaom meng 30.000 – 40.000 đồng/kg, tuk tabung glaong jaik 55.000 đồng/kg, hadei di nan amuk khang hatai peih prong raong jang 1.500m2 danao daok veik.
Buh tame jaik 10 triệu đồng piah raong 1.000m2 bao darang juk meng thun 2021, ong Nguyễn Minh Tâm daok di huyện Cao Lãnh, tỉnh Đồng Tháp palao raong bao mek hu 30 drei sa kg, pablei tabiak yaom jaik 40.000 đồng/kg. Ong Tâm khan lac “Tuk camereip huac raong bao darang juk oh jeng nan ye dahlak tok palao raong jaik 1.000m. Hu sa-ai Vinh abih hatai tacei pato, raong hu siam saong hu sa-ai Vinh blei veik abih bao raong hu, nan ye dahlak palao raong jang 3.000m2 dalam danao daok veik”.
Khan ka bruk pambuak gauk raong bao darang juk haong jaik 100 urang di rilo tỉnh dalam ĐBSCL sa-ai Vinh brei thau, baoh bao darang juk hu labik pablei tani tanat. Yaok bilan sa-ai pabak hu meng 5 – 10 tấn bao rilaow, 300 – 500kg baoh bao saong jaik 100.000 bao pajaih, kein laba duah hu jaik 200 triệu đồng. Tuk peih bruk raong bao, urang raong hu sa-ai Vinh tacei pato cambaih laih ilamu raong, mong iek tuk bao njauk ruak saong hu blei veik tuk bao praong.
Amuk Lê Trúc My – Akaok Kapul doanh nghiệp TP Vĩnh Long, tỉnh Vĩnh Long – khan lac, bruk sa-ai Nguyễn Phú Vinh pambuak bruk haong urang raong saong blei veik abih dom bao raong praong, hu daong ba bruk ngak jeng yau hu jien mek tame ka bhap bani di dom puk palei. Dalam tukvak tapa, Kapul hu peih bruk meyaih khan baoh bao darang juk tal rilo labik, tapa dom mbang nyaom darak pasar, mbang parang iek,... di rilo labik, daong ka labik raong bao dak harei dak pablei hu rilo jang./.
Viết bình luận